13–15 ოქტომბერს თურქეთის ქალაქ სინოპში, სინოპის უნივერსიტეტის არქეოლოგიის დეპარტამენტის ინიციატივით ჩატარდა საერთაშორისო კონფერენცია სინოპისა და შავი ზღვის არქეოლოგიის საკითხებზე, რომელშიც სხვადასხვა ქვეყნის მეცნიერებთან ერთად მონაწილეობდა ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის მთავარი მეცნიერი თანამშრომელი ნინო ინაიშვილი. მკვლევარმა კონფერენციაზე წარადგინა ბსუ უნივერსიტეტის რექტორის მერაბ ხალვაშის ერთობლივი მოხსენება „სინოპური ამფორები კოლხეთში“. კონფერენციის დასასრულს გაიმართა მრგვალი მაგიდა, რომელმაც იმსჯელა სინოპისა და შავი ზღვის არქეოლოგიის პრობლემების შესწავლის ხელშეწყობის მიზნით სხვადასხვა ინსტიტუციებს შორის კავშირების განვითარებაზე.

საფრანგეთის, თურქეთის რამდენიმე უნივერსიტეტისა და ბათუმის შოთა რუსთაველის სახელმწიფო უნივერსიტეტის ორგანიზებით 2016–17 წლებში ჩატარდა ვორკშოფების სერია თემაზე: „ანატოლიის მდინარეები დასავლეთსა და აღმოსავლეთს შორის: ღერძები და საზღვრები (ადამიანისა და გარემოს გეოგრაფიული, ეკონომიკური და კულტურული ინტერაქცია ანტიკურ ხანაში)“. ანკარისა (2016 წლის 17–20 ნოემბერი) და ბათუმის (2017 წლის 4–7 აპრილი) ვორკშოფების შემდეგ, 29–30 სექტემბერს საერთაშორისო ვორკშოფს სტამბულსა და ინეზში (ანტიკური ხანის აინოსი) ანატოლიის კვლევის ფრანგულმა ინსტიტუტმა და სტამბულის უნივერსიტეტმა უმასპინძლეს.

ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის სამეცნიერო ჯგუფმა 14-20 სექტემბერს ეთნო-არქეოლოგიური ექსპედიცია განახორციელეს მაჭახლის ხეობაში, სოფელ ჩიქუნეთში. ინსტიტუტის დირექტორმა როინ მალაყმაძემ, მეცნიერ-თანამშრომელმა ჯემალ მიქელაძემ და დოქტორანტმა სულხან მამულაძემ აღმოაჩინეს სამეცნიერო წრეებისათვის დღემდე უცნობი რამდენიმე არქეოლოგიური ძეგლი და ეთნოლოგიური მასალა. შესასწავლ რეგიონში კვლევა-ძიება მომავალშიც გაგრძელდება, გარდა ამისა, დაგეგმილია ვრცელი, კომპლექსური, ნაშრომის გამოცემა, რომელშიც შევა როგორც მაჭახლის ხეობაში არსებული ეთნოლოგიური მასალები, ასევე არქეოლოგიური ძეგლები მათი ერთიანი გრაფიკული რეკონსტრუქციითა და ფოტო-მასალით წარმოდგენილი.

ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის დირექტორმა როინ მალაყმაძემ სოფლის ტურიზმის პირველ საერთაშორისო კონფერენციაში მიიღო მონაწილეობა და მოხსენება წარადგინა თემაზე: „აჭარაში სოფლად ტურიზმის განვითარების პერსპექტივები“. სამეცნიერო სესია აჭარის ტურიზმისა და კურორტების დეპარტამენტის ორგანიზებით გაიმართა და მასში 7 ქვეყნის 150 დელეგატი (ტურიზმის დარგის ექსპერტები, ტურიზმის სექტორში დასაქმებული ორგანიზაციების, საოჯახო-სასტუმრო სახლების, სოფლის და ეკო ტურიზმის სხვადასხვა სფეროს წარმომადგენლები, ასევე ტურისტული სააგენტოების, სამთავრობო და არასამთავრობო სექტორის, სამეცნიერო კვლევითი ინსტიტუტების წარმომადგენელი) იყო ჩართული.

სახალხო დღესასწაულის „ბათუმობის“ ფარგლებში ბათუმის შოთა რუსთაველის სახელმწიფო უნივერსიტეტში VIII საერთაშორისო სამეცნიერო კონფერენცია „ბათუმი - წარსული და თანამედროვეობა“ გაიხსნა. 60-მდე ქართველი და უცხოელი მკვლევარი სამეცნიერო მოხსენებებს წაიკითხავს ქალაქის წარსულსა და თანამედროვეობაზე, განიხილავენ ბათუმის განვითარების ტენდენციებსა და სხვა აქტუალურ საკითხებს. სამეცნიერო სესიაზე წარმოდგენილი იქნება ისეთი მნიშნელოვანი სტატიები, როგორიცაა: თანამედროვე ბათუმი: ინტერესთა კონფლიქტი და პერსპექტივა, ებრაელობა ბათუმის საქალაქო თვითმმართველობაში (1887-1917), ზნეობრივი ომი ხიმშიაშვილთა ოჯახის წინააღმდეგ, საქართველოს ევროპული რადიუსი და ბათუმის ურბანული პრიორიტეტები, ბრძოლები ბათუმის მიმართულებით 1877-1878 წლების რუსეთ-ოსმალეთის ომის პერიოდში, ტურიზმის განვითარების სტრატეგიული მიმართულებები ბათუმში.