წაღვერის პუნქტის საცდელ ნაკვეთებზე ფიტოპათოლოგიის და ბიომრავალფეროვნების ინსტიტუტის გამძლეობის გენეტიკის განყოფილების თემატიკის ფარგლებში, სასოფლო-სამეურნეო კვლევების საერთაშორისო ცენტრებთან (CIMMYT, ICARDA) თანამშრომლობის ეგიდით, სხვადასხვა სახეობის მცენარე დაირგო. 28-29 ოქტომბერს ინფექციის ბუნებრივ ფონზე შეფასების მიზნით ხორბლის დაავადებების საერთაშორისო „ხაფანგი“ სანერგეები (300 ნიმუში) დაითესა, ხოლო მოსავლის მიღების მიზნით - საქართველოში გავრცელებული ხორბლის კომერციული ჯიშები „ბეზოსტაია 1“, „ლომთაგორა 123“ და საკონტროლო დაავადებებისადმი მიმღები ჯიში „მოროკო“. 6 ნოემბერს ქობულეთში, ინსტიტუტის საცდელ ნაკვეთებზე დაირგო მარცვლოვანთა ახალი საერთაშორისო სანერგეები და 80 გამძლეობის გენების შემცველი იზოგენური ხაზისგან შედგენილი საერთაშორისო ნაკრები. გარდა ამისა, ბათუმის შოთა რუსთაველის სახელმწიფო უნივერსიტეტსა და საქართველოს სასოფლო სამეურნეო კვლევების ცენტრს შორის გაფორმებული მემორანდუმის ფარგლებში სხვადასხვა ქვეყნიდან შემოტანილი ხორბლის, ქერის, ჭვავის, ტრიტიკალეს ჯიშების (სულ 50 ჯიში) ნერგები დათესეს მკვლევრებმა დაავადებებისადმი გამძლეობის დონისა და სხვა მნიშვნელოვანი თავისებურებების შესწავლის მიზნით.

ფიტოპათოლოგიისა და ბიომრავალფეროვნების ინსტიტუტის კოლხეთის ტორფნარებისა და წყლის ეკოსისტემების კონსერვაციის განყოფილების უფროსმა იზოლდა მაჭუტაძემ მონაწილეობა მიიიღო სტამბულში გამართულ ევროკავშირის „თანამშრომლობა შავი ზღვის აუზის ქვეყნებს შორის“ პროექტის „შავი ზღვის მდინარეთა ესტუარიების ეკოლოგია და მოდელირების“ დასკვნით კონფერენციაში. მკვლევარი სამეცნიერო სესიის მონაწილეებს მიესალმა და მოხსენება გააცნო ბოლო პერიოდში წარმოებული კვლევის შედეგებზე. კონფერენციის დასასრულს, თანამშრომლობის მემორანდუმი გაფორმდა ბათუმის შოთა რუსთაველის სახელმწიფო უნივერსიტეტს, ბულგარეთის ბურგასის პროფესორ ასსენ ზლატანოვის სახელობის უნივერსიტეტს, უკრაინის ოდესის ეკოლოგიის უნივერსიტეტსა და თურქეთის ნამიკ ქემალის უნივერსიტეტს შორის. დაიგეგმა ხელშეკრულების გაფორმება ასევე გურიის გუბერნიასთან

ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტში სხდომა ჩატარდა. ინსტიტუტის დირექტორმა გურამ მემარნემ უნივერსიტეტის სამეცნიერო და ტექნიკურ პერსონალს სიგელები გადასცა. ინსტიტუტის თანამშრომლები ბათუმის შოთა რუსთაველის სახელმწიფო უნივერსიტეტის 80 წლის იუბილესთან დაკავშირებით დაჯილდოვდნენ წარმატებული სამეცნიერო და აქტიური საუნივერსიტეტო საქმიანობისათვის.

ფიტოპათოლოგიისა და ბიომრავალფეროვნების ინსტიტუტში სამეცნიერო პერსონალის სხდომაზე მკვლევრებმა საქართველოს შოთა რუსთაველის ეროვნული სამეცნიერო ფონდის მიერ დაფინანსებული საგრანტო პროექტი: „მცენარეთა პათოგენური მიკროორგანიზმების კულტურათა ეროვნული კოლექციის შექმნა“ (№31/73, პროექტის ხანგრძლივობა 25.04.2013-25.10.2015, ხელმძღვანელი ზოია სიხარულიძე) შეაჯამეს. შესრულდა პროექტით გათვალისწინებული ამოცანა - შეივსო და გაფართოვდა საქართველოში წარმოებადი მარცვლოვნების, ვაზის, კივის, თხილის, ბოსტნეული და სხვა კულტურების პათოგენკულტურათა ეროვნული კოლექცია.

ბათუმის შოთა რუსთაველის სახელმწიფო უნივერსიტეტის 80 წლის იუბილისდამი მიძღვნილ საზეიმო შეხვედრაზე სასტუმრო „შერატონ ბათუმში“ ფიტოპათოლოგიისა და ბიომრავალფეროვნების ინსტიტუტის დირექტორს გურამ მემარნეს და მთავარ მეცნიერ - თანამშრომლებს ზოია სიხარულიძეს, გალინა მეფარიშვილსა და მარიამ მეტრეველს წარმატებული სამეცნიერო და აქტიური საუნივერსიტეტო საქმიანობისათვის სამთავრობო ჯილდოები გადაეცათ.