ანონსები

19 აპრილს, 12:00 საათზე, ბათუმის შოთა რუსთაველის სახელმწიფო უნივერსიტეტში, 329-ე აუდიტორიაში „ბიოსიოს“ კრიატიული დირექტორი, ფლორიდის უნივერსიტეტისა და აშშ-ს აგროკულტურის დეპარტამენტის კოლაბორატორი, ქიმიის აკადემიური დოქტორი მაია ციკოლია საჯარო ლექციას წაიკითხავს თემაზე: „სამედიცინო და არომატულ მცენარეთა ეთერზეთებისა და მათი ბიოლოგიური აქტივობის კვლევა“.

15 აპრილს, 14:00 საათზე, ბათუმის შოთა რუსთაველის სახელმწიფო უნივერსიტეტის სააქტო დარბაზში დედაენის დღესთან დაკავშირებით გაიმართება ლიტერატურული საღამო: „დედაენა, პოეზია, სიყვარული“. ღონისძიება ეძღვნება ირაკლი აბაშიძის დაბადებიდან 110, გიორგი ლეონიძის - 120 და იოსებ გრიშაშვილის - 130 წლისთავს.

12 აპრილს, 13:00 საათზე, ბათუმის შოთა რუსთაველის სახელმწიფო უნივერსიტეტში, 55-ე აუდიტორიაში, პროფესორ მალხაზ ჩოხარაძის დოკუმენტური ფილმის „ამბავი თორმეტი სავანისა“ პრემიერა გაიმართება. ქართული ენისადმი მიძღვნილ ფილმში ასახულია კლარჯეთის „ათორმეტ სავანეთა“ მხარის წარსული და თანამედროვეობა. ქართველებისა და ქართული ენის მდგომარეობა ისტორიულ სამხრეთ საქართველოში - ტაოში, კლარჯეთსა და შავშეთში.

5-8 აპრილს ბათუმის შოთა რუსთაველის სახელმწიფო უნივერსიტეტის, ბათუმის მერიის, ბათუმის ხელოვნების ცენტრის და აჭარის სკაუტური ორგანიზაციის ორგანიზებით გაიმართება „ვეფხისტყაოსნის“ პირველი საერთაშორისო ფესტივალი. უნივერსიტეტში ფესტივალის შემეცნებითი ნაწილი ჩატარდება, 6 აპრილს, ბსუ-ს I კორპუსის ფოეში სტუდენტების მონაწილეობით მოეწყობა კოსტიუმირებული შოუ - „ვეფხისტყაოსნის“ პერსონაჟები და გაიხსნება „ვეფხისტყაოსნის“ გამოცემებისა და თარგმანების გამოფენა. სააქტო დარბაზში გაიმართება ფესტივალის გახსნის ცერემონია და პრეზენტაცია - რუსთაველი და მისი „ვეფხისტყაოსანი“. პროექტის - „ვკითხულობთ „ვეფხისტყაოსანს“ ფარგლებში, უნივერსიტეტის სტუდენტები და ფესტივალის მონაწილეები ზეპირად წაიკითხავენ „ვეფხისტყაოსნის“ სტროფებს, ასევე ყველა მსურველს საშუალება ექნება, მონაწილეობა მიიღოს პოემის ხელნაწერის შექმნაში.

5 აპრილს , 11:00 საათზე, ბათუმის შოთა რუსთაველის სახელმწიფო უნივერსიტეტში, 32-ე აუდიტორიაში საქართველოში საფრანგეთის საელჩოს პირველი მრჩეველი, ბატონი ერიკ ტოზატი წაიკითხავს საჯარო ლექციას თემაზე: ’’ფრანკოფონული სამყარო და საქართველო: გამოწვევები და პერსპექტივები’’. საჯარო ლექცია ჩატარდება ინგლისურ ენაზე თარგმანის გარეშე;