ბსუ-ს იურიდიული და სოციალურ მეცნიერებათა ფაკულტეტი USAID სამართლის უზენაესობის პროგრამის მხარდაჭერით, ახორციელებს პროექტს „აჭარის რეგიონში პრაქტიკული სამართლის და კონსტიტუციური მართლმსაჯულების სწავლების ხელშეწყობა“. პროექტის ფარგლებში, სამართალმცოდნეობის პროგრამაზე დაინერგა პრაქტიკული სამართლის და კონსტიტუციური მართლმსაჯულების კლინიკური სწავლება. სამართალმცოდნეობის პროგრამის IV კურსის სტუდენტებმა პრაქტიკული სამართლის კლინიკის კოორდინატორის, ცირა კომახიძის ორგანიზებით ხელვაჩაურის მუნიციპალიტეტის ერგეს, ფერიის, ხელვაჩაურის N1 და ილია ჭავჭავაძის სახელობის ქობულეთის N2 საჯარო სკოლებში X-XI კლასის მოსწავლეებისთვის ჩაატარეს სამართლებრივი გაკვეთილები.

პოლიტიკის მეცნიერების დოქტორს, პარის ლოდრონის ზალცბურგის უნივერსიტეტის მეცნიერ-მკვლევარს, ფრანც კოკს ბათუმის შოთა რუსთაველის სახელმწიფო უნივერსიტეტის აკადემიურმა საბჭომ საპატიო დოქტორის წოდება მიანიჭა. დოქტორ ფრანც კოკს დიდი წვლილი მიუძღვის ბსუ-ს ინტერნაციონალიზაციისა და საერთაშორისო პროექტების განხორციელებაში. მეცნიერ-მკვლევარი ფრანც კოკი არის ზალცბურგის უნივერსიტეტის პოლიტიკის მეცნიერების პროგრამის ხელმძღვანელი, ზალცბურგის, ტირანას, ლუბლიანას, სკოპიეს, სარაევოს და სხვა პოლიტიკურ მეცნიერებებში საერთო სამაგისტრო პროგრამის - PoSIG და კონსორციუმის აღმასრულებელი დირექტორი, ზალცბურგის უნივერსიტეტის პოლიტიკის მეცნიერების დეპარტამენტის საერთაშორისო ურთიერთობების, სტუდენტთა კონსულტირებისა და „ერაზმუს+“-ის ოფისის კოორდინატორი, ხელმძღვანელობს ზალცბურგის ეკოენერგიის გაცვლის ასოციაციას.

USAID-ის სამოქალაქო განათლების პროგრამის ფარგლებში, პარტნიორი სკოლების - ფერიის, მახოს, ბათუმის N22, N20, N25 საჯარო სკოლის მოსწავლეები ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის იურიდიულ კლინიკას ეწვივნენ. იურიდიული კლინიკის ხელმძღვანელმა ნარგიზ ცეცხლაძემ მოსწავლეებს კლინიკის საქმიანობა გააცნო და მოქალაქეების უფასო სამართლებრივ დახმარის შესაძლებლობები წარუდგინა. შეხვედრის მეორე ნაწილი დაეთმო ტრენინგს ადამიანის უფლებების შესახებ.

სიხარულით გაცნობებთ, რომ ევროპის უშიშროებისა და თანამშრომლობის ორგანიზაციის (ეუთო) აკადემიის დაკვეთით გამოიცა წიგნი - "პოლარიზაცია, მოძრავი საზღვრები და მმართველობა: კვლევები ეუთო-ს რეგიონში მიმდინარე ტრანსფორმაციის და განვითარების შესახებ", რომლის ერთ-ერთი თავის ავტორი, ბათუმის შოთა რუსთაველის სახელმწიფო უნივერსიტეტის პროფესორი, ჟან მონეს კათედრის ხელმძღვანელი მალხაზ ნაკაშიძეა. აღნიშნულ თავის სახელწოდებაა "საქართველოს, მოლდოვის და უკრაინის ტრანსფორმაცია ევროკავშირის წევრობისკენ", რომელშიც განსაკუთრებული ყურადღება ეთმობა კანდიდატი ქვეყნების მიერ დემოკრატიული რეფორმების განხორციელების და ევროკავშირში ინტეგრაციისთვის აუცილებელი რეკომენდაციების შესრულების საკითხებს.

ბსუ-ს იურიდიულ და სოციალურ მეცნიერებათა ფაკულტეტის საზოგადოებრივ და პოლიტიკურ მეცნიერებათა დეპარტამენტის ასოცირებულმა პროფესორმა ლაშა ბაჟუნაიშვილმა უნივერსიტეტის მესამე მისიის ფარგლებში ქობულეთის მუზეუმში საჯარო სკოლის მოსწავლეების, პედაგოგების და საჯარო მოხელეების წარუდგინა პროფესორ ირაკლი გორგილაძის თანაავტორობით გამოცემული სახელმძღვანელო „ევროპული ერთობა. იდეა პოლიტიკა, ინტეგრაცია“ და საჯარო ლექცია ჩაატარა თემაზე: „ერთიანი ევროპა - თეორია მოქმედებაში“. მასწავლებლებთან და მოსწავლეებთან შეხვედრის დროს ქობულეთის სხვადასხვა საჯარო სკოლაში დაიგეგმა ევროკავშირთან დაკავშირებული საჯარო ლექციები და შემეცნებით ღონისძიებებში მონაწილეობა.