ბსუ-ს საბუნებისმეტყველო მეცნიერებათა და ჯანდაცვის ფაკულტეტის პირველი კურსის სტუდენტი ლანა ბოლქვაძე ახალგაზრდა მოკრივეთა შორის საქართველოს ჩემპიონია. საქართველოს ჩემპიონატი ბათუმის სპორტის სასახლეში გაიმართა და მასში 160 სპორტსმენი მონაწილეობდა. ლანა ბოლქვაძემ ფინალში ანი მარგიევი დაამარცხა ნოკაუტით და მეორედ მოიპოვა ქვეყნის ჩემპიონის ტიტული. ბათუმის შოთა რუსთაველის სახელმწიფო უნივერსიტეტი ულოცავს ლანა ბოლქვაძეს გამარჯვებას და წარმატებებს უსურვებს.

ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის სტომატოლოგიის ერთსაფეხურიანი საგანმანათლებლო პროგრამის „პაროდონტოლოგია” და „კლინიკური ოდონტოლოგია და ენდოდონტია” სასწავლო კურსების დასკვნითი გამოცდები ჩატარდა OSCE-ს (ობიექტურად სტრუქტურირებული კლინიკური გამოცდა) ფორმით. საგამოცდო საკითხები მოიცავდა კლინიკურ „ქეისებს”, პრაქტიკულ დავალებებს, იმიტირებული პაციენტის გამო კვლევისა და კომუნიკაციის საკითხებს.

ბათუმის შოთა რუსთაველის სახელმწიფო უნივერსიტეტში დიპლომირებული მედიკოსის ინგლისურენოვანი ერთსაფეხურიანი საგანმანათლებლო პროგრამის პირველკურსელი უცხოელი სტუდენტების საზეიმო მიღება გაიმართა. სტუდენტებს სწავლის დაწყება მიულოცეს, სამახსოვრო საჩუქრები გადასცეს და წარმატებები უსურვეს საბუნებისმეტყველო მეცნიერებათა და ჯანდაცვის ფაკულტეტის დეკანმა რუსუდან ხუხუნაიშვილმა, ბსუ-ს ადმინისტრაციის ხელმძღვანელმა მერაბ დიასამიძემ, რექტორის მოადგილემ ანზორ ბერიძემ, პროგრამის ხელმძღვანელმა სოფო ბერიძემ და პროფესორ-მასწავლებლებმა.

ბათუმის შოთა რუსთაველის სახელმწიფო უნივერსიტეტის ღია კარის დღე გიმართა ბათუმის N2 საჯარო სკოლაში. საინფორმაციო შეხვედრაზე ბსუ-ს საბუნებისმეტყველო მეცნიერებათა და ჯანდაცვის ფაკულტეტის დეკანმა, პროფესორმა რუსუდან ხუხუნაიშვილმა მეთორმეტე კლასის მოსწავლეებს უნივერსიტეტის საგანმანათლებლო პროგრამები, საუნივერსიტეტო ცხოვრება, სოციალური პროგრამები, სტიპენდიები და გაცვლითი პროგრამები გააცნო. ღონისძიებაში მონაწილეობა მიიღო ავსტრალიის ჩარლზ დარვინის უნივერსიტეტის პროფესორმა ფილისითი მაკლუერმა, რომელიც აბიტურიენტებს ავსტრალიაში სწავლის შესაძლებლობებსა და პირობებზე ესაუბრა და მათ შეკითხვებს უპასუხა. შეხვედრის დასასრულს, მეთორმეტე კლასის მოსწავლეებს სამახსოვრო საჩუქრები გადაეცათ.

ბსუ-ს საბუნებისმეტყველო მეცნიერებათა და ჯანდაცვის ფაკულტეტის გეოგრაფიის სამაგისტრო პროგრამის სტუდენტი ქართლოს მანველიძე, ბიოლოგიის სამაგისტრო პროგრამის სტუდენტები სოფიო აბულაძე და ამირან მექვაბიშვილი დაჯილდოვდნენ 1500-ლარიანი „მწვანე სტიპენდიით“. სტუდენტებს სიგელები გადასცა გაეროს განვითარების პროგრამის მუდმივმა წარმომადგენელმა საქართველოში (UNDP), ნიკ ბერესფორდმა და ბსუ-ს წარმომადგენელმა ასისტენტ პროფესორმა ხათუნა ჭიჭილეიშვილმა. „მწვანე სტიპენდიების” პროგრამა ხელი შეუწყობს გარემოსდაცვითი დეფიციტური პროფესიების პოპულარიზაციასა და წარჩინებული სტუდენტების წახალისებას.