ბათუმის შოთა რუსთაველის სახელმწიფო უნივერსიტეტს ბეჟას პოლიტექნიკური ინსტიტუტის (პორტუგალია) აგრარული სკოლის დეკანი, პროფესორი მარია ჟოაო კარვალიო ეწვია. ბსუ-ს რექტორის მოადგილესთან ანზორ ბერიძესთან და ტექნოლოგიური ფაკულტეტის დეკანთან გიზო ფარცხალაძესთან გამართულ გაცნობითი ხასიათის შეხვედრაზე დაიგეგმა აგრარული მიმართულებით თანამშრომლობა. მხარეთა შეთანხმებით, გაფორმდება თანამშრომლობის მემორანდუმი, სტუდენტებისა და პროფესორ-მასწავლებლებისათვის შემუშავდება გაცვლითი პროგრამები და გაიმართება ერთობლივი სასწავლო-სამეცნიერო ღონისძიებები.

ბსუ-ს ტექნოლოგიურ ფაკულტეტის აგრარული მიმართულების პროფესორ-მასწავლებლებისა და სტუდენტებისათვის „ერაზმუს+“-ის პროექტის „საგანმანათლებლო, სამეცნიერო, მართვის და ინდუსტრიული კომპეტენციების ერთობლიობა კლიმატის მართვისა და კლიმატის ცვლილებების პრევენციისათვის“ ფარგლებში, ჩატარდა ტრენინგი თემაზე: „კლიმატის ცვლილების გავლენა შავი ზღვის ჰიდროლოგიურ რეჟიმზე“. ტრენინგში მონაწილეობა მიიღეს კლიმატის მართვის ცენტრის ხელმძღვანელმა, „ერაზმუს+“-ის პროექტის კოორდინატორმა და პროექტში ჩართულმა აკადემიურმა პერსონალმა: პროფესორმა ლელა თურმანიძემ, ასოცირებულმა პროფერსორმა ნარგული ასანიძემ, ასისტენტ პროფესორებმა ცირა ქამადაძემ და ხათუნა ჭიჭილეიშვილმა. მოხსენებები გაკეთდა თემებზე: „კლიმატის ცვლილების საკონსულტაციო მწვანე წიგნი“; „კლიმატის ცვლილების გავლენა აჭარის ზღვისპირეთის კლიმატზე და შავი ზღვის ჰიდროლოგიურ რეჟიმზე“. სტუდენტებს ჩაუტარდათ აქტივობები, რომელიც ეხებოდა მდგრადი განვითარების მიზნებს.

ბათუმის შოთა რუსთველის სახელმწიფო უნივერსიტეტმა „ბულვარის ფესტივალში“ მიიღო მონაწილეობა. ბულვარში გამართული ფესტივალის საგამოფენო კუთხეში ბსუ-მ წარადგინა FAB LAB BSU-ში სტუდენტების მიერ ბათუმის ბულვარის თემაზე დამზადებული ნამუშევრები, ცნობილი არქიტექტურული კონსტრუქციების მოდელები და ხელნაკეთი ნივთები. ფესტივალის ფარგლებში აისევე გაიმართა საერთაშორისო სამეცნიერო კონფერენცია „რეკრეაციული პარკების მართვისა და განვითარების შესაძლებლობები“, სადაც ბსუ-ს მკვლევრებმა მოხსენებები წარადგინეს ქალაქის განვითარებაში რეკრიაციული პარკების მნიშვნელობაზე, ეკოლოგიასა და გამწვანებაზე.

ევროკომისიის პროგრამის „Knowledge Education Development” ფარგლებში, 23 აგვისტოდან ბათუმის შოთა რუსთაველის სახელმწიფო უნივერსიტეტის ტექნოლოგიურ ფაკულტეტზე გაცვლითი პროგრამით იმყოფება სილეზიის ტექნოლოგიური უნივერსიტეტის კომპიუტერული მექანიკისა და ინჟინერიის დეპარტამენტის პროფესორი ვალდემარ მუჩა. ვიზიტის მიზანია, სამეცნიერო-კვლევითი ურთიერთობების დამყარება ბსუ-სა და სილეზიის უნივერსიტეტს შორის, გამოცდილების გაზიარება კვლევისა და სწავლების სფეროში.

ბსუ-ში საქართველოს ტექნიკური უნივერსიტეტის, ბათუმის შოთა რუსთაველის სახელმწიფო უნივერსიტეტის და განათლებისა და მეცნიერების პროგრესის ყოველწლიური საერთაშორისო სამეცნიერო-ტექნიკური კონფერენცია „საინჟინრო მეცნიერებათა პრობლემები“ გაიხსნა. კონფერენცია სამეცნიერო-ტექნიკური ჟურნალის „მშენებლობა“ თხუთმეტი წლის იუბილეს ეძღვნება და მიზნად ისახავს საინჟინრო მეცნიერებათა პრობლემების აღმოფხვრის საკითხების განხილვას. შვიდი დღის განმავლობაში სესიებზე წარმოდგენილი იქნება მსოფლიოში ცნობილი მეცნიერების მოხსენებები საინჟინრო მეცნიერებათა პრობლემებზე, მათი ურთიერთგაცნობის და ერთობლივად პრობლემების გადაჭრის გზებზე.