მიმდინარე წლის 25 ნოემბერს ტემპუსის პროექტის ფარგლებში ტურიზმის ფაკულტეტის პროფესორ-მასწავლებლებისათვის გერმანიის JADE-ს უნივერსიტეტის პროფესორებმა გილა ალტმანმა და კნუტ შერინგერმა „ტურიზმის მდგრადი მართვა: ახალი მოდულების შექმნა საერთაშორისო საბაკალავრო და სამაგისტრო პროგრამებში“ ტრენინგები ჩაატარეს.
პროექტი მიზნად ისახავს: კავკასიაში, ბოლონიის პრინციპების შესაბამისად კურიკულუმისა და სწავლების მეთოდების მოდერნიზებას ბიზნეს-სექტორთან კოოპერაციის მეშვეობით თეორიისა და პრაქტიკის ინტეგრაციის გზით.

ქალაქ ბათუმის მერი გიორგი ერმაკოვი ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის სტუდენტებს შეხვდა და პროგრამა ,,ახალგაზრდების უცხოეთში სტაჟირების ხელშეწყობა“ გააცნო. პროგრამა ითვალისწინებს ახალგაზრდების პროფესიულ სტაჟირებას და გადამზადებას სარესტორნო მომსახურების, სასტუმრო მომსახურებისა და ტურიზმის მენეჯმენტის მიმართულებით, ევროკავშირის წევრ ქვეყნებში, ასევე თურქეთსა და შვეიცარიაში. პროექტის მიზანია სტაჟიორთა კვალიფიკაციის ამაღლება, შრომის ბაზარზე კონკურენტუნარიანი ახალგაზრდა კადრების მომზადება.

10-21 ოქტომბერს ტურიზმის ფაკულტეტის სტუდენტებისათვის გერმანელმა ექსპერტმა კურტ ჰეინც რეიცმა ,,მსოფლიო ტურიზმის განვითარების თანამედროვე ტენდენციები და ქართული რეალობა“ საკითხების ირგვლივ მასტერკლასი ჩაატარა.
ბატონი რეიცი წლებია რაც აქტიურად თანამშრომლობს ტურიზმის ფაკულტეტთან. 2010 წლიდან კი ის ბათუმის შოთა რუსთაველის სახელმწიფო უნივერსიტეტის საპატიო დოქტორია.

საქართველოს საპატრიარქოს მევენახეობისა და მეღვინეობის ეროვნული სამეცნიერო ცენტრის ექსპერტთა ჯგუფმა, დავით თამარაშვილის ხელმძღვანელობით ტურიზმის ფაკულტეტის სტუდენტებისათვის თემაზე ,,ქართული ღვინო და ტურიზმი“ მასტერკლასი ჩაატარეს. სტუდენტებმა სასარგებლო ინფორმაცია მიიღეს: მევენახეობა მეღვინეობის, ღვინის დაყენების ტრადიციული ტექნოლოგიის, ფალსიფიცირებული ღვინის წარმოების აღმოფხვრისა და ეკოლოგიურად სუფთა, ნატურალური ღვინის წარმოების ხელშეწყობის, ღვინის დაგემოვნების და კარგი ღვინის გამორჩევის მეთოდების, ღვინის ბიზნესის, საქართველოში ღვინის ტურიზმის განვითარების პერსპექტივების შესახებ.

ტურიზმის ფაკულტეტის ადმინისტრაცია, ბსუ-ს ბიბლიოთეკის დირექტორი და ხარისხის უზრუნველყოფის სამსახური ტურიზმის ფაკულტეტის პირველკურსელებს შეხვდნენ და მათ უნივერსიტეტის ძირითადი მარეგულირებელი აქტები, საგანმანათლებლო პროგრამების განხორციელების წესი და სტრუქტურა გააცნეს.
2014-2015 სასწავლო წელს ტურიზმის ფაკულტეტზე 150 პირველ კურსელი და 93 მობილობით გადმოსული სტუდენტი ჩაირიცხა.