ახალი ამბები

ბათუმის შოთა რუსთაველის სახელმწიფო უნივერსიტეტის, ქალაქ ბათუმის მერიისა და საქართველოს მეცნიერებათა ეროვნული აკადემიის აჭარის რეგიონალური სამეცნიერო ცენტრის ორგანიზებით, შოთა რუსთაველის დარბაზში ვანო პაპუნიძის წიგნის „გზა მარადისობისაკენ“ წარდგინება გაიმართა. ნაშრომში აღწერილია მეცნიერის, პედაგოგისა და საზოგადო მოღვაწის ვახტანგ პაპუნიძის ცხოვრება და მოღვაწეობა. ვახტანგ პაპუნიძე სამ ათეულ წელზე მეტი ხნის განმავლობაში მოღვაწეობდა სამეცნიერო და სახელმწიფო დაწესებულებებში, მნიშვნელოვანი წვლილი შეიტანა საქართველოში აგრო-ეკონომიკური მეცნიერებისა და აჭარის რეგიონის განვითარებაში. წიგნი „გზა მარადისობისაკენ“ საზოგადო მოღვაწის დაბადების 80 წლისთავს ეძღვნება.

განათლების აკადემიური დოქტორის, სრული პროფესორის, საქართველოს განათლების, მეცნიერებათა და ფაზისის აკადემიების აკადემიკოს აკაკი ზოიძის დაბადებიდან 70 წლისადმი მიძღვნილი საიუბილეო საღამო ჩატარდა ბათუმის შოთა რუსთაველის სახელმწიფო უნივერსიტეტში. რექტორმა, პროფესორმა ალიოშა ბაკურიძემ, პროფესორ-მასწავლებლებმა, კოლეგებმა და საზოგადოების წარმომადგენელმა იუბილარის მიღწევებზე ისაუბრეს და ღვაწლმოსილ პედაგოგს მნიშვნელოვანი დღე მიულოცეს. საიუბილეო საღამოს ფარგლებში სკოლა „ნიკეს“ მოსწავლეებმა ლიტერატურულ-თეატრალური წარმოდგენა „ვაჰ, დრონი, დრონი!“ გამართეს.

პროფესიული განვითარების ევროპული ცენტრის აღმასრულებელმა დირექტორმა ეთერ სანაიამ ბათუმის შოთა რუსთაველის სახლემწიფო უნივერსიტეტში გაცვლითი პროგრამები წარადგინა. შეხვედრას რექტორი, პროფესორი ალიოშა ბაკურიძე, აჭარის ა.რ. განათლების, კულტურისა და სპორტის მინისტრი გიორგი თავამაიშვილი, პროფესორ-მასწავლებლები და სტუდენტები ესწრებოდნენ. ცენტრის წარმომადგენელმა ევროპის ქვეყნებში განათლების მიღების, სტაჟირებისა და მოკლევადიან ტრენინგებში მონაწილეობის შესაძლებლობებზე ისაუბრა. ევროპული ცენტრი საერთაშორისო ორგანიზაციაა, რომელიც განათლების ხარისხის ამაღლების მიზნით, ინოვაციურ, თანამედროვე სტანდარტებზე მორგებულ სასწავლო და გაცვლით პროგრამებს ახორციელებს.

საერთაშორისო ურთიერთობებისა და სამართალმცოდნეობის სპეციალობების სტუდენტებისათვის, მშვიდობის კორპუსის მოხალისეებმა ჯონ რაიტმა და ადამ მალინოვსკიმ ბსუ-ს ასისტენტ-პროფესორ არმაზ კახიძესთან ერთად ლექცია წაიკითხეს თემაზე: „კონსტიტუცია და ხელისუფლების ორგანიზების პრინციპები აშშ-ში“. მათ თარჯიმნობას ამერიკის გაცვლითი პროგრამის მოხალისე ლია ფუტკარაძე უწევდა. მომხსენებლებმა ლექციებზე განიხილეს აშშ-ში სახელმწიფო ხელისუფლების ორგანიზების კონსტიტუციური პრინციპები, ხელისუფლების სტრუქტურა და ხელისუფლების შტოებს შორის ურთიერთკონტროლისა და გაწონასწორების სისტემა. მომხსენებლებმა სტუდენტებს გააცნეს თუ როგორ ხდება აშშ-ში პოლიტიკური გადაწყვეტილებების ფორმირება და მიღება, საზოგადოებრივი ინტერესების უზრუნველყოფა გადაწყვეტილებების მიღების პროცესში, როგორია ძალაუფლების უზურპაციის თავიდან აცილების კონსტიტუციური პროცედურები.

საქართველოს განათლებისა და მეცნიერების სამინიტროს მხარდაჭერით ათასწლეულის გამოწვევის ფონდი - საქართველოს წარმომადგენლებმა და "ათასწლეულის გამოწვევის კორპორაციის" (MCC) ამერიკელმა კონსულტანტებმა საინფორმაციო შეხვედრა გამართეს. ამერიკის შეერთებული შტატების “ათასწლეულის გამოწვევის კორპორაციასთან” (Millenium Challenge Corpiration MCC) თანამშრომლობის მეორე კომპაქტის (გრანტის) ფარგლებში, საქართველოს განათლების სისტემის განვითარების ხელშეწყობისთვის იგეგმება 140 მილიონი აშშ დოლარის გამოყოფა. პროგრამის ერთ-ერთ კომპონენტს წარმოადგენს პროფესიული განათლების სექტორის ხელშეწყობა, რომლისთვისაც 15 მილიონი აშშ დოლარია განსაზღვრული. განათლებისა და მეცნიერების სამინისტროს პროფესიული განათლების განვითარების დეპარტამენტის წარმომადგენელმა, ანა მჭედლიშვილმა, უმაღლესი განათლების პროექტის დირექტორმა, ნოდარ სურგულაძემ, აშშ-ის MCC კონსულტანტებმა მარსელ რიკუმ და ენტონი ტირელმა უნივერისიტეტის პროფესორ-მასწავლებლებს კონკურსში მონაწილეობის პირობები გააცნეს