ბათუმის შოთა რუსთაველის სახელმწიფო უნივერსიტეტსა და ხელვაჩაურის მუნიციპალიტეტის საკრებულოს შორის თანამშრომლობის მემორანდუმი გაფორმდა. დოკუმენტს ხელი მოაწერეს ბსუ-ს რექტორმა ტიტე აროშიძემ და ხელვაჩაურის მუნიციპალიტეტის საკრებულოს თავმჯდომარემ თენგიზ ირემაძემ.
ბათუმის სახელმწიფო უნივერსიტეტი (ბსუ) ახორციელებს პროექტს MACRO CLEAN (მაკროწყალმცენარეების ყვავილობის კვლევა, გაწმენდის მეთოდოლოგია, ეკონომიკური ვალორიზაცია და საპილოტე გამოყენება), რომლის მიზანია არსებული პრობლემის შემცირება და გარემოსდაცვითი და ეკონომიკური სარგებლის მიღება წყალმცენარეების მდგრადი გამოყენების გზით.
ბათუმის შოთა რუსთაველის სახელმწიფო უნივერსიტეტში აჭარის ა.რ. განათლებისა და სპორტის სამინისტროს მხარდაჭერით „საქართველოს მათემატიკოსთა კავშირის XV საერთაშორისო კონფერენცია“ გაიხსნა. ბსუ-ს 90 წლის იუბილესადმი მიძღვნილ ექვსდღიან კონფერენციაში მონაწილეობს საქართველოსა და უცხოეთის უნივერსიტეტებისა და სამეცნიერო-კვლევითი დაწესებულებების 300-მდე მეცნიერი. წარმოდგენილი სამეცნიერო მოხსენებები ხელს შეუწყობს ინფორმაციის გავრცელებას, თანამშრომლობის გაძლიერებას, საქართველოში მიმდინარე მათემატიკური კვლევებისა და ქვეყნის ცნობადობის ამაღლებას. საუკეთესო ნაშრომები გამოქვეყნდება საერთაშორისო ჟურნალში „Journal of Mathematical Sciences” (Springer).
აჭარის მთავრობის თავმჯდომარე სულხან თამაზაშვილი საგრანტო პროგრამაში გამარჯვებულ სტუდენტებს შეხვდა. პროგრამა აჭარის განათლებისა და სპორტის სამინისტროს მიერ ხორციელდება და წარჩინებული სტუდენტების საზღვარგარეთ სწავლის დაფინანსებას ითვალისწინებს. მიმდინარე წელს, საგრანტო პროგრამის ფარგლებში 100-ზე მეტი სტუდენტი დაფინანსდება.
ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის მედიცინის საგანმანათლებლო პროგრამის სტუდენტები გერმანიაში, ფრაიბურგის საუნივერსიტეტო კლინიკაში სტაჟირებას გაივლიან. სტუდენტები აეროპორტში ბსუ-ს რექტორმა ტიტე აროშიძემ, რექტორის მოადგილე გიორგი ქათამაძემ, ფაკულტეტის დეკანმა რუსუდან ხუხუნაიშვილმა, დეკანის მოადგილე ნატო ზოსიძემ გააცილეს და ახალგაზრდებს წარმატებული სტაჟირება და პროფესიული განვითარება უსურვეს.
