ნიადაგის დაცვის საერთაშორისო დღე და მოხალისეთა საერთაშორისო დღე აღინიშნა ბათუმის შოთა რუსთაველის სახელმწიფო უნივერსიტეტში. ბსუ-ს საბუნებისმეტყველო მეცნიერებათა და ჯანდაცვის ფაკულტეტის პროფესორ-მასწავლებლებმა და სტუდენტებმა მონაწილეობა მიიღეს ბათუმის ცენტრალური პარკში გამართულ გამწვანების აქციაში - „წითელი ჯვრის ხეივანი“. ღონისძიება საქართველოს წითელი ჯვრის საზოგადოების ორგანიზებითა და ბათუმის გამწვანებისა და ლანდშაფტური დაგეგმარების სამსახურის მხარდაჭერით ჩატარდა.

საბუნებისმეტყველო მეცნიერებათა და ჯანდაცვის ფაკულტეტის ქიმიის დეპარტამენტს დიუმას სახელობის ფრანგული სკოლისა და ბათუმის მე-8 საჯარო სკოლის მოსწავლეები და მასწავლებლები ეწვივნენ. დეპარტამენტის ხელმძღვანელმა, ასოცირებულმა პროფესორმა მაია ვანიძემ სტუმრებს ქიმიის სასწავლო ლაბორატორიები გააცნო, ხოლო დეპარტამენტის სპეციალისტმა თამილა გოგიტიძემ მათთვის ჩაატარა სასკოლო პროგრამით გათვალისწინებული და სახალისო ქიმიური ცდები. მოსწავლეებმა ასევე დაათვალიერეს ბსუ-ს დასავლეთ საქართველოს რეგიონალური ქრომატოგრაფიული ცენტრი, რომლის საქმიანობისა და მიღწევებზე მათ ცენტრის ხელმძღვანელი, პროფესორი ალეკო კალანდია ესაუბრა.

გენეტიკური და იშვიათი დაავადებების საქართველოს ფონდის (GeRaD) ორგანიზებით ბათუმის შოთა რუსთაველის სახელმწიფო უნივერსიტეტში სემინარი ჩატარდა თემაზე: „იშვიათი დაავადებების აღმოჩენა საქართველოს მოსახლეობაში“. სპიკერებმა გიორგი მელიქიშვილმა ნაზი ტაბატაძემ და ლალი მარგველაშვილმა სტუდენტებს იშვიათი დაავადებები გააცნეს. სემინარი პროექტის „იშვიათი დაავადებების აღმოჩენა (დეტექცია) საქართველოს მოსახლეობაში“ ფარგლებში გაიმართა და მიზნად ისახავდა იშვიათი დაავადებების შესახებ ცნობიერების ამაღლებას.

ბათუმის შოთა რუსთაველის სახელმწიფო უნივერსიტეტში უანგარო დონორთა აქცია „ჯანმრთელი სისხლი ყველას” გაიმართა. უმაღლესი საგანმანათლებლო დაწესებულების სტუდენტებმა, პროფესორ-მასწავლებლებმა და თანამშრომლებმა უანგაროდ გაიღეს სისხლი და თანადგომა გამოხატეს იმ ადამიანების მიმართ, რომელთაც დახმარება სჭირდებათ. სისხლის ბანკის შესავსებად ბსუ-ში რამდენიმე წელია ეტაპობრივად იმართება უანგარო დონორთა აქცია. ღონისძიება უნივერსიტეტის საბუნებისმეტყველო მეცნიერებათა და ჯანდაცვის ფაკულტეტისა და საქართველოს მედიკოსთა ასოციაციის ორგანიზებით მოეწყო.

ბსუ-ს საბუნებისმეტყველო მეცნიერებათა და ჯანდაცვის ფაკულტეტის ჯანდაცვის მიმართულების პროფესორ-მასწავლებლები და სტუდენტები „თეთრი ხალათების“ აქციას შეუერთდნენ და საოკუპაციო რეჟიმის მიერ უკანონოდ დაკავებულ ექიმს, ვაჟა გაფრინდაშვილს სოლიდარობა გამოუცხადეს.