ახალი ამბები

განათლების ხარისხის განვითარების ეროვნულმა ცენტრმა თანამშრომლობის მემორანდუმი გააფორმა ბათუმის შოთა რუსთაველის სახელმწიფო უნივერსიტეტთან, ივანე ჯავახიშვილის სახელობის თბილისის სახელმწიფო უნივერსიტეტთან და აკაკი წერეთლის სახელმწიფო უნივერსიტეტთან. ხელშეკრულების მიზანია, ევროკავშირის დაფინანსებული საჯარო სამსახურების დაძმობილების (TWINNING) პროექტის ხელშეწყობით კლასტერული აკრედიტაციის პროცედურების პილოტირება, რომლის ფარგლებშიც განხორციელდება განმავითარებელი შეფასება ჰუმანიტარული მეცნიერებების სფეროს საბაკალავრო, სამაგისტრო და სადოქტორო საფეხურების პროგრამებზე.

ბათუმის შოთა რუსთაველის სახელმწიფო უნივერსიტეტს, ორგანიზაცია ეგერია სოლუშენსსა და კონრად ადენაუერის ფონდს შორის თანამშრომლობის მემორანდუმი გაფორმდა. დოკუმენტი ითვალისწინებს პროექტის „ახალგაზრდების ცნობიერების ამაღლება ევროპული ინტეგრაციის შესახებ - გამოწვევები და პერსპექტივები“ ფარგლებში, ერთობლივი საგანმანათლებლო პროექტების განხორციელებას. მომზადდება ერთსემესტრიანი სასწავლო კურსი საქართველოს ევროპული ინტეგრაციის საკითხებზე არაპროფილური ფაკულტეტების სტუდენტებისთვის და დაინერგება ბსუ-ში. პროექტს ადენაუერის ფონდის მხარდაჭერით ეგერია სოლუშენსი ახორციელებს და მისი მიზანია ახალგაზრდების ცნობიერების ამაღლება საქართველოს ევროპული ინტეგრაციის პროცესზე, მასთან დაკავშირებულ გამოწვევებსა და პერსპექტივებზე.

ბათუმის შოთა რუსთაველის სახელმწიფო უნივერსიტეტში გაეროს ბავშვთა ფონდის (UNICEF) ორგანიზებით ბავშვთა უფლებების ცენტრი გაიხსნა და თანამშრომლობის მემორანდუმი გაფორმდა. დოკუმენტს ხელი მოაწერეს ბსუ-ს რექტორმა მერაბ ხალვაშმა და საქართველოში გაეროს ბავშვთა ფონდის წარმომადგენელმა ღასან ხალილმა. ბავშვთა უფლებების ცენტრის დაფუძნებას ესწრებოდნენ: ესტონეთის ელჩი რიინა კალიურანდი, ნორვეგიის ელჩი ჰელენე სანდ ანდერსენი, საქართველოს განათლებისა და მეცნიერების მინისტრის პირველი მოადგილე ეკა დგებუაძე, აჭარის ა.რ განათლების, კულტურისა და სპორტის მინისტრი მაია ხაჯიშვილი და აჭარის ა.რ. უმაღლესი საბჭოს ადამიანის უფლებათა დაცვის საკითხთა კომიტეტის თავმჯდომარე ცოტნე ანანიძე. ცენტრის მიზანია ბავშვთა უფლებების კულტურის გაძლიერება, ბავშვთა უფლებების რეალიზების ხელშეწყობა და დაცვა.

ბათუმის შოთა რუსთაველის სახელმწიფო უნივერსიტეტის რექტორს მერაბ ხალვაშს ფრანგული ინსტიტუტის დირექტორი პიერ კლუე შეხვდა. ფრანკოფონიის დღეების ფარგლებში გამართულ შეხვედრაზე მხარეებმა სამომავლო თანამშრომლობის მიმართულებები და პრიორიტეტები განსაზღვრეს. დაიგეგმა ერთობლივი კულტურულ-საგანმანათლებლო პროექტების და გაცვლითი პროგრამების განხორციელება, ფრანკოფონიის საუნივერსიტეტო სააგენტოსა (AUF) და ფრანგულ-ქართულ უნივერსიტეტთან თანამშრომლობის გაღრმავება.

ბათუმის სახელმწიფო უნივერსიტეტის ჰუმანიტარულ მეცნიერებათა ფაკულტეტის ისტორიის, არქეოლოგიისა და ეთნოლოგიის დეპარტამენტის ორგანიზებით საქართველოს ოკუპაციისა და ბათუმში, 100 წლის წინ, 1921 წლის 17-20 მარტს განვითარებული მოვლენებისადმი მიძღვნილი კონფერენცია გაიმართა. სესიაზე სხვადასხვა უნივერსიტეტის პროფესორ-მასწავლებლებმა განიხილეს რუსეთ-საქართველოს 1921 წლის თებერვალ-მარტის ომის, საქართველოს დამფუძნებელი კრების ბოლო სხდომისა და ბათუმის დასაცავად გამართული ბრძოლის საკითხები. კონფერენციის მონაწილეებმა გაიხსენეს დიდი მამულიშვილი, გენერალი გიორგი მაზნიაშვილი და ის გმირები, რომლებიც ბათუმის დასაცავად იბრძოდნენ.