ბსუ-ში საქართველოს განათლების, მეცნიერების, კულტურისა და სპორტის სამინისტროს რეკომენდაციითა და საბუნებისმეტყველო მეცნიერებათა და ჯანდაცვის ფაკულტეტის ორგანიზებით 5-7 ნოემბერს ონლაინ ტრენინგ-კურსი „ახალი კორონავირისული დაავადება COVID-19 - ადაპტირებული სწავლების კურსი სტუდენტებისთვის’’ ჩატარდა. კურსის პროგრამა ბსუ-ს პროფესორმა სოფიო ბერიძემ მოამზადა. ტრენინგი მედიცინის დამამთავრებელი კურსის სტუდენტების გადამზადებას, სამედიცინო პერსონალის რეზერვის შექმნას და საჭიროების შემთხვევაში სამედიცინო პერსონალის COVID-19-ით გამოწვეული დაავადების მართვაში დახმარებას ითვალისწინებდა.

ბსუ-ში შავის ზღვის საერთაშორისო დღისადმი მიძღვნილი ონლაინ ვორქშოფი გაიმართა თემაზე: „შავი ზღვის კვლევის შედეგები EMBLAS-ის პროექტის მიხედვით" და "მარიკულტურის განვითარების პერსპექტივები შავ ზღვაში". საბუნებისმეტყველო მეცნიერებათა და ჯანდაცვის ფაკულტეტის სტუდენტებსა და პროფესორ-მასწავლებლებს გარემოს ეროვნული სააგენტოს მეთევზეობის, აკვაკულტურისა და წყლის ბიომრავალფეროვნების დეპარტამენტის მთავარმა სპეციალისტმა რამაზ მიქელაძემ საქართველოში მარიკულტურის პოტენციალის განვითარების მასშტაბები და პერსპექტივები გააცნო.

5 ივნისი - გარემოს დაცვის მსოფლიო დღე საბუნებისმეტყველო მეცნიერებათა და ჯანდაცვის ფაკულტეტის პროფესორ-მასწავლებლებმა და სტუდენტებმა ონლაინ ვორქშოფით აღნიშნეს. ასოცირებულმა პროფესორმა ნათელა ვარშანიძემ და ასისტენტ პროფესორმა ინგა დიასამიძემ სტუდენტებს გააცნეს „აჭარის ფლორის იშვიათი და ქრობადი სახეობების თანამედროვე მდგომარეობა“. ბიოლოგიის მეორე კურსის სტუდენტმა მარიკა ბროლაძემ კი ისაუბრა გარემოს დაცვის დღის დაარსების ისტორიასა და მნიშვნელობაზე.

22 მაისი ბიომრავალფეროვნების დაცვის საერთაშორისო დღეა. ეს დღე საბუნებისმეტყველო მეცნიერებათა და ჯანდაცვის ფაკულტეტის პროფესორ-მასწავლებლებმა და სტუდენტებმა ვიდეო კონფერენციით აღნიშნეს. ღონისძიების ფარგლებში, მაჭახელას ეროვნული პარკის ბუნებრივი რესურსების მთავარმა სპეციალისტმა მარადი იაკობაძემ სტუდენტებს გააცნო მაჭახელას ეროვნული პარკის მრავალფეროვნება. ღონისძიება მიზნად ისახავდა ახალგაზრდებში გარემოსდაცვითი განათლების ხელშეწყობას, ბიომრავალფეროვნების ღირებულების, სასიცოცხლო გარემოსთვის მისი მნიშვნელობის შესახებ ცნობიერების ამაღლებასა და მეცნიერული მიდგომის ჩამოყალიბებას.

ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის ორგანიზებით Zoom-ის ონლაინ პლატფორმაზე, საჯარო ლექცია ჩატარდა თემაზე - „ახალი კორონავირუსი (nCOV) - გამოწვევა მსოფლიოსთვის“. ლექცია ჩაატარეს ბსუ-ს ასოცირებულმა პროფესორმა, იმუნოლოგმა ლეილა ახვლედიანმა, ბსუ-ს პროფესორმა, მედიცინის დოქტორმა სოფიო ბერიძემ და აჭარის ჯანდაცვის მინისტრის პირველმა მოადგილემ ნინო ნიჟარაძემ.