დღეს, სასკაჩევანის უნივერსიტეტს (კანადა), ჯანდაცვისა და გარემოს უსაფრთხოების კანადურ ცენტრსა (CCHSA) და ბათუმის შოთა რუსთაველის სახელმწიფო უნივერსიტეტს შორის ურთიერთანამშრომლობის ხელშეკრულება გაფორმდა. ხელშეკრულება რესპირაციულ მედიცინაში ერთიანი კვლევების განხორციელებას ითვალისწინებს. ერთობლივი კვლევის მიზანი გეოგრაფიული ვარიაციების კავშირის დადგენაა ასთმის დიაგნოზთან, მის გავრცელებასა და სიმწვავესთან , რომელსაც კანადელი მკვლევარი ჯოშ ლოვსონი საბუნებისმეტყველო და ჯანდაცვის ფაკულტეტის პროფესორ ვახტანგ ბერიძესთან ერთად განახორციელებს. კანადელი დოქტორის ჯოშ ლოვსონი ვიზიტის ფარგლებში პროფესორ-მასწავლებლებისა და ექიმებისათვის ჩატარდება სემინარი მტკიცებითი მედიცინის აქტუალურ საკითხებსა და უცხოენოვანი პროგრამის სტუდენტებისათვის ღია ლექცია - ბიოსტატისტიკისა და ეპიდემიოლოგიის დარგში.

25 აპრილს, ბათუმის შოთა რუსთაველის სახელმწიფო უნივერსიტეტის ქიმიის დეპარტამენტს ბათუმის საჯარო და კერძო სკოლების, ასევე თხილნარის საჯარო სკოლის მოსწავლეები და მასწავლებელები ეწვივნენ. ქიმიის საბაკალავრო პროგრამის VI კურსის სტუდენტებმა მოსწავლეების ჩართულობით ჩაატარეს, პროგრამული და სახალისო ქიმიური ცდები.
მოსწავლეების ვიზიტი ქიმიის დეპარტამენტში ქიმიის სპეციალობის პოპულარიზაციას და სკოლისა და უნივერსიტეტის დაახლოებას ემსახურება.

2016 წლის 25 აპრილს, დნმ–ის საერთაშორისო დღესთან დაკავშირებით თბილისის სახელმწიფო სამედიცინო უნივერსიტეტის (თსსუ) და სამედიცინო გენეტიკის და ეპიგენეტიკის საქართველოს საზოგადოება ესეების კონკურსს ატარებს. კონკურსი განკუთვნილია სამედიცინო და ბიოლოგიური პროფილის სტუდენტებისთვის.
მიმდინარე წლის საკონკურსო საკითხია: "აირჩიეთ დღეისათვის ხელმისაწვდომი გენეტიკური ტესტირების მეთოდი ისეთი დაავადებისთვის, რომლის სიმპტომები არ ვლინდება ზრდასრულ ასაკამდე (მაგ: როგორიცაა ძუძუს კიბოს მემკვიდრული ფორმა). აღწერეთ ტესტირების მეთოდი და მისი შედეგების სარწმუნოობა. შემდეგ დაასაბუთეთ ან უარყავით ადამიანის გენეტიკის ევროპის საზოგადოების (ESHG) მიერ მოწოდებული რეკომენდაცია მოზარდების გენეტიკური ტესტირების შესახებ“.
კონკურსში მონაწილეობის წესები და ინფორმაცია იხილეთ ბმულ ფაილებში.
კონკურსის ორგანიზებას მხარს უჭერს ადამიანის გენეტიკის ევროპის საზოგადოება( ESHG).

23 აპრილს, დედამიწის დღესთან დაკავშირებით, საბუნებისმეტყველო მეცნიერებისა და ჯანდაცვის ფაკულტეტის სტუდენტებმა მონაწილეობა მიიღეს აჭარის გარემოს დაცვისა და ბუნებრივი რესურსების სამმართველოს ინიციატივით დაგეგმილ გამწვანების აქციაში. სტუდენტებმა, ბათუმის მე-14 საჯარო სკოლის მოსწავლეებთან ერთად, ქობულეთის მუნიციპალიტეტის სოფელ თიკერში ფიჭვისა და ცაცხვის 150 ნერგი დარგეს.

15 აპრილს ბიოლოგიის დეპარტამენტის ასოცირებული პროფესორის ნინო ლომთათიძისა და ასისტენტ პროფესორის გუგული დუმბაძის ორგანიზებით ჩატარდა გარემოსდაცვითი განათლების დღისადმი მიძღვნილი სამუშაო შეხვედრა.
სამუშაო შეხვედრაში მონაწილეობდნენ ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის, განათლების, ტექნოლოგიური, იურიდიული ფაკულტეტის სტუდენტები და უნივერსიტეტის სტუდენტური თვითმმართველობა.