საერთაშორისო სამეცნიერო კონფერენცია „მომავლის ტექნოლოგიები და სიცოცხლის ხარისხი“ გაიხსნა სასტუმრო „რადისონ ბლუ“-ს საკონფერენციო დარბაზში. ორი დღის განმავლობაში ათი 10 ქვეყნის 270 მონაწილე ბოლო პერიოდში წარმოებული კვლევების შედეგებს განიხილავს და არსებულ პრობლემებზე იმსჯელებს. საერთაშორისო ფორუმის მიზანია სიცოცხლის შემსწავლელ მეცნიერთა კვლევების გაცნობა და განხილვა მომავლის ტექნოლოგიების ჭრილში, რომელთა გამოყენებითაც შესაძლებელია დაავადებების დროული დიაგნოსტიკა, პროფილაქტიკა, ეფექტური, ხარისხიანი და უსაფრთხო მკურნალობა. მკურნალობა ეფუძნება გენეტიკურ კვლევებს იმ თანამედროვე ხედვებს, მიღწევებს, ტრადიციულ, უჯრედულ, ბიო, იმუნო და ნანოტექნოლოგიებში, რომლის საფუძველზეც მოხდა დაავადების დიაგნოსტიკა, ბიოლოგიურად აქტიური მოლეკულის გამოვლენა, და სამიზნე ორგანოში, ქსოვილსა თუ უჯრედში მიზანმიმართული მიწოდების წამალთფორმების და სისტემების დიზაინისა და ტექნოლოგიის შემუშავება.

ბათუმის შოთა რუსთაველის სახელმწიფო უნივერსიტეტის, აჭარის მთავრობის, საქართველოს ანესთეზიოლოგიის, რეანიმატოლოგიის სკოლის, ანესთეზიოლოგიის და კრიტიკული მედიცინის კავშირისა და თბილისის სახელმწიფო სამედიცინო უნივერსიტეტის ორგანიზებით სასტუმრო „შერატონში“ ტარდება საერთაშორისო კონფერენცია ანესთეზიოლოგიასა და ინტენსიურ თერაპიაში. სესიაში ანესთეზიოლოგიის, რეანიმატოლოგიის, გადაუდებელი მედიცინის, მეანობის, პულმონოლოგიისა და სხვა სფეროებში მომუშავე მედიკოსები და მედდები მონაწილეობენ. სამი დღის განმავლობაში 15 ქვეყნის 350 წარმომადგენელი დარგში არსებულ პრობლემებსა და საერთაშორისო მიღწევებზე იმსჯელებს.

საბუნებისმეტყველო მეცნიერებათა და ჯანდაცვის ფაკულტეტის ეკოლოგია minor–სა და ეკოლოგიის სპეციალობის მესამე კურსის სტუდენტები გასვლით კომპლექსურ სასწავლო–საველე პრაქტიკაზე იმყოფებოდნენ რვა დღის განმავლობაში ხმელეთისა და წყლის ეკოსისტემებში.

ხმელეთის ეკოსისტემებში საველე პრაქტიკის ფარგლებში, ველზე უშუალო დაკვირვების გზით, სტუდენტები გაეცნენ ქვიშნარი დიუნების ღია ეკოსისტემებს, დაბლობის ჭაობის, დაჭაობებული და შერეულფოთლოვანი ტყეების ეკოსისტემებს; სამეგრელო–ზემოსვანეთის ფარგლებში ნახეს ეკოსისტემების ვერტიკალური სარტყლიანობა ფოთლოვანი, შერეული და წიწვოვანი ტყეების მაგალითზე, მესტია–თეთნულდის მიდამოებში კი – სუბალპური და ალპური ეკოსისტემები და სუბნივალური და ნივალური (ზ.დ. 3050 მ) სარტყლის თოვლით დაფარული მწვერვალები.

საბუნებისმეტყველო მეცნიერებათა და ჯანდაცვის ფაკულტეტის ბიოლოგიისა და ეკოლოგიის სპეციალობის მეორე კურსის 37-მა სტუდენტმა ბოტანიკისა და ზოოლოგიის სასწავლო საველე პრაქტიკის ფარგლებში საველე ექსპედიციაში მიიღო მონაწილეობა, ახალგაზრდები ერთი კვირის განმავლობაში გოდერძის უღელტეხილის, ვარძიის, ბორჯომ-ხარაგაულის ეროვნული პარკის, აბასთუმნის, ბეშუმის ფლორასა და ფაუნას ეცნობოდნენ. სტუდენტებმა ბუნებრივ პირობებში შეისწავლეს მცენარეთა და ცხოველთა ტაქსონომიური მრავალფეროვნება, გავრცელების კანონზომიერებები. ექსპედიციის მონაწილეებს ჩამოუყალიბდათ საველე ხელსაწყოების გამოყენების, მცენარეთა და ცხოველთა იდენტიფიცირების უნარ-ჩვევები, დაეუფლნენ ჰერბარიუმის მომზადებისა და ეთიკეტირების მეთოდებს.

ბათუმის შოთა რუსთაველის სახელმწიფო უნივერსიტეტში ბათუმის მე-6 საერთაშორისო სკოლა-სემინარი გაიხსნა ბიომედიცინის აქტუალურ თემებზე. ქართველი და უცხოელი პროფესორები 3 დღის განმავლობაში ჩაატარებენ ლექციებს, მასტერ-კლასებსა და ლაბორატორიულ მეცადინეობებს დარგის მნიშვნელოვან საკითხებზე. საქართველოს უმაღლესი სასწავლებლების ბიოლოგიური და სამედიცინო პროფილის სტუდენტები, დოქტორანტები და რეზიდენტები გაეცნობიან დაბერების პროცესისა და სხვადასხვა დაავადების ბიოლოგიური მექანიზმების კვლევაში არსებულ თანამედროვე სამეცნიერო მიღწევებს, ბიოსუფრთხოების, ბიოეთიკური პრინციპებისა და ნორმების დაცვის მნიშვნელობას ბიოსამედიცინო საქმიანობაში.