ახალი ამბები

ტემპუსის პროექტის ,,სტუდენტთა კარიერული მომსახურების დანერგვა საქართველოში CASEDE“ ეგიდით ბათუმის შოთა რუსთაველის სახელმწიფო უნივერსიტეტში სემინარი გაიმართა. ორი დღის განმავლობაში პროექტის პარტნიორი უნივერსიტეტების წარმომადგენლები ინგლისელ, უნგრელ და ლიტველ ექსპერტებთან ერთად, სტუდენტთა კარიერული განვითარების აქტუალურ საკითხებზე მუშაობდნენ. შეხვედრაზე პროექტის მონაწილეები სტუდენტთა კარიერული განვითარების სერვისის ევროპულ მოდელებს გაეცნენ. ასევე იმსჯელეს ქართულ სინამდვილესთან ადაპტირების გზებსა და განვითარების სტრატეგიაზე. სემინარის მუშაობის შედეგები სტუდენტთა კარიერული განვითარების სერვისის გაიდლაინში აისახება.

ბათუმის შოთა რუსთაველის სახელმწიფო უნივერსიტეტმა მეთორმეტე კლასის მოსწავლეებისა და აბიტურიენტებისათვის ილია ჭავჭავაძის სახელობის ბათუმის სახელმწიფო დრამატულ თეატრში ღია კარის დღე გამართა. უმაღლესი საგანმანათლებლო დაწესებულების რექტორმა, პროფესორმა ალიოშა ბაკურიძემ ახალგაზრდებს სწავლების პირობები, საგანმანათლებლო პროგრამები, სტიპენდიები, გაცვლითი პროგრამები და სიახლეები გააცნო. აჭარის ა.რ. უმაღლესი საბჭოს განათლების, მეცნიერების, კულტურისა და სპორტის საკითხთა კომისიის თავმჯდომარემ, ბსუ-ს პროფესორმა გიორგი მასალკინმა და ქალაქ ბათუმის მერის მოვალეობის შემსრულებელმა გიორგი ერმაკოვმა აბიტურიენტებს უნივერსიტეტი წარუდგინეს და წარმატებები უსურვეს. 2014-2015 სასწავლო წელს ბსუ-ში 1220 პირველკურსელი ჩაირიცხება. 40-მდე საბაკალავრო საგანმანათლებლო პროგრამიდან რამდენიმე სრული სახელმწიფო დაფინანსებით განხორციელდება. ევროკომისიის მიერ დაფინანსებული საერთაშორისო გაცვლითი პროექტებისა და პროგრამების მიხედვით - Tempus, Erasmus mundus, ბათუმის შოთა რუსთაველის სახელმწიფო უნივერსიტეტი საქართველოს უმაღლეს საგანმანათლებლო დაწესებულებებს შორის მესამე ადგილზეა

საქართველოს უმაღლესი საგანმანათლებლო დაწესებულებების 2014 წლის სტუდენტური ლიგის თამაშები ფუტსალში განახლდა. უმაღლეს ლიგაში მოასპარეზე ბათუმის შოთა რუსთაველის სახელმწიფო უნივერსიტეტისა და შავი ზღვის უნივერსიტეტის გუნდების შეხვედრა ბათუმელების გამარჯვებით, ანგარიშით 10:5 დასრულდა. ბსუ-ს ფუტსალის ნაკრები შემდეგ თამაშს 14 მარტს, სპორტკომპლექს „არენა-2“-ის დარბაზში გამართავს და ილიაუნის გუნდს დაუპირისპირდება. უმაღლეს ლიგაში პირველობისათვის 12 ნაკრები იბრძოლებს და გამარჯვებული 19 მაისს გამოვლინდება. ჩემპიონატი საქართველოს საუნივერსიტეტო სპორტის ფედერაციის, საქართველოს ფუტსალის ასოციაციის, საქართველოს სპორტისა და ახალგაზრდობის საქმეთა სამინისტროს ორგანიზებითა და კომპანია „ბილაინის“ მხარდაჭერით იმართება.

ბათუმის შოთა რუსთაველის სახელმწიფო უნივერსიტეტში პროექტ „აჭარის ახალგაზრდული უმაღლესი საბჭოს“ წარდგინება გაიმართა. პროექტს არასამთავრობო ორგანიზაცია „ახალგაზრდული უმაღლესი საბჭო“ ახორციელებს და მიზნად ისახავს ახალგაზრდების უნარ-ჩვევების განვითარებას, კომპეტენტური აზრის ფორმირებასა და ცნობიერების ამაღლების ხელშეწყობას საზოგადოებრივი თუ პოლიტიკური მნიშვნელობის საკითხებზე. აჭარის ავტონომიური რესპუბლიკის უმაღლესი საბჭოს მუშაობის პრინციპზე დაფუძნებული „აჭარის ახალგაზრდული უმაღლესი საბჭოს“ მუშაობაში ჩართული იქნება კონკურსის წესით შერჩეული 30 წევრი. ახალგაზრდებს შესაძლებლობა ექნებათ მონაწილეობა მიიღონ სამოქალაქო საზოგადოების განვითარების, ადვოკატირების, კონფლიქტების მართვის, დიპლომატიის, მოლაპარაკებების ხელოვნების, საჯაროდ სიტყვით გამოსვლის ხელოვნებასა და სხვა მნიშვნელოვან საკითხებზე ორიენტირებულ სასწავლო პროგრამაში.

საქართველოს ეკონომიკისა და მდგრადი განვითარების სამინისტროს აკრედიტაციის ცენტრის დირექტორმა პაატა გოგოლაძემ ევროინტეგრაციის ფარგლებში ბათუმის შოთა რუსთაველის სახელმწიფო უნივერსიტეტის სოციალურ მეცნიერებათა, ბიზნესისა და სამართალმცოდნეობის ფაკულტეტის სტუდენტებისათვის სემინარი ჩაატარა ვაჭრობის ტექნიკური ბარიერების საკითხზე. მომხსენებელმა ევროკავშირთან გაფორმებულ ასოცირების ხელშეკრულებასა და კავშირში საქართველოს ინტეგრაციის მიმდინარე პროცესები განიხილა. საუბრისას ყურადღება გაამახვილა ასევე ევროკავშირთან თავისუფალი ვაჭრობის პრობლემებსა და ამ მხრივ განსახორციელებელ საკანონმდებლო თუ ტექნიკურ რეფორმებზე.