მოდიფიცირებულ მდორე შეშფოთების მიახლოებაში დიფრაქციული ეფექტების გათვალისწინებით ანალიზურად შესწავლილია მრავალჯერად გაბნეული ელექტრომაგნიტური ტალღების სივრცითი სპექტრის სიმძლავრის თავისებურებები ტურბულენტურ მაგნიტოაქტიურ დაჯახებად პლაზმაში წაგრძელებული ანიზოტროპული არაერთგვაროვნებებით, რომელიც განპირობებულია ელექტრონების კონცენტრაციის ფლუქტუაციებით. მიღებულია ფაზის ფლუქტუაციებით გამოწვეული კორელაციური ფუნქციისა და დისპერსიის გამოსახულებები ელექტრონების კონცენტრაციის ფლუქტუაციების ნებისმიერი კორელაციური ფუნქციისთვის.

ხელოვნური ნეირონული ქსელების დასწავლის პროცესში ერთ-ერთ ყველაზე რთულ პრობლემას წარმოადგენს ნეირონული ქსელისათვის საგნობრივი გარემოდან სასწავლო მაგალითების მასივის შეკრება და მისი ვალიდურობისა და რელევანტურობის მტკიცება. ამ ეტაპისათვის ეს ცალკე პრობლემათ არის გამოყოფილი და საგრძნობლად აფერხებს ამა-თუ იმ სფეროში ხელოვნური ნეირონული ქსელებისა (და საზოგადოდ ინტელექტუალური სისტემების) დანერგვის პროცესს.

ფრაზეოლოგიზმები დამახასიათებელია ყველა ენისათვის, განვითარების რა დონეზეც უნდა იმყოფებოდნენ ისინი. ეს კიდევ ერთი დადასტურებაა იმისა, რომ ფრაზეოლოგია ენობრივი სისტემის განუყოფელ და ორგანულ ნაწილს წარმოადგენს.
ხატოვანი გამონათქვამების, იდიომების და ფრაზეოლოგიზმების ჯგუფში შემავალი ერთეულების უმრავლესობაში ნათლადაა გამოხატული ენის ეროვნული თვითმყოფადობა, ისინი ახდენენ ამა თუ იმ ხალხის კულტურისა და ფსიქოლოგიის მთელი რთული კომპლექსის, მისი ხატოვანი აზროვნების განუმეორებელი ხერხების კონდენსირებას. ქართულ და ფრანგულ ლექსიკაში ხატოვან თქმათა ძალზე მდიდარი ასორტიმენტია წარმოდგენილი.

ანდაზები წარმოადგენენ ფიგურალურ ზმნურ გამონათქვამებს, რომლებიც მეტყველებას ემოციურს და გამომხატველს ხდიან. ისინი უნივერსალურია, რადგან ასახავენ რეალობას. ამავე დროს, ისინი ეროვნულია და აქტიურად გამოიყენება მეტყველებაში ნებისმიერი ასაკის ადამიანის მიერ. ისინი ერის კუთვნილებას წარმოადგენენ და ხშირად ასახავენ მოცემული საზოგადოების მსოფლმხედველობას. მათ აქვთ როგორც კომუნიკაციური ისე უმეტეს შემთხვევაში, დიდაქტიკური ფუნქცია. ანდაზების სიბრძნე ეფუძნება სამყაროს ღრმა ანალიზს, რომელსაც აქვს მყარი ფსიქიკური სქემა. ანდაზა გამოხატავს კოგნიტურ ცოდნას, რომელსაც საფუძვლად უდევს არქეტიპული ოპოზიცია. ანდაზები არამარტო ასახავენ ეროვნულ კულტურას, არამედ ასახავენ საუკუნეების განმავლობაში დაგროვილ სიბრძნეს. მაგრამ რა ხდება ამჟამად, წარმოიშვება თუ არა ანდაზები თანამედროვე პირობებში და რა წყაროებში გვხვდება ისინი. ანდაზების ცნობილი მკვლევარი, მეცნიერი ვოლფგან მიდერი აღნიშნავს, რომ გუგლის, გუგლის წიგნების, გუგლის ამბების, გაზეთების სხვა მასალების კვლევისას, პარემიოლოგებმა 700 ახალი ინგლისურ-ამერიკული ანდაზა აღმოაჩინეს და გამოიკვლიეს. თანამედროვე ანდაზები იყენებენ არსებული ანდაზების სტრუქტურებს. მაგალითად, Don’t take /tear/ down a fence/wall/unless you are sure why it was put up. ანდაზების უმეტესობას თხრობითი წინადადების ფორმა აქვს: A woman’s place is any place she wants to be. გვხვდება ანდაზები შემდეგი ფორმით- არტიკლი/ზედსართავი სახელი/არსებითი სახელი/ზმნა: The best way to kill time is to work it to death; არტიკლი/ზედსართავი სახელი/ზმნა- The hand will not reach for what the heart does not long for და ა.შ.

კულტურული ღონისძიებები, დაკავშირებულია რა კულტურის სხვადასხვა დარგებთან (ცეკვა, მუსიკა, დრამა, ხელოვნება, მხატვრული კითხვა, ხატვა, სკულპტურა), ეფუძნება ადამიანის შემოქმედებით უნარებს, იმპროვიზირებულად წარმოაჩენს კულტურულ მემკვიდრეობას ან მასზე დაყრდნობით შექმნილ ახალ შედევრებს. ისინი იძლევა საშუალებას ადამიანში უკვე არსებული რესურსის, პოტენციალის გამომჟღავნების და მისი განვითარებისა.