დავით აღმაშენებლის ხსენების დღისადმი მიძღვნილი ინტელექტუალური თამაში ჩატარდა ბათუმის შოთა რუსთაველის სახელმწიფო უნივერსიტეტში. ღონისძიებაში ქალაქ ბათუმის ოცდათორმეტი საჯარო და კერძო სკოლის 130-ზე მეტი მოსწავლე მონაწილეობდა. კომპეტენტური ჟიურის შეფასებით, პირველი ადგილი მეთხუთმეტე საჯარო სკოლის გუნდმა „გლადიატორმა“ დაიკავა, მეორე ადგილი პირველი სკოლის გუნდმა „პირველებმა“ მოიპოვა და მესამე ადგილი მეშვიდე სკოლის გუნდ „პეტრას“ ერგო. ინტელექტუალური თამაშის მონაწილე ყველა ნაკრებს სერტიფიკატები გადაეცა, ხოლო სამ საკუთესო გუნდს სამახსოვრო საჩუქრები და ერთდღიანი ისტორიული შემეცნებითი ტური ქუთაისში.

ბათუმის შოთა რუსთაველის სახელმწიფო უნივერსიტეტის სტუდენტთა სამეცნიერო ცენტრის, სტუდენტთა მხარდაჭერისა და მომსახურების სამსახურის, ისტორიის, არქეოლოგიის და ეთნოლოგიის დეპარტამენტის ერთობლივი პროექტის „მოგზაურობა საქართველოს ისტორიულ რუკაზე“ ეგიდით, შალვა რადიანის სახელობის ეთნოგრაფიულ მუზეუმში კონფერენცია გაიმართა. სამეცნიერო სესიაზე უნივერსიტეტის ბაკალავრიატისა და დოქტორანტურის საგანმანათლებლო საფეხურის სტუდენტებმა და პროფესორ-მასწავლებლებმა მოხსენებები წარმოადგინეს გურია-აჭარის ისტორიულ ურთიერთობებზე. კონფერენციის მონაწილეებმა ასევე გაიხსენეს ფილოლოგიის მეცნიერებათა დოქტორი, კრიტიკოსი, ლიტერატურათმცოდნე, პროფესორი შალვა რადიანი.

ბათუმის შოთა რუსთაველის სახელმწიფო უნივერსიტეტის ისტორიის, არქეოლოგიის და ეთნოლოგიის დეპარტამენტის, სტუდენტთა მხარდაჭერის და მომსახურების სამსახურისა და სტუდენტთა სამეცნიერო ცენტრის ერთობლივი პროექტის „მოგზაურობა საქართველოს ისტორიულ რუკაზე“ ფარგლებში, ზენდიდის ციხის ნანგრევებთან ციალა ბეჟანიძის წიგნის „ზენდიდის ციხე“ წარდგინება ჩატარდა. წიგნი ბეჟანიძეთა გვარსა და მათ საგვარეულო ციხეს ეძღვნება. ისტორიულ წყაროებსა და დოკუმენტებზე დაყრდნობით ნაშრომში აღწერილია გვარის ისტორია, ეტიმოლოგია და აჭარის ერისთავ-ერისთავი აბუსერიძეების საგვარეულო.

ბათუმის შოთა რუსთაველის სახელმწიფო უნივერსიტეტის სტუდენტებმა „სტუდენტური ფესტივალი - 2014“-ში მიიღეს მონაწილეობა. ახალგაზრდებმა საკუთარი შესაძლებლობები სამეცნიერო, შემეცნებით და კულტურულ ღონისძიებებში წარმოაჩინეს. ბათუმის საზაფხულო თეატრის სცენაზე საქართველოს სხვადასხვა უნვერსიტეტის შემოქმედებით ჯგუფებთან ერთად, ბსუ-ს ქორეოგრაფიული ანსამბლი ,,ტბეთი“ და გოგონათა ფოლკლორული ანსამბლი წარსდგა. ბათუმის ხელოვნების სასწავლო უნივერსიტეტში გამართულ ფილმების ჩვენებაზე სტუდენტთა ჯგუფის ფილმის პრემიერა შედგა თემაზე: „the pickupers“. დემოკრატიული ჩართულობის ცენტრში (USAID) ფესტივალის ეგიდითა და ბსუ-ს სტუდენტთა სამეცნიერო ცენტრის ორგანიზებით კონფერენცია ჩატარდა აქტუალურ შემდეგ საკითხებზე: „ტრანსპორტის და ატმოსფერული ჰაერის მდგომარეობა საქართველოში“, „სურსათის უვნებლობის კონტროლი საქართველოში“, „წვენების ნატურალობის განსაზღვრა“ და „ხმაურით დაბინძურება“.

ბათუმის შოთა რუსთაველის სახელმწიფო უნივერსიტეტის სტუდენტთა სამეცნიერო კონფერენციისა და რეფერატულ ნაშრომთა კონკურსის მონაწილე სტუდენტები დააჯილდოეს. უმაღლესი საგანმანათლებლო დაწესებულების რექტორმა, პროფესორმა ალიოშა ბაკურიძემ, ადმინისტრაციის ხელმძღვანელმა ედიშერ ჩავლეიშვილმა და სასწავლო პროგრამების მართვის დეპარტამენტის ხელმძღვანელმა ანზორ ბერიძემ გამარჯვებულ სტუდენტებს წარმატებები უსურვეს და სერტიფიკატები გადასცეს. კონფერენციაზე 300-მდე სტუდენტის მოხსენება იყო წარდგენილი, რომელთაგან საუკეთესო ნაშრომები სტუდენტთა სამეცნიერო შრომათა კრებულში დაიბეჭდება. რექტორის ინიციატივით, მომავალ წელს ბსუ სტუდენტთა რესპუბლიკურ სამეცნიერო კონფერენციას უმასპინძლებს. სამეცნიერო სესია სტუდენტთა სამეცნიერო ცენტრის ორგანიზებით ჩატარდა.