ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტზე პოეტ გივი ალხაზიშვილის პოეტური კრებულის „რჩეულის’’ პრეზენტაცია გაიმართა. "რჩეული’’ პოეტის სხვადასხვა დროს გამოცემულ 30-მდე კრებულის ნარჩევ ლექსებს მოიცავს. გივი ალხაზიშვილთან შეხვედრა ბსუ-ს ლიტერატურული კლუბის ორგანიზებით ჩატარდა და მას სხვადასხვა სპეციალობის სტუდენტების ესწრებოდნენ.

დედაენის დღე ბათუმის შოთა რუსთაველის სახელმწიფო უნივერსიტეტში რამდენიმე ღონისძიებით აღინიშნა. ჩატარდა სტუდენტური აქცია და მოეწყო ექსპოზიცია “არა ბარბარიზმებს“, სადაც ახალგაზრდებმა ასი სიტყვა გამოფინეს. პროექტი მიზნად ისახავდა ქართულ ენაში მომრავლებული უცხოენოვანი ბარბარიზმების ნაცვლად საზოგადოებისთვის ქართული შესატყვისების შეთავაზებას. შოთა რუსთაველის დარბაზში პროფესორ-მასწავლებლებმა მოხსენებები წარმოადგინეს ქართული ენის სიწმინდეზე, მისი სწავლებისა და უფლებების დაცვის საკითხებზე. საჯარო ლექციების ციკლის დასასრულს, სტუდენტებმა და პროფესორ-მასწავლებლებმა ილია ჭავჭავაძის ძეგლი გვირგვინით შეამკეს.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის „ქართველოლოგიის ცენტრის“ მკვლევართა ჯგუფი სამეცნიერო პროექტების „ტაო“ (ხელმძღვანელი, პროფესორი მამია ფაღავა) და „მარადიდი“ (ხელმძღვანელი, პროფესორი მალხაზ ჩოხარაძე. ორივე პროექტი დაფინანსებულია შოთა რუსთაველის ეროვნული სამეცნიერო ფონდის მიერ) ფარგლებში სამეცნიერო მივლინებით იმყოფებოდა ისტორიულ სამხრეთ საქართველოში. მეცნიერები ხუთი დღის განმავლობაში მუშაობდნენ ზემო მარადიდში - ახლა მურათლი (ძველი კლარჯეთის სოფელი, თანამედროვე ართვინის ილი, ბორჩხის ილჩე. თურქეთის რესპუბლიკა), ოლთისსა და თორთუმში (ძვ. ტაოს ქვეყანა. ახლა არზრუმის ილი, ოლთისისა და თორთუმის ილჩეები. თურქეთის რესპუბლიკა).

ბათუმის შოთა რუსთაველის სახელმწიფო უნივერსიტეტის რექტორი მერაბ ხალვაში, რექტორის მოადგილეები ნათია წიკლაშვილი, თამარ სირაძე საერთაშორისო სადოქტორო სკოლის „დიგიტალური ჰუმანიტარიის“ გამარჯვებულ დოქტორანტებს შეხვდნენ და წარმატება მიულოცეს. საერთაშორისო პროექტს გოეთეს სახელობის უნივერსიტეტი ბათუმის შოთა რუსთაველის სახელმწიფო უნივერსიტეტთან და ივანე ჯავახიშვილის სახელობის თბილისის სახელმწიფო უნივერსიტეტთან ერთად ახორციელებს. პროექტის ფარგლებში შექმნილი სადოქტორო სკოლის მონაწილეებმა პირველი ტურის შემდეგ, მონაწილეობა მიიღეს 23-29 მარტს, ფრანკფურტის გოეთეს სახელობის უნივერსიტეტის ემპირიული ენათმეცნიერების ინსტიტუტში გამართულ მეორე ტურში. თამარ ქათამაძე, დევაძე ქეთი და ბერიძე მარიკა უფასოდ ისწავლიან სამი წლის განმავლობაში, მათ მეცნიერ-ხელმძღვანელები ეყოლებათ საქართველოსა და გერმანიაში.

დღეს, ბათუმის შოთა რუსთაველის სახელმწიფო უნივერსიტეტში ფრანკოფონიის კვირეული საზეიმოდ დაიხურა. კვირეულის ფარგლებში უნივერსიტეტს საფრანგეთის საელჩოს ატაშე სამეცნიერო და საუნივერსიტეტო დარგში ტერი ბურტე და ფრანგული ინსტიტუტის ლინგვისტური და საგანმანათლებლო პროგრამების კოორდინატორი ქეთევან ქურციკიძე ეწვია. სტუმრებმა ფრანგული ენის მნიშვნელობაზე, სასწავლო და სამეცნიერო თანამშრომლობაზე და სამომავლო პერსპექტივებზე ისაუბრეს.
ფრანკოფონიის კვირეულის დახურვის ცერემონიაზე ფრანგული ენის კონკურსში გამარჯვებულ სტუდენტებსა და საჯარო სკოლის მოსწავლეებს სიგელები გადასცეს.