ბათუმის შოთა რუსთაველის სახელმწიფო უნივერსიტეტმა ხელვაჩაურის მუნიციპალიტეტის სხვადასხვა საჯარო სკოლის 30-მდე მოსწავლეს უმასპინძლა. მოსწავლეებს ბსუ-ს რექტორის მოადგილე თამარ სირაძე შეხვდა, ახალგაზრდებს დეტალურად გააცნო უნივერსიტეტის ფაკულტეტები, სასწავლო პროგრამები და სტუდენტებისთვის ხელმისაწვდომი სერვისები.
3–14 მარტს, შუახევის მუნიციპალიტეტში, გომარდულის სათხილამურო ბაზაზე გაიმართა ბსუ-ს სტუდენტის, 2008 წლის რუსეთ-საქართველოს ომში დაღუპული გმირის ამირან მამალაძის ხსოვნისადმი მიძღვნილი ტურნირი სათხილამურო სპორტში (სლალომი). ღონისძიებას ესწრებოდნენ უნივერსიტეტის ადმინისტრაციის წარმომადგენლები და სტუდენტები. ასევე მონაწილეობდნენ სსიპ ვეტერანების საქმეთა სახელმწიფო სამსახურის, შუახევის მუნიციპალიტეტის საკრებულოსა და მერიის, საქართველოს თავდაცვის სამინისტროს წარმომადგენლები და ამირან მამალაძის ოჯახის წევრები.
ტურნირში მონაწილეობა მიიღეს ბარათაულის, გომარდულის, ოლადაურისა და მაწყვალთის საჯარო სკოლების მოსწავლეებმა. გამარჯვებულებს გადაეცათ თასები, მედლები და სიგელები, ხოლო მონაწილეებს - სამახსოვრო საჩუქრები ბათუმის შოთა რუსთაველის სახელმწიფო უნივერსიტეტისგან.
ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტში დირექტორის არჩევნები ჩატარდა. ინსტიტუტის სამეცნიერო საბჭოს წევრებმა დირექტორად ბიოლოგიის დოქტორი, ბსუ-ს ბიომრავალფეროვნების მონიტორინგისა და კონსერვაციის განყოფილების მთავარი მეცნიერი თანამშრომელი მარიამ მეტრეველი აირჩიეს.
ბათუმის შოთა რუსთაველის სახელმწიფო უნივერსიტეტისა და სამართლისა და პოლიტიკის კვლევის ინსტიტუტის ორგანიზებით მონოგრაფიის - „ნარკვევები ბათუმის ისტორიიდან“ წარდგინება გაიმართა. გამოცემა ორწლიანი კვლევითი პროექტის შედეგია, რომელზეც ბსუ-ს ნიკო ბერძენიშვილის ინსტიტუტის ისტორიისა და არქეოლოგიის განყოფილების უფროსი მეცნიერი თანამშრომელი, ისტორიის დოქტორი მერაბ მეგრელიშვილი და საჯარო სამართლის დოქტორანტი ნიკოლოზ მეგრელიშვილი მუშაობდნენ.
ბსუ-ს საბაკალავრო, სამაგისტრო და სადოქტორო საფეხურის სტუდენტებისთვის საინფორმაციო შეხვედრა გაიმართა „ერაზმუს+“-ისა და აჭარის ა.რ. განათლებისა და სპორტის სამინისტროს მიერ დაფინანსებული საერთაშორისო გაცვლითი პროგრამების შესახებ.
