ახალი ამბები

უნივერსიტეტის ბიბლიოთეკაში პროექტის: „ინტერდისციპლინარული კვლევები ენის კორპუსის გამოყენებით“ პრეზენტაცია გაიმართა. პროექტი მიზნად ისახავს შოთა რუსთაველის სახელმწიფო უნივერსიტეტის ლინგვოკულტურული და ინტერდისციპლინარული კვლევების მიმართულებით საერთაშორისო სამეცნიერო სივრცეში ინტეგრაციას, ქართველ და უხოელ მეცნიერთა თანამშრომლობასა და ქართული ენისა და კულტურის პოპულარიზაციას. პროექტის საინიციატივო ჯგუფის წევრებმა, რომელიც ფრანკფურტის გოეთეს უნივერსიტეტის, აშშ-ს კოლუმბიის უნივერსიტეტის და შოთა რუსთაველის სახელმწიფო უნივერსიტეტის მეცნიერებისა და ადმინისტრაციის წარმომადგენლებისაგან შედგება ქართულენოვანი სამეცნიერო ლიტერატურის კორპუსის შექმნაზე იმსჯელეს. დაიგეგმა “ვეფხისტყაოსნის” ქართულ და უცხო ენებზე თარგმნილი კორპუსის დიგიტალიზაცია და ორიგინალისა და თარგმანების პარალელური ტექსტის სამეცნიერო დამუშავება - საძიებო სისტემით აღჭურვა პარალელური ბმულების გამოყენებით.

შოთა რუსთაველის სახელმწიფო უნივერსიტეტსა და მშვიდობის კორპუსს შორის თანამშრომლობის მემორანდუმი გაფორმდა. ხელშეკრულების საფუძველზე მხარეები ხელს შეუწყობენ ორ ქვეყანას შორის კულტურული ურთიერთობების გაღრმავებასა და თანამშრომლობის განხორციელებას განათლებისა და მეცნიერების სფეროში. მემორანდუმის თანახმად მოკლევადიანი მხარდაჭერის პროგრამის ფარგლებში მშვიდობის კორპუსის ამერიკელი მოხალისეები რსუ–ში მასტერკლასებს ჩაატარებენ, ხოლო ტურიზმის მენეჯმენტის სპეციალისტი დევიდ ჰარისონი ლექციებს წაიკითხავს რესტორნის მენეჯმენტისა და ტუროპერირების მიმართულებით. ხელშეკრულების ფარგლებში დაიგეგმა ერთობლივი სასწავლო და კულტურული პროექტების განხორციელება.

რსუ-ს რექტორმა, პროფესორმა ალიოშა ბაკურიძემ და სასწავლო და დასაქმების პროგრამების საერთაშორისო ასოციაციის თავმჯდომარემ გოჩა გოგუაძემ თანამშრომობის მემორანდუმს მოაწერეს ხელი. ხელშეკრულება ითვალისწინებს ერთობლივი სამეცნიერო, სასწავლო და კულტურული პროექტების განხორციელებას, სტუდენტების, პროფესორ-მასწავლებლებისა და მეცნიერებისათვის გაცვლითი პროგრამების ამოქმედებას და დისტანციური სწავლების ხელშეწყობას. მხარეები ასევე უზრუნველყოფენ სამეცნიერო კონფერენციების, სიმპოზიუმების, სემინარებისა და ვორქშოფების ორგანიზებას.

შოთა რუსთაველის სახელმწიფო უნივერსიტეტში განათლების ხარისხის განვითარების ეროვნული ცენტრის დირექტორის მოადგილე დავით კერესელიძე და ცენტრის ექსპერტები სხვადასხვა რეგიონის საგანმანათლებლო დაწესებულებების ხელმძღვანელებისა და პროფესორ-მასწავლებელებისათვის ტრენინგებს ჩაატარებენ. მონაწილეები სამი დღის განმავლობაში სრულ ინფორმაციას მიიღებენ აკრედიტაციის სტანდარტებისა და პროცედურის შესახებ. გაეცნობიან აკრედიტაციის თვითშეფასების ანგარიშის შევსების წესს, აკრედიტაციის პროცესში გამოსაყენებელ დოკუმენტებს და ა. შ. ტრენინგის ფარგლებში გაიმართება აკრედიტაციის საბჭოს იმიტირებული სხდომა, სადაც განიხილება ექსპერტთა დასკვნა და შემუშავდება რეკომენდაციები

ცნობილმა ანთროპოლოგმა, ჰარვარდის უნივერსიტეტის ემერიტუსმა, პროფესორმა მაიკლ ჰერცფილდმა შოთა რუსთაველის დარბაზში საჯარო ლექცია წაიკითხა თემაზე: „ვიზუალური ანთროპოლოგიის კვლევის მეთოდები“. მეცნიერმა ამერიკის, ევროპისა და ყოფილი საბჭოთა კავშირის ქვეყნების წამყვანი უნივერსიტეტების პროფესორ-მასწავლებლებს კვლევის თანამედროვე მეთოდები და მიმართულების მიღწევები გააცნო. საჯარო ლექცია საქართველოს ანთროპოლოგთა ასოციაციის ორგანიზებით პროგრამა "რისეთის" ფარგლებში გაიმართა.