ახალი ამბები

გოეთეს ინსტიტუტისა და შოთა რუსთაველის სახელმწიფო უნივერსიტეტის განათლებისა და მეცნიერებათა ფაკულტეტის ევროპეისტიკის დეპარტამენტის ორგანიზებით ფოტოგამოფენა “Musik+X" გაიხსნა. ფოტოგამოფენა მუსიკალურ ჟანრებს: პოპს, ჰიპ-ჰოპს, ინდისა და ტექნოს ეძღვნება. 17 პლაკატზე ასახულია თანამედროვე გერმანული მუსიკის გავლენა ახალგაზრდობაზე. ექსპოზიციას კულტურულ-საგანმანათლებლო დანიშნულება აქვს, რომლის ფარგლებშიც გამოფენის ორგანიზატორები რსუ-ს სტუდენტებისა და საჯარო სკოლის მოსწავლეებისათვის ორი კვირის განმავლობაში თანამედროვე გერმანული მუსიკის თემაზე სემინარებს ჩაატარებენ.

შოთა რუსთაველის სახელმწიფო უნივერსიტეტს სამდღიანი, საპასუხო ვიზიტით გერმანიის ბრანდენბურგის ფედერალური მიწის დელეგაცია ეწვია. ვიზიტი ორ ქვეყანას შორის თანამშრომლობის გაღრმავებასა და ერთობლივი პროექტების განხორციელებას ითვალისწინებს. რსუ-ს რექტორმა, პროფესორმა ალიოშა ბაკურიძემ და ებერსვალდეს მდგრადი განვითარების უმაღლესი სასწავლებლის პრეზიდენტმა, პროფესორმა ვილჰელმ-გიუნტერ ვარსონმა ხელი მოაწერეს თანამშრომლობის მემორანდუმს. ხელშეკრულების თანახმად განხორციელდება პროფესორ-მასწავლებლების, მკვლევრების, ბაკალავრებისა და მაგისტრების ერთობლივი გაცვლითი პროგრამები, ჩატარდება ერთობლივი კონფერეცნიები და სემინარები. მხარეები ასევე სასწავლო, სამეცნიერო და მეთოდოლოგიური ლიტერატურის ურთიერთგაცვლაზე, საგანმანათლებლო და კვლევითი მენეჯმენტის გამოცდილების გაზიარებასა და ბიბლიოთეკის ონლაინ-რეჟიმში გამოყენებაზე შეთანხმდნენ.

შოთა რუსთაველის სახელმწიფო უნივერსიტეტის მცირე საკონფერენციო დარბაზში გივი ნახუცრიშვილის დოკუმენტური ფილმის - „მერისული ჩანახატები“ წარდგინება გაიმართა. დოკუმენტური ფილმი ეთნოგრაფიული ხასიათისაა და მასში ასახულია ქედის რაიონის სოფელ მერისის ისტორია, კულტურა, ყოფა-ცხოვრება და ტრადიციები. „მერისული ჩანახატები“ შემოქმედებითმა ჯგუფმა რსუ-ს სამეცნიერო ცენტრის ნიკო ბერძენიშვილის ჰუმანიტარულ-სოციალური მიმართულებისა და სტუდენტური თვითმმართველობის ხელშეწყობით გადაიღო.

საქართველოს საუნივერსიტეტო სპორტის ფედერაცია საქართველოს სპორტისა და ახალგაზრდობის სამინისტროსთან ერთად 3 მაისიდან 10 ივნისის ჩათვლით “უნივერსიადა – 2011”–ს ატარებს. სტუდენტურ შეჯიბრში შოთა რუსთაველის სახელმწიფო უნივერსიტეტის ოცდაათი სტუდენტი მონაწილეობს. ახალგაზრდები შესაძლებლობებს სპორტის ათ სახეობაში წარმოაჩენენ. ესენია: მაგიდის ჩოგბურთი, ბერძნულ–რომაული ჭიდაობა, თავისუფალი ჭიდაობა, ძიუდო, ქართული ჭიდაობა, კრივი, ქუჩის კალათბურთი (სტრიტბოლი), მძლეოსნობა, ჭადრაკი, მკლავჭიდი. 8 მაისს გამართულ მაგიდის ჩოგბურთის შეჯიბრში რსუ-ს გოგონათა გუნდის წევრებმა ნონა მარქარიანმა და მაია ბარამიძემ II-III საპრიზო ადგილები დაიკავეს და თასითა და დიპლომებით დაჯილდოვდნენ. „უნივერსიადა - 2011“ -ის შედეგების მიხედვით სპორტის 20-მდე სახეობაში საქართველოს სტუდენტური ნაკრები გუნდები შეირჩევა, რომლებიც 12–25 აგვისტოს ჩინეთის მსოფლიო უნივერსიადაში მიიღებენ მონაწილეობას.

აზერბაიჯანის რესპუბლიკის გენერალური საკონსულოს ინიციატივით შოთა რუსთაველის სახელმწიფო უნივერსიტეტში აზერბაიჯანის დღე აღინიშნა. აზერბაიჯანის საერთო ეროვნული ლიდერის ჰეიდარ ალიევის დაბადების 88 წლისა და აზერბაიჯანის რესპუბლიკის სახელმწიფო დამოუკიდებლობის 20 წლისადმი მიძღვნილ ღონისძიებას აჭარის ავტონომიური რესპუბლიკის თავმჯდომარე ლევან ვარშალომიძე, ქალაქ ბათუმის მერი რობერტ ჩხაიძე, აჭარის განათლებისა და კულტურის მინისტრი გია აბულაძე, აჭარის სოფლის მეურნეობის მინისტრი დონარი სურმანიძე, დიპლომატიური კორპუსის წარმომადგენლები, პროფესორ-მასწავლებლები და სტუდენტები ესწრებოდნენ. აზერბაიჯანის დღე უნივერსიტეტის რექტორმა, პროფესორმა ალიოშა ბაკურიძემ გახსნა. აზერბაიჯანის რესპუბლიკის გენერალურმა კონსულმა ბათუმში ჰუსეინ ნაჯაფოვმა მოხსენება წაიკითხა თემაზე: „აზერბაიჯანი: ისტორია და თანამედროვეობა“ და ორ ქვეყანას შორის არსებულ მეგობრულ ურთიერთობებზე გაამახვილა ყურადღება.