ბათუმის შოთა რუსთაველის სახელმწიფო უნივერსიტეტის, ეკონომიკისა და ბიზნესის ფაკულტეტის ადმინისტრაცია (დეკანატი, ხარისხის უზრუნველყოფის სამსახური, დარგობრივი დეპარტამენტის ხელმძღვანელები, სპეციალისტები და მდივნები) და აკადემიური პერსონალი ფაკულტეტის პირველკურსელებს შეხვდნენ. მათ სტუდენტებს უმაღლესი საგანმანათლებლო დაწესებულების ძირითადი მარეგულირებელი აქტები, საგანმანათლებლო პროგრამების განხორციელების წესი, სტრუქტურა და მიმდინარე პროექტები გააცნეს. 2016-2017 სასწავლო წელს ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტზე 160 პირველკურსელი და 32 მობილობით გადმოსული სტუდენტი ჩაირიცხა.
გერმანიაში, ქალაქ ფრანკფურტში, საერთაშორისო სამეცნიერო კონფერენცია გაიმართა სახელწოდებით „Finance and Economics Conference 2016“. სამეცნიერო სესიაში მონაწილეობა მიიღეს ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის პროფესორ-მასწავლებლებმა. კონფერენციაზე ეკონომიკის დეპარტამენტის ხელმძღვანელმა, ასოცირებულმა პროფესორმა მურმან ცეცხლაძემ მოხსენება წარადგინა თემაზე: „საქართველოს ეკონომიკური პოტენციალი და ეკონომიკური ინტეგრაციის პერსპექტივები ევროპასთან“, ხოლო ასისტენტ პროფესორმა ნინო კონცელიძემ - „შემოსავლების უთანაბრობის შემცირება ეკონომიკური ზრდით საქართველოში“. სამდღიან საერთაშორისო კონფერენციაში 20-ზე მეტი ქვეყნის 33 წარმომადგენელი მონაწილეობდა.
ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის დელეგაცია ეკონომიკისა და ბიზნესის ფაკულტეტის დეკანის მოადგილის რამინ ცინარიძისა და ასოცირებულ პროფესორის პაატა აროშიძის შემადგენლობით უკრაინის ქალაქ უჟგოროდის ეროვნულ უნივერსიტეტს ეწვია. ხუთდღიანი ვიზიტის მიზანი უმაღლეს სასწავლებლებს შორის სამომავლო და სტრატეგიული ურთიერთობების გაღრმავება, სტუდენტთა და პროფესორთა გაცვლითი პროგრამები, საერთო სამეცნიერო ჟურნალის გამოცემა და გამოცდილების გაზიარება იყო.
