ახალი ამბები

უნივერსიტეტის რექტორი, პროფესორი ალიოშა ბაკურიძე უმაღლესი საგანმანათლებლო დაწესებულების პროფესორ-მასწავლევლებს შეხვდა, სასწავლო წლის დაწყება მიულოცა და არსებული სიახლეები გააცნო. 2013-2014 სასწავლო წლიდან განათლებისა და მეცნიერებათა ფაკულტეტის რეორგანიზაციის საფუძველზე ჩამოყალიბდა: ჰუმანიტარულ მეცნიერებათა, განათლების, ფიზიკა-მათემატიკის და კომპიუტერების, საბუნებისმეტყველო მეცნიერებათა და ჯანდაცვის ფაკულტეტები. შეიქმნება სალექციო კურსების ელექტრონული ბიბლიოთეკა, რომელიც ხელმისაწვდომი იქნება უნივერსიტეტის სტუდენტებისთვის. სტუმარი-პროფესორის სტატუსით ბათუმის შოთა რუსთაველის სახელმწიფო უნივერსიტეტში სხვადასხვა მიმართულებით ლექციებს წაიკითხავენ უცხოელი პროფესორ-მასწავლებლები და ექსპერტები.

ბათუმის შოთა რუსთაველის სახელმწიფო უნივერსიტეტში ახალი სასწავლო წელი საზეიმოდ გაიხსნა. რექტორმა, პროფესორმა ალიოშა ბაკურიძემ სტუდენტებსა და პროფესორ-მასწავლებლებს სასწავლო წლის დაწყება მიულოცა და უმაღლეს საგანმანათლებლო დაწესებულებაში დანერგილი სიახლეები გააცნო. ახალგაზრდებს ასევე მიესალმნენ და წარმატებები უსურვეს აჭარის ა.რ. უმაღლესი საბჭოს თავმჯდომარემ ავთანდილ ბერიძემ, აჭარის ა.რ. განათლების, კულტურისა და სპორტის მინისტრმა გიორგი თავამაიშვილმა, ქ. ბათუმის მერმა ჯემალ ანანიძემ, დეკანოზმა, მამა შიომ, გერმანელმა ექსპერტმა ტურიზმის დარგში ჰანს ულრიხ ტროზინმა, საზოგადოების წარმომადგენლებმა და სტუდენტებმა. კომპანია „მაგთის“ წარმომადგენელმა ხუთ საუკეთესო პირველკურსელს საჩუქრად მობილური ტელეფონები გადასცა. 2013-2014 სასწავლო წელს ბსუ-ში 1046 პირველკურსელი ჩაირიცხა, რომელთაგან სასწავლო გრანტი 80 სტუდენტმა მიიღო. ამჟამად, უმაღლეს საგანმანათლებლო დაწესებულებაში 5 000-ზე მეტი სტუდენტი სწავლობს.

უნივერსიტეტის ქორეოგრაფიული სახალხო ანსამბლი ,,ტბეთი“ კულტურისა და ხელოვნების XIII საერთაშორისო ფესტივალის გამარჯვებულია. საერთაშორისო ფესტივალი თურქეთის რესპუბლიკის ქალაქ სტამბულში ერთი კვირის განმავლობაში მიმდინარეობდა და ქართველებთან ერთად ქორეოგრაფიული შესაძლებლობები წარმოაჩინეს თურქმა, ბულგარელმა, სლოვაკელმა, მაკედონელმა, სლოვენიელმა და სხვა ეროვნების მოცეკვავეებმა. ფესტივალის ორგანიზატორებმა პირველი ადგილის მფლობელ ანსამბლ ,,ტბეთს“ თასი, სამახსოვრო საჩუქრები გადასცეს და კულტურისა და ხელოვნების XIV საერთაშორისო ფესტივალზე მიიწვიეს.

აკადემიური საბჭოს გადაწყვეტილებით, ცნობილ ქართველოლოგს, ფრანკფურტის გოეთეს უნივერსიტეტის სენატის წევრს, ემპირიული ენათმეცნიერების ინსტიტუტის დირექტორს, პროფესორ იოსტ გიპერტს ბათუმის შოთა რუსთაველის სახელმწიფო უნივერსიტეტის განვითარებაში შეტანილი წვლილისათვის საპატიო დოქტორის წოდება მიენიჭა. გერმანელი მეცნიერის ხელშეწყობით, 2011 წელს დაარსდა ბსუ-ს, ფრანკფურტის ლინგვისტური წრისა და ფრანკფურტის იოჰან ვოლფგანგ გოეთეს უნივერსიტეტის ერთობლივი ქართველოლოგიის საზაფხულო სკოლა ,,კორპუსის ლინგვისტიკა და ქართველოლოგიის პრობლემები“. მკვლევარმა ქართველ მეცნიერებთან ერთად განახორციელა 7 უმნიშვნელოვანესი პროექტი ქართველოლოგიასა და კავკასიოლოგიაში. მისი ხელმძღვანელობით შეიქმნა მდიდარი ქართველოლოგიური და კავკასიოლოგიური ელექტრონული რესურსების ბაზა „არმაზი“, ჩამოყალიბდა ძველი და საშუალი ქართული ენის გამოქვეყნებული ძეგლების ელექტრონული ბანკი.

ბათუმის შოთა რუსთაველის სახელმწიფო უნივერსიტეტში აკადემიკოს ვიქტორ კუპრაძის 110 წლისადმი მიძღვნილი საქართველოს მათემატიკოსთა კავშირის IV საერთაშორისო კონფერენცია გაიხსნა. ერთი კვირის განმავლობაში 63 უცხოელი და 162 ქართველი პროფესორ-მასწავლებელი თანამედროვე მათემატიკის აქტუალურ საკითხებზე ცხრა სექციის მიმართულებით იმუშავებს. საერთაშორისო კონფერენცია ბათუმის შოთა რუსთაველის სახელმწიფო უნივერსიტეტის, საქართველოს მეცნიერებათა აკადემიის, საქართველოს მათემატიკოსთა კავშირისა და შოთა რუსთაველის ეროვნული სამეცნიერო ფონდის ორგანიზებით იმართება.