ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის სტუდენტები შემოსავლების სამსახურის საგანმანათლებლო სემინარის განმეორებით გასვლით ტურში მონაწილეობდნენ. სტუდენტები (პირველი ჯგუფი - ხელმძღვანელი: პროფესორი ვაჟა ვერულიძე) „ბათუმის აეროპორტსა“ და შემოსავლების სამსახურის ბათუმის სერვისცენტრს ეწვივნენ და დეტალური ინფორმაცია მიიღეს საჰაერო საზღვრის კვეთის სპეციფიკისა და სერვისცენტრის მიერ დანერგილი მომსახურების შესახებ.
2016 წლის 8-10 ივნისს, ეკონომიკისა და ბიზნესის ფაკულტეტის „მენეჯმენტის“ სპეციალობის II კურსის სტუდენტებმა (ლ.ფუტკარაძე, თ.ჭაღალიძე, თ.რომანაძე, თ.ცეცხლაძე, თ. ვარშანიძე, დ.გვიანიძე, მ.ბოლქვაძე, ტ.ალიევი) შეიმუშავეს და განახორციელეს სოციალური პროექტები - „გაიგე მეტი შშმ პირთა შესახებ“ და „დრო მიდის, კადრები კი რჩება’’.
პროექტი - „გაიგე მეტი შშმ პირთა შესახებ“ მიზნად ისახავდა სკოლის მოსწავლეების ინფორმირებულობას შშმ პირთა უფლებებისა შესახებ და მათი სოციალური პასუხისმგებლობის გაზრდას, ხოლო პროექტის -„დრო მიდის, კადრები კი რჩება’’ მიზანი ხანდაზმულებისათვის ერთი დღის გალამაზება და საზოგადოების მხრიდან თანადგომის გამოხატვა იყო.
სტუდენტთა სოციალური პროექტები სასწავლო კურსის - „პროექტების მართვის“ ფარგლებში შემუშავდა და სტუდენტთა პრაქტიკული უნარ-ჩვევების გამომუშავებას ემსახურებოდა.
6-8 ივნისს, ბათუმის შოთა რუსთაველის სახელმწიფო უნივერსიტეტში ბიალისტოკის (პოლონეთი) ტექნოლოგიური უნივერსიტეტის პროფესორის ევა სადოვსკას საჯარო ლექცია გაიმართა. ღონისძიება ეკონომიკისა და ბიზნესის ფაკულტეტზე ჩატარდა და ის ევროკავშირში შრომის ბაზარზე არსებულ მდგომარეობას, პროფესიული უმოქმედების პრობლემებს და ევროკავშირის დასაქმების პოლიტიკას შეეხებოდა.
ევა სადოვსკას ვიზიტის ფარგლებში შეხვედრა გაიმართა ეკონომიკისა და ბიზნესის ფაკულტეტის დეკანთან ვლადიმერ ღლონტთან, დეკანის მოადგილეებთან და აკადემიურ პერსონალთან.
ევროკავშირის Tempus-ის პროექტის: “ინტერნაციონალიზაციისათვის ხელშეწყობა უმაღლეს სასწავლო დაწესებულებებში მეზობელ აღმოსავლეთის ქვეყნებში, კულტურული და სტრუქტურული ცვლილებების გზით PICASA“-ის ფარგლებში, ბათუმის შოთა რუსთაველის სახელმწიფო უნივერსიტეტში სამდღიანი სემინარი ჩატარდა. პროექტის სამუშაო ჯგუფმა უმაღლესი საგანმანათლებლო დაწესებულების პროფესორ-მასწავლებლებს უნივერსიტეტში ინტერნაციონალიზაციის ელემენტების განვითარების, კურიკულუმის, სტუდენტთა გაცვლისა და საზღვარგარეთის უნივერსიტეტებთან თანამშრომლობის ამოქმედების საკითხები გააცნო. საერთაშორისო პროექტის მიზანია ხელი შეუწყოს ინტერ-კულტურულ და საერთაშორისო პერსპექტივებს, ინიციატივებს და მათი ხარისხის უზრუნველყოფას.
18-19 მაისს, უკრაინაში, ჩერნიგოვის ეროვნულ ტექნოლოგიურ უნივერსიტეტში, ბსუ-ს ეკონომიკისა და ბიზნესის ფაკულტეტის ეკონომიკის სპეციალობის მე-3 კურსის სტუდენტებმა ანა ახვლედიანმა, თათია ზაქარაძემ და დავით კონცელიძემ (მეცნიერ-ხელმძღვანელი, ასოცირებული პროფესორი - ბადრი გეჩბაია) სტუდენტთა და ახალგაზრდა მეცნიერთა ყოველწლიურ სამეცნიერო კონფერენციაში მიიღეს მონაწილეობა. კონფერენცია თემაზე -“ახალგაზრდული მეცნიერება - 2016: საზოგადოების განვითარების სოციალურ-ეკონომიკური და ჰუმანიტარული ასპექტები“ უმაღლეს საგანმანათლებლო დაწესებულებებს შორის გაფორმებული მემორანდუმის ფარგლებში ჩატარდა .
კონფერენციის დასასრულს, მონაწილეებს საპატიო სიგელები და სერტიფიკატები გადაეცათ.
