ახალი ამბები

შოთა რუსთაველის დარბაზში მიგრაციის საერთაშორისო ორგანიზაციის პროექტის „ტრეფიკინგის შესახებ ცოდნის გაღრმავება განათლების ხელშეწყობის გზით“ წარდგინება გაიმართა. პროექტის კოორიდნატორმა ნინო გურგენიძემ სტუდენტებს, პროფესორ-მასწავლებლებსა და ისტორიის მასწავლებელთა ასოციაციის წევრებს ტრეფიკინგის პრევენციის და უსაფრთხო მიგრაციის ეროვნულ სასწავლო გეგმებში შეტანის მნიშვნელობაზე ესაუბრა. ასევე გააცნო ტრეფიკინგთან დაკავშირებული საფრთხე, მისი თავიდან აცილების გზები, მიგრაციის რეგულირება, ხელშეწყობა, განვითარება და იძულებითი მიგრაცია.

ბათუმის შოთა რუსთაველის სახელმწიფო უნივერსიტეტს სახელმწიფო მინისტრი ევროპულ და ევროატლანტიკურ სტრუქტურებში ინტეგრაციის საკითხებში გიორგი ბარამიძე ეწვია. საქართველოს ვიცე-პრემიერმა სტუდენტებთან და პროფესორ-მასწავლებლებთან გამართულ შეხვედრაზე ჩრდილოატლანტიკური ალიანსისა და საქართველოს ურთიერთობებზე, ნატო-ში გაწევრიანების მნიშვნელობაზე, ავღანეთში ISAF-ის სამშვიდობო ოპერაციაზე, კონფლიქტის მშვიდობიან დარეგულირებაზე, ქვეყნის უსაფრთხოებაზე, დეოკუპაციის პერსპექტივებზე და სხვა მნიშვნელოვან საკითხებზე ისაუბრა. შეხვედრის დასასრულს საქართველოს ვიცე-პრემიერმა გია ბარამიძემ სტუდენტების შეკითხვებს უპასუხა.

ძეგლებისა და ისტორიული ადგილების საერთაშორისო დღისადმი მიძღვნილი კვირეული სტუდენტთა კონფერენციით დასრულდა. ბათუმის შოთა რუსთაველის სახელმწიფო უნივერსიტეტის სტუდენტებმა მოხსენებები მატერიალურ-კულტურულ ძეგლებზე, ისტორიული მემკვიდრეობის დაცვის ტენდენციებსა და პრობლემებზე წარმოადგინეს. ახალგაზრდებმა კონფერენციაზე კვირეულის ფარგლებში გამართული ღონისძიებები და ესსეების კონკურსის შედეგებიც შეაჯამეს. ჟიურიმ საუკეთესო ესსების ავტორებად მარიამ კოჩალიძე, ბაია გაბედავა და მარიამ ბასილაია დაასახელა. კვირეული სტუდენტთა სამეცნიერო ცენტრის, სტუდენტთა მხარდაჭერისა და მომსახურების სამსახურის, სტუდენტური თვიმმართველობისა და აჭარის კულტურული მემკვიდრეობის დაცვის სააგენტოს ორგანიზებით გაიმართა.

ცნობილი მეცნიერის, ფიზიკოსისა და საზოგადო მოღვაწის ხუსეინ ხალვაშის 100 წლის იუბილის აღსანიშნავად ბათუმის შოთა რუსთაველის სახელმწიფო უნივერსიტეტის ინიციატივით, ბათუმის მერიისა და საკრებულოს ხელშეწყობით, მემორიალური დაფა გაიხსნა. ღვაწლმოსილი მკვლევარი წლების განმავლობაში უნივერსიტეტში სამეცნიერო-პედაგოგიურ საქმიანობას ეწეოდა. ხუსეინ ხალვაშმა უმაღლეს სასწავლებელში ფიზიკის კათედრა დაარსა, რომელსაც 23 წლის განმავლობაში ხელმძღვანელობდა. უნივერსიტეტში გახსნილია ხუსეინ ხალვაშის სახელობის აუდიტორია და დაწესებულია სახელობითი სტიპენდია.

ალერგოლოგიისა და კლინიკური იმუნოლოგიის საერთაშორისო კვირეულის ეგიდით შოთა რუსთაველის დარბაზში სტუდენტებისა და პროფესორ-მასწავლებლებისათვის საჯარო ლექცია გაიმართა ალერგიისა და კლინიკური იმუნოლოგიის აქტუალურ საკითხებზე. ასოცირებულმა პროფესორებმა ლეილა ახვლედიანმა და ვახტანგ ბერიძემ ატოპიური დერმატიტის, კვებითი ალერგიის, ანტიფოსფოლიპიდური სინდრომის (ანტიფოსფოლიპიდურ ანტისხეულთა კლინიკური და დიაგნოსტიკური მნიშვნელობა) თავისებურებებზე და სხვა ალერგიული დაავადებების სპეციფიკაზე ისაუბრეს. საჯარო ლექცია ბათუმის შოთა რუსთაველის სახელმწიფო უნივერსიტეტის განათლებისა და მეცნიერებათა ფაკულტეტისა და ალერგოლოგიისა და კლინიკური იმუნოლოგიის ასოციაციის აჭარის ფილიალის ორგანიზებით ჩატარდა.