შოთა რუსთაველის დარბაზში ეკონომიკისა და ბიზნესის ფაკულტეტის ორგანიზებით უკრაინული კომპანია „მაქს სტუდიოს“ გენერალურმა დირექტორმა მაქსიმ კოვალმა ლექცია ჩაატარა თემაზე: „IT-ტექნოლოგიების დანერგვა და გამოყენება ბიზნესში“. მომხსენებელმა სტუდენტებს სპეციალურად ბათუმის შოთა რუსთაველის სახელმწიფო უნივერსიტეტისთვის შექმნილი სმარტფონის ახალი აპლიკაცია წარუდგინა. აპლიკაცია სტუდენტებს მიაწვდის ინფორმაციას ლექციების, გამოცდების ცხრილისა და პროფესორ-მასწავლებლების შესახებ. ღონისძიების დასასრულს მაქსიმ კოვალმა სტუდენტების შეკითხვებს უპასუხა.

აჭარის მთავრობის თავმჯდომარე არჩილ ხაბაძე ეკონომიკისა და ბიზნესის ფაკულტეტის სტუდენტებს შეხვდა. ბათუმის შოთა რუსთაველის სახელმწიფო უნივერსიტეტის კურსდამთავრებულმა მომავალ ეკონომისტებს გამოცდილება გაუზიარა, სტუდენტობის პერიოდი გაიხსენა და პროფესიულ განვითარებაზე ესაუბრა. შეხვედრა დიალოგის რეჟიმში წარიმართა და რეგიონის პირველმა პირმა ახალგაზრდების აქტუალურ შეკითხვებს უპასუხა. სტუდენტები დასაქმების, სტაჟირების, საბანკო იმიტირებული სივრცის შექმნის, სახელმწიფო სტიპენდიის აღდგენისა და სპორტული სექციების დაფინანსების საკითხებით დაინტერესდნენ. ბათუმის შოთა რუსთაველის სახელმწიფო უნივერსიტეტის სტუდენტებთან შეხვედრა მთავრობის თავმჯდომარის არჩილ ხაბაძის ინიციატივით გაიმართა.

თბილისის ივანე ჯავახიშვილის სახელობის სახელმწიფო უნივერსიტეტის რექტორმა, აკადემიკოსმა, ვლადიმერ პაპავამ ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხა თემაზე: „საქართველოს ეკონომიკის ძირითადი გამოწვევები და განვითარების პერსპექტივები“. მომხსენებელმა სტუდენტებსა და პროფესორ-მასწავლებლებს ქვეყნის ეკონომიკის განვითარების შესაძლებლობები და პოტენციალი გააცნო. საუბრისას ყურადღება გაამახვილა ასევე არსებულ პრობლემებზე, მათი მოგვარების გზებსა და ასოცირების ხელშეკრულებით გათვალისწინებულ ვალდებულებებზე. საჯარო ლექციის დასასრულს აკადემიკოსმა ვლადიმერ პაპავამ შეკითხვებს უპასუხა.

ბათუმის შოთა რუსთაველის სახელმწიფო უნივერსიტეტში I საერთაშორისო სამეცნიერო-პრაქტიკული კონფერენცია „თანამედროვე მენეჯმენტის თეორია და პრაქტიკა“ გაიხსნა. ასზე მეტი ქართველი, რუსი, უკრაინელი, პოლონელი, აზერბაიჯანელი, ლიტველი, ყაზახი მკვლევარი და ექსპერტი მოხსენებას წარმოადგენს მენეჯმენტის თეორიისა და პრაქტიკის აქტუალურ პრობლემებზე. მომხსენებლები განიხილავენ უახლეს მიღწევებს ორგანიზაციის მენეჯმენტის, სტრატეგიული მენეჯმენტისა და კორპორაციული მართვის, პროექტების და ადამიანური რესურსების მენეჯმენტის, ინოვაციების მენეჯმენტისა და ცვლილებათა მართვის მიმართულებით. ორდღიანი კონფერენცია უნივერსიტეტის ეკონომიკისა და ბიზნესის ფაკულტეტის, სოხუმის სახელმწიფო უნივერსიტეტისა და არასამთავრობო ორგანიზაციის „ლიდერთა კლუბის“ ორგანიზებით იმართება.

ბათუმის შოთა რუსთაველის სახელმწიფო უნივერსიტეტის იურიდიულ, ეკონომიკისა და ბიზნესისა და სოციალურ და პოლიტიკურ მეცნიერებათა ფაკულტეტებსა და „ა(ა)იპ შეზღუდული შესაძლებლობების მქონე პირთა უფლებებისათვის“ შორის მემორანდუმი გაფორმდა. ხელშეკრულება ითვალისწინებს შშმ პირთა განვითარების ხელშეწყობას, სემინარების ჩატარებას, ერთობლივი პროგრამების დაგეგმვასა და განხორციელებას. ღონისძიების ფარგლებში ორგანიზაციის თავმჯდომარემ თამაზ მჟავანაძემ ახალი პროექტი - „სტუდენტთა სამართლებრივი და ფსიქოლოგიური პრაქტიკული სწავლების ხელშეწყობისათვის“ წარადგინა.