გამოცხადდა პროექტის „აჭარის რეგიონში პრაქტიკული სამართლის და კონსტიტუციური მართლმსაჯულების (ადამიანის უფლებების მიმართულებით) სწავლების ხელშეწყობა“ მონაწილეთა შესარჩევი კონკურსი. კონკურში მონაწილეობის მიღება შეუძლიათ იურიდიული და სოციალურ მეცნიერებათა ფაკულტეტის სამართალმცოდნეობის პროგრამის მეოთხე კურსის აქტიური სტატუსის მქონე სტუდენტს.
ბათუმის შოთა რუსთაველის სახელმწიფო უნივერსიტეტში „ერასმუს+“-ის ინსტიტუციური განვითარების პროექტის „ფსიქოლოგიური კონსულტაციის ცენტრების შექმნა სტუდენტებისთვის საქართველოს უმაღლეს საგანმანათლებლო დაწესებულებებში“ ფარგლებში, თანამედროვე ტექნიკით აღჭურვილი ფსიქოლოგიური კონსულტაციის ცენტრი გაიხსნა. ცენტრში ბსუ-ს პროფესორ-მასწავლებლები სტუდენტებს ფსიქოლოგიურ დახმარებას გაუწევენ, რომლებიც იმუშავებენ საერთაშორისო ექსპერტთა გუნდთან და ერთობლივად შეიმუშავებენ რეკომენდაციებს. ცენტრში მომუშავე ფსიქოლოგების გუნდს ბსუ-ს ასოცირებული პროფესორი ქეთევან ბერიძე უხელმძღვანელებს.
ბსუ-ს იურიდიული და სოციალურ მეცნიერებათა ფაკულტეტის ფსიქოლოგიის დეპარტამენტის ორგანიზებით, სოციალური ფსიქოლოგიისა (ხელმძღვანელი, ასისტენტ პროფესორი გურანდა შამილიშვილი) და განვითარების ფსიქოლოგიის (ხელმძღვანელი, ასისტენტი ეთერ ვარშანიძე) სასწავლო კურსების ფარგლებში, გაიმართა საინფორმაციო შეხვედრა თემაზე: „საქართველოს ევროატლანტიკური ინტეგრაციის პროცესის დინამიკა, მნიშვნელობა, პერსპექტივები და ფსიქოლოგიური კულტურა’’. შეხვედრას უძღვებოდა საქართველოს საგარეო საქმეთა სამინისტროს ნატოსა და ევროკავშირის შესახებ საინფორმაციო ცენტრის რეგიონული წარმომადგენელი აჭარაში ირმა გაბინაშვილი. ღონისძიების ფარგლებში, გაიმართა დისკუსია, სადაც ფსიქოლოგიის მიმართულების სტუდენტებმა იმსჯელეს ინტეგრაციის ტენდენციებზე, ევროკავშირის ღირებულებებსა და მენტალურ ცნობიერებაზე.
ბსუ-ს იურიდიული და სოციალურ მეცნიერებათა ფაკულტეტის იურიდიული კლინიკის ორგანიზებით საჯარო შეხვედრა გაიმართა ბათუმის მე-20 საჯარო სკოლის სამოქალაქო განათლების კლუბი „ბალავარის’’ (ხელმძღვანელი - მასწავლებელი თამრიკო გორგილაძე) წევრებთან და ამავე სკოლის 8-ე 9-ე 10-ე კლასის მოსწავლეებთან თემაზე „ნაადრევი ქორწინება საქართველოში, გამოწვევები და მისი გადაჭრის გზები’’. იურიდიული კლინიკის წარჩინებულმა სტუდენტებმა: დიანა ხახუტაიშვილმა, სალომე დავითაძემ, მეგი შანთაძემ, ნინო კონცელიძემ და ქეთი ღლონტმა პრეზენტაციები წარადგინეს ნაადრევი ქორწინების მიზეზების, შედეგების, შიდა ეროვნული და საერთაშორისო კანონმდებლობის აღნიშნული მიმართულების საკითხებზე.
ბსუ-ს იურიდიული და სოციალურ მეცნიერებათა ფაკულტეტის იურიდიულ კლინიკის ორგანიზებით საინფორმაციო შეხვედრა გაიმართა მინდია აბაშიძის სახელობის ხელვაჩაურის მუნიციპალიტეტის სოფელ თხილნარის 1-ლი საჯარო სკოლის (მასწავლებელი ელენე ბათაძე) მოსწავლეებთან და ამავე სკოლის სამოქალაქო კლუბის წევრებთან. კლინიკის ხელძღვანელმა ნარგიზ ცეცხლაძემ მოსწავლეებს გააცნო იურიდიული კლინიკის მუშაობის სპეციფიკა, საუბრისას ყურადღება გაამახვილა კლინიკის საქმიანობის იმ ნაწილზე, რომელიც ეხება უფასო სამართლებრივი დახმარების გაწევას (იურიდიული კონსულტაცია, სამართლებრივი დოკუმენტაციის შედგენა და სხვა.) სოციალურად დაუცველი ფენისა და სხვა მოქალაქეებისადმი.
