ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტსა და ბიოლოგიის დეპარტამენტს საქმიანი ვიზიტით ბელორუსიის რესპუბლიკის მინსკის ცენტრალური ბოტანიკური ბაღის დირექტორის მოადგილე სამეცნიერო დარგში ივან ვოლოდკო სწავლული მდივან ლიუდმილა გონჩაროვასთან ერთად ეწვია. სტუმრებმა შეხვედრაზე წარმოადგინეს „ბელორუსიის მეცნიერებათა აკადემიის ცენტრალური ბოტანიკური ბაღის“ სამეცნიერო პოტენციალი. მხარეებმა დადებითად შეაფასეს ქართველი და ბელორუსი მეცნიერების თანამშრომლობა და დაიგეგმა მემორანდუმის გაფორმება.

თანამშრომლობის მემორანდუმი გაფორმდა ბათუმის შოთა რუსთველის სახელმწიფო უნივერსიტეტსა და კლაიპედას უნივერსიტეტს შორის. ხელშეკრულება მიზნად ისახავს პარტნიორი უმაღლესი საგანმანათლებლო დაწესებულებების ერთობლივი სასწავლო-საგანმანათლებლო და სამეცნიერო პროექტების განხორციელებას. მხარეთა შეთანხმებით, მაგისტრატურის საგანმანათლებლო პროგრამების სტუდენტებისა და პროფესორ-მასწავლებლებისათვის ამოქმედდება გაცვლითი პროგრამები, ჩატარდება კონფერენციები, სიმპოზიუმები, ტრენინგები და სემინარები.

ბათუმის შოთა რუსთაველის სახელმწიფო უნივერსიტეტში მიმდინარე იმპლანტოლოგიის სასწავლო კურსი დასრულდა. სასწავლო კურსს ივანე ჯავახიშვილის სახელობის თბილისის სახელმწიფო უნივერსიტეტის მედიცინის ფაკულტეტის სტომატოლოგიისა და ყბა-სახის ქირურგიის დეპარტამენტის პედაგოგი, იმპლანტოლოგი კახა გურგენიძე უძღვებოდა. სასწავლო კურსი „ოფის დენტალი"-ს ორგანიზებითა და ბათუმის შოთა რუსთაველის სახელმწიფო უნივერსიტეტის მხარდაჭერით საუნივერსიტეტო კლინიკა „ბსუ დენტი"-ს ბაზაზე ჩატარდა.

24, 25 და 26 ოქტომბერს საბუნებისმეტყველო მეცნიერებათა და ჯანდაცვის ფაკულტეტზე ჩატარდება ღია ლექციების ციკლი. ლექციებს წაიკითხავს აჭარის ავტონომიური რესპუბლიკის განათლებისა და სპორტის სამინისტროს “უმაღლესი განათლების ხელშეწყობის” ფარგლებში გამოცხადებულ კონკურსში გამარჯვებული, საერთაშორისო პროექტების მონაწილე და ხელმძღვანელი, საარლანდის უნივერსიტეტის (გერმანია) ბიოლოგიის ინსტიტუტის ბიოფიზიკოსი, „European Association for Red Cell Research“-ის პრეზიდენტი, პროფესორი ინგოლფ ბერნარტი, ასევე ლექციას წაიკითხავს საარლანდის უნივერსიტეტის პროფესორი ბიოქიმიის დარგში რიტა ბერნარტი.

ბათუმის შოთა რუსთაველის სახელმწიფო უნივერსიტეტში სამდღიანი სკოლა-კონფერენცია ტარდება თემაზე: „სამხრეთ კავკასიის შავი ზღვის რეგიონის კლიმატის მოდელირება“. სწავლება ხელს შეუწყობს შავი ზღვის რეგიონის მეცნიერებსა და სტუდენტებს, შეისწავლონ თანამედროვე კლიმატის მოდელირების პროგრამა. თანამედროვე პირობებში არსებობს შესაძლებლობა რიცხვითი სიმულაციური და რეგიონალური კლიმატის მოდელების შექმნისა, რის საფუძველზეც წინასწარ განისაზღვრება და შეფასდება კლიმატის ცვლილებით გამოწვეული ზემოქმედება გარემოზე. სკოლა-კონფერენციის ფარგლებში განიხილება რეგიონალური კლიმატური მოდელები: RegCM, WRF და ჰაერის დაბინძურების მოდელი CMAQ, მათი გამოყენების პირველი შედეგები და პერსპექტივები სამხრეთ კავკასიის/შავი ზღვის რეგიონის მომავალი კლიმატის მოდელირებისათვის.