ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ჟურნალისტიკის საბაკალავრო საგანმანათლებლო პროგრამამ სრული აკრედიტაცია წარმატებით გაიარა. ვულოცავთ სტუდენტებსა და პროფესორ-მასწავლებლებს ამ მნიშვნელოვან გამარჯვებას და წარმატებებს ვუსურვებთ.

ფრანკოფონული საუნივერსიტეტო სააგენტოს (AUF) მხარდაჭერით, ტუნისის ბიზნესის უმაღლესი სკოლის პროფესორმა იმენ ხანჩელმა 13-15 დეკემბერს, ბათუმის შოთა რუსთაველის სახელმწიფო უნივერსიტეტში სხვადასხვა ფაკულტეტის სტუდენტებისათვის ტრენინგი ჩაატარა თემაზე: „კომუნიკაცია“. ტრენინგი ითვალისწინებდა პრაქტიკულ სავარჯიშოებს, რაც დაეხმარა სტუდენტებს განხილული თემატიკის გათავისებასა და ეფექტიანი კომუნიკაციის უნარების გაუმჯობესებაში. სასწავლო კურსის მიზანი იყო ეფექტიანი კომუნიკაციისათვის საჭირო ცოდნის შეძენა და შესაბამისი უნარების განვითარება, რაც ხელს უწყობს ინტერპერსონალური ურთიერთობების წარმატებით განხორციელებას. ტრენინგი ჩატარდა ფრანგულ ენაზე და მონაწილეობა მიიღო სხვადასხვა საფეხურისა და ფაკულტეტის სტუდენტმა.

ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა და საქართველოს საგარეო საქმეთა სამინისტროს საქართველოს საერთაშორისო ხელშეკრულებათა თარგმნის ბიუროს დირექტორმა ნიკოლოზ მემანიშვილმა მემორანდუმს მოაწერეს ხელი. ხელშეკრულება ითვალისწინებს თანამშრომლობას სამეცნიერო, კვლევით და მთარგმნელობით სფეროებში. მემორანდუმის მიზანია ერთობლივი პროექტების დაგეგმვა და შესრულება სახელმწიფო ენის კონსტიტუციური სტატუსის დაცვის, სახელმწიფო ენის ფლობის დონის ამაღლებისა და საჯარო სივრცეში მისი სრულფასოვანი მიმოქცევის უზრუნველსაყოფად; ასევე დაიგეგმა თანამშრომლობა საქართველოს საერთაშორისო ხელშეკრულებების უცხოენოვანი ტექსტების თარგმნის, დარგობრივი ტერმინოლოგიის დამუშავებისა და დარგობრივი თარგმანის ხარისხის გაუმჯობესების მიმართულებით.

მაქს ვებერის ფონდის ხელმძღვანელი საქართველოში ანდრეას ჰილგერი და ფონდის მენეჯერი დავით ჯიშკარიანი ბათუმის შოთა რუსთველის სახელმწიფო უნივერსიტეტს ეწვივნენ. ბსუ-ს რექტორთან, პროფესორ მერაბ ხალვაშთან გამართულ შეხვედრაზე ანდრეას ჰილგერმა საქართველოსა და გერმანიას შორის არსებულ ურთიერთობებსა და სამომავლო თანამშრომლობის მიმართულებებზე ისაუბრა. ბსუ-ს რექტორმა მერაბ ხალვაშმა სტუმრებს გააცნო უნივერსიტეტში გერმანიის მხარდაჭერით განხორციელებული და მიმდინარე სამეცნიერო-საგანმანათლებლო პროგრამები. მხარეთა შეთანხმებით, დაიგეგმა ერთობლივი პროექტების განხორციელება, გაცვლითი პროგრამების შემუშავება და თანამშრომლობის მემორანდუმის გაფორმება.

24-25 ნოემბერს, ბათუმის შოთა რუსთაველის სახელმწიფო უნივერსიტეტში, სხვადასხვა ფაკულტეტის სტუდენტებისათვის ტრენინგი ჩატარდა თემაზე: „დისკურსის ხელოვნება, როგორც საზოგადოებაზე ზემოქმედების ეფექტური იარაღი’’. ტრენინგს უძღვებოდა ფრანკოფონიის სააგენტოს ტრენერი, სამეცნიერო ექსპერტი, გრიგოლ რობაქიძის სახელობის უნივერსიტეტის ასოცირებული პროფესორი თამარ გაგოშიძე. სტუდენტები გაეცნენ ზეპირი თუ წერითი დისკურსების ზემოქმედების საკითხს, დისკურსის ხელოვნების, როგორც სამეცნიერო დარგის გაჩენისა და განვითარების ისტორიას, მოისმინეს ცნობილი პოლიტიკური, მენეჯერული და კინომატოგრაფიული დისკურსები; ახალგაზრდებმა ასევე იმსჯელეს ყურადღების მოსაზიდ სარეკლამო-მარკეტინგულ და ჟურნალისტურ ხერხებზე, რის შედეგადაც, ტრენერის მიერ მიწოდებული ამოცანის მიხედვით, შექმნეს და დამსწრე აუდიტორიას წარუდგინეს საკუთარი გამოსვლები.