ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტში აკადემიური საბჭოს გამსვლელი სხდომა გაიმართა. ინსტიტუტის მკვლევრებმა ბოლო ერთი წლის განმავლობაში წარმოებული სამეცნიერო-კვლევითი მუშაობის შედეგები და 2016 წლის სამეცნიერო პროგრამები განიხილეს. შეხვედრაზე ფიტოპათოლოგიის, ბიომრავალფეროვნების, კოლხეთის ტორფნარებისა და წყლის ეკოსისტემების კონსერვაციის მიმართულებით ანგარიში მთავარმა მეცნიერ-თანამშრომლებმა: ზოია სიხარულიძემ, მარიამ მეტრეველმა და იზოლდა მაჭუტაძემ.

ფიტოპათოლოგიისა და ბიომრავალფეროვნების ინსტიტუტის მთავარმა მეცნიერ-თანამშრომელმა გალინა მეფარიშვილმა და მეცნიერ-თანამშრომელმა, ბიოლოგიის დეპარტამენტის მე-3 კურსის დოქტორანტმა მაკა მურადაშვილი-შამილიშვილმა თბილისში, ლ. საყვარელიძის სახელობის დაავადებათა კონტროლისა და საზოგადოებრივი ჯანმრთელობის ეროვნულ ცენტრსა და გ. ელიავას სახელობის ბაქტერიოფაგიის, მიკრობიოლოგიისა და ვირუსოლოგიის ინსტიტუტში გაიარეს ტრენინგი პათოგენური მოკროორგანიზმების გენომის სექვენირების საკითხებზე. მკვლევრები გაეცნენ საკარანტინო ბაქტერიული პათოგენის Ralstonia Solanacearum-ის მიმართ სპეციფიკურ ბაქტერიოფაგებთან მუშაობის პრინციპებს.

ბათუმის შოთა რუსთაველის სახელმწიფო უნივერსიტეტმა კოლხეთის დაცული ტერიტორიების განვითარების ფონდის მიერ გამოცხადებულ ტენდერებში: „ქობულეთის დაცული ტერიტორიების, ქობულეთის ნაკრძალისა და აღკვეთილის მენეჯმენტის გეგმის შეყიდვა“ და „კოლხეთის ეროვნული პარკის და კაცობურის მენეჯმენტის გეგმის შესყიდვა“ გაიმარჯვა. 10 ნოემბერს სატენდერო დოკუმენტაციებს ხელი მოაწერეს უნივერსიტეტის ადმინისტრაციის ხელმძღვანელმა ჯემალ ანანიძემ და კოლხეთის განვითარების ფონდის დირექტორმა დავით კვიციანმა. პროექტი ითვალისწინებს მენეჯმენტის ექვსწლიანი გეგმის მომზადებას „დაცული ტერიტორიების მენეჯმენტის გეგმის სტრუქტურის, შინაარსისა და თემატური ნაწილების შემუშავების მეთოდოლოგიის მომზადების ეტაპებისა და პროცედურის“ შესაბამისად, რომელიც დამტკიცებულია გარემოსა და ბუნებრივი რესურსების დაცვის სამინისტროს მიერ (მინისტრის 2014 წლის 12 მარტის #110 ბრძანება). პროექტები ფიტოპათოლოგიისა და ბიომრავალფეროვნების ინსტიტუტის კოლხეთის ტორფნარების და წყლის ეკოსისტემების კონსერვაციის განყოფილების უფროსის იზოლდა მაჭუტაძის ხელმძღვანელობით განხორციელდება.

წაღვერის პუნქტის საცდელ ნაკვეთებზე ფიტოპათოლოგიის და ბიომრავალფეროვნების ინსტიტუტის გამძლეობის გენეტიკის განყოფილების თემატიკის ფარგლებში, სასოფლო-სამეურნეო კვლევების საერთაშორისო ცენტრებთან (CIMMYT, ICARDA) თანამშრომლობის ეგიდით, სხვადასხვა სახეობის მცენარე დაირგო. 28-29 ოქტომბერს ინფექციის ბუნებრივ ფონზე შეფასების მიზნით ხორბლის დაავადებების საერთაშორისო „ხაფანგი“ სანერგეები (300 ნიმუში) დაითესა, ხოლო მოსავლის მიღების მიზნით - საქართველოში გავრცელებული ხორბლის კომერციული ჯიშები „ბეზოსტაია 1“, „ლომთაგორა 123“ და საკონტროლო დაავადებებისადმი მიმღები ჯიში „მოროკო“. 6 ნოემბერს ქობულეთში, ინსტიტუტის საცდელ ნაკვეთებზე დაირგო მარცვლოვანთა ახალი საერთაშორისო სანერგეები და 80 გამძლეობის გენების შემცველი იზოგენური ხაზისგან შედგენილი საერთაშორისო ნაკრები. გარდა ამისა, ბათუმის შოთა რუსთაველის სახელმწიფო უნივერსიტეტსა და საქართველოს სასოფლო სამეურნეო კვლევების ცენტრს შორის გაფორმებული მემორანდუმის ფარგლებში სხვადასხვა ქვეყნიდან შემოტანილი ხორბლის, ქერის, ჭვავის, ტრიტიკალეს ჯიშების (სულ 50 ჯიში) ნერგები დათესეს მკვლევრებმა დაავადებებისადმი გამძლეობის დონისა და სხვა მნიშვნელოვანი თავისებურებების შესწავლის მიზნით.

ფიტოპათოლოგიისა და ბიომრავალფეროვნების ინსტიტუტის კოლხეთის ტორფნარებისა და წყლის ეკოსისტემების კონსერვაციის განყოფილების უფროსმა იზოლდა მაჭუტაძემ მონაწილეობა მიიიღო სტამბულში გამართულ ევროკავშირის „თანამშრომლობა შავი ზღვის აუზის ქვეყნებს შორის“ პროექტის „შავი ზღვის მდინარეთა ესტუარიების ეკოლოგია და მოდელირების“ დასკვნით კონფერენციაში. მკვლევარი სამეცნიერო სესიის მონაწილეებს მიესალმა და მოხსენება გააცნო ბოლო პერიოდში წარმოებული კვლევის შედეგებზე. კონფერენციის დასასრულს, თანამშრომლობის მემორანდუმი გაფორმდა ბათუმის შოთა რუსთაველის სახელმწიფო უნივერსიტეტს, ბულგარეთის ბურგასის პროფესორ ასსენ ზლატანოვის სახელობის უნივერსიტეტს, უკრაინის ოდესის ეკოლოგიის უნივერსიტეტსა და თურქეთის ნამიკ ქემალის უნივერსიტეტს შორის. დაიგეგმა ხელშეკრულების გაფორმება ასევე გურიის გუბერნიასთან