ახალი ამბები

სპორტისა და ახალგზარდობის საქმეთა დეპარტამენტის სტრატეგიული გეგმა რსუ-ს სტუდენტებს აჭარის განათლების, კულტურისა და სპორტის მინისტრმა გია აბულაძემ და სპორტისა და ახალგაზრდობის საქმეთა დეპარტამენტის ხელმძღვანელმა ნოდარ ფუტკარაძემ გააცნეს. უწყების პირველმა პირებმა ახალგაზრდებთან გამართულ შეხვედრაზე პროექტები წარმოადგინეს და დეპარტამენტის ერთწლიანი მუშაობის შედეგები შეაჯამეს. სტუდენტებს შესაძლებლობა ეძლევათ მონაწილეობა მიიღონ ისეთ პროექტებში, როგორიცაა: ინტელექტუალური თამაშები, ახალგაზრდული შემეცნებითი პროგრამები, ახალგაზრდული ინიციატივების მხარდაჭერის საგრანტო პროგრამა, მხიარულთა და საზრიანთა კლუბების მუსიკალური ფესტივალი, „სტუდენტური დღეები 2012”, საერთაშორისო ახალგაზრდული ფორუმი, „ჩვენი რეგიონისათვის“ –სტუდენტთა საზაფხულო ბანაკის მოწყობა.

აჭარის განათლების, კულტურისა და სპორტის სამინისტროსა და შოთა რუსთაველის სახელმწიფო უნივერსიტეტის მხარდაჭერით სააქტო დარბაზში საქველმოქმედო კონცერტი „გაიღეთ ქველმოქმედება სიყვარულისთვის“ გაიმართა. წმ. ეკატერინეს სახელობის სათნოების სახლთან არსებულმა ანსამბლმა „სათნოებამ“, რსუს-ს ქორეოგრაფიულმა ანსამბლმა „ტბეთმა“ და მგალობელთა გუნდმა „ფერიცვალებამ“ ქართული საგალობლები, ეროვნული ცეკვები, ხალხური და ქალაქური სიმღერები შეასრულეს. საქველმოქმედო კონცერტიდან შემოსული თანხა წმ. ეკატერინეს სახელობის სათნოების სახლს მოხმარდება.

რსუ-ს თარგმანის კვლევებისა და ინტერდისციპლინარული კვლევების საკოორდინაციო საბჭოს სესია ჩატარდა. საკოორდინაციო საბჭოსა და საგრანტო ჯგუფის წევრებმა პროექტი „მულტილინგვური კორპუსი - პოლიტიკა, როგორც მულტიდისციპლინარული კორპუსი“ წარმოადგინეს, რომელიც EWMI – USAID-ის საუნივერსიტეტო მხარდაჭერის გრანტის ფარგლებში ხორციელდება. შეხვედრაზე პროექტის მონაწილეებმა ინგლისურ-ქართული კორპუსის შექმნისა და კორპუსული კვლევების დანერგვის საკითხებზე იმსჯელეს. ასევე წარმოადგინეს გრანტის მართვის ტექნიკური და ლინგვისტური ასპექტების ანალიზი და სტრატეგიული საკითხები განიხილეს. შოთა რუსთაველის სახელმწიფო უნივერსიტეტის თარგმანის კვლევებისა და ინტერდისციპლინარული კვლევების საკოორდინაციო საბჭო 2011 წლიდან ქართული ენის ეროვნული კორპუსის საკოორდინაციო საბჭოს წევრია.

შოთა რუსთაველის სახელმწიფო უნივერსიტეტის სტუდენტებმა ბათუმის საჯარო და კერძო სკოლის დამამთავრებელი კლასის მოსწავლეებისა და აბიტურიენტებისათვის საახალწლო კონცერტი გამართეს. უმაღლესი სასწავლებლის კურსდამთავრებულებმა ახალგაზრდებს რსუ-ს საგანმანათლებლო პროგრამები, საუნივერსიტეტო ცხოვრება გააცნეს და საინფორმაციო ბუკლეტები დაურიგეს. კონცერტი სტუდენტთა მომსახურებისა და მხარდაჭერის სამსახურის ორგანიზებით ჩატარდა და მასში უნივერსიტეტის სტუდენტთა შემოქმედებითი, ქორეოგრაფიული და ვოკალური ანსამბლები მონაწილეობდა.

ბათუმის, ხულოს, შუახევის, ქედის, ხელვაჩაურის, ქობულეთის, ლანჩხუთის, ოზურგეთის, ჩოხატაურის კერძო და საჯარო სკოლების მეთორმეტე კლასის მოსწავლეებისათვის შოთა რუსთაველის სახელმწიფო უნივერსიტეტის დეკანებმა, პროფესორ-მასწავლებლებმა და სტუდენტებმა ღია კარის დღე ჩაატარეს. აბიტურიენტებს უნივერსიტეტის ისტორია, პრიორიტეტები, სასასწავლო-საგანმანათლებლო პროგრამები, უნივერსიტეტში სწავლების პირობები, სტიპენდიები, სოციალური პროგრამები და არსებული სიახლეები წარუდგინეს. მომავალ სტუდენტებს უმაღლესი სასწავლებლის შესახებ სრული ინფორმაციის მისაღებად საინფორმაციო ბუკლეტები დაურიგდათ.