ბათუმის შოთა რუსთაველის სახელმწიფო უნივერსიტეტის სტომატოლოგიურ კლინიკა „ბსუ დენტში“ შპს „იმპლადენტის“ მხარდაჭერით კლინიკის ექიმებმა ფრიდონ ჯაფარიძემ და ალიფონ ჩანტლაძემ იმპლანტოლოგ კახა გურგენიძის მეთვალყურეობით პირველი დენტალური იმპლანტაციის ოპერაცია ჩაატარეს. ასევე გაიმართა ლექცია თემაზე: „პროტეზირება დენტალურ იმპლანტებზე“, რომელიც 5 ნოემბერს მასტერ კლასით დამთავრდა. სასწავლო კურსს თბილისის ივანე ჯავახიშვილის სახელმწიფო უნივერსიტეტიდან მოწვეული იმპლანტოლოგ-ორთოპედი ვახტანგ პატეიშვილი უძღვებოდა. ლექციას ბსუ-ს სტუდენტები, „ბსუ დენტის“ ექიმები და ქალაქის ექიმ-სტომატოლოგები ესწრებოდნენ.
ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტსა და ბიოლოგიის დეპარტამენტს საქმიანი ვიზიტით ბელორუსიის რესპუბლიკის მინსკის ცენტრალური ბოტანიკური ბაღის დირექტორის მოადგილე სამეცნიერო დარგში ივან ვოლოდკო სწავლული მდივან ლიუდმილა გონჩაროვასთან ერთად ეწვია. სტუმრებმა შეხვედრაზე წარმოადგინეს „ბელორუსიის მეცნიერებათა აკადემიის ცენტრალური ბოტანიკური ბაღის“ სამეცნიერო პოტენციალი. მხარეებმა დადებითად შეაფასეს ქართველი და ბელორუსი მეცნიერების თანამშრომლობა და დაიგეგმა მემორანდუმის გაფორმება.
თანამშრომლობის მემორანდუმი გაფორმდა ბათუმის შოთა რუსთველის სახელმწიფო უნივერსიტეტსა და კლაიპედას უნივერსიტეტს შორის. ხელშეკრულება მიზნად ისახავს პარტნიორი უმაღლესი საგანმანათლებლო დაწესებულებების ერთობლივი სასწავლო-საგანმანათლებლო და სამეცნიერო პროექტების განხორციელებას. მხარეთა შეთანხმებით, მაგისტრატურის საგანმანათლებლო პროგრამების სტუდენტებისა და პროფესორ-მასწავლებლებისათვის ამოქმედდება გაცვლითი პროგრამები, ჩატარდება კონფერენციები, სიმპოზიუმები, ტრენინგები და სემინარები.
