საბუნებისმეტყველო მეცნიერებათა და ჯანდაცვის ფაკულტეტის სხვადასხვა სპეციალობის სტუდენტებმა აქციაში - ,,დავასუფთავოთ მსოფლიო“ მიიღეს მონაწილეობა და მდინარე ჭოროხის დელტის მიდამოების ზღვის სანაპირო დაასუფთავეს. ღონისძიება ბათუმის შოთა რუსთაველის სახელმწიფო უნივერსიტეტის ბიოლოგიის დეპარტამენტის, აჭარის გარემოს დაცვისა და ბუნებრივი რესურსების სამმართველოს, არასამთავრობო ორგანიზაცია ,,საქართველოს მწვანეთა მოძრაობა/დედამიწის მეგობარი“ ორგანიზებით გაიმართა და მიზნად ისახავდა საზოგადოების ცნობიერების ამაღლებას. საერთაშორისო ინიციატივას საფუძველი ჩაეყარა 1992 წელს, გაეროს გარემოს დაცვითი პროგრამის ინიციატივით და მასში 121 ქვეყანაა ჩართული. საქართველო აქციას 2010 წელს შეუერთდა და ქვეყანაში ყოველწლიურად იმართება მყარი საყოფაცხოვრებო ნარჩენებისგან გარემოს დასუფთავების აქციები.

ბათუმის შოთა რუსთაველის სახელმწიფო უნივერსიტეტს პოლონეთის კატოვიცას უნივერსიტეტთან გაფორმებული მემორანდუმის ეგიდით, სილესიას სამედიცინო ფაკულტეტის დეკანი, პროფესორი იან ზეიდა ეწვია. რექტორთან გამართულ შეხვედრაზე ექსპერტ–ეპიდემიოლოგმა სამომავლო თანამშრომლობის მიმართულებებსა და ერთობლივ სასწავლო-სამეცნიერო პროექტებზე ისაუბრა. ევროპაში რესპირატორული დაავადებათა გავრცელების მკვლევარმა ვიზიტის ფარგლებში სტუდენტებისათვის საჯარო ლექცია ჩაატარა ასთმის დიაგნოსტირების საკითხებზე. მომხსენებელმა ისაუბრა დაავადების სირთულეებსა და რესპირატორული დაავადებების გამომწვევ გარემოებებზე. პროფესორ ზეიდას ხელშეწყობით ბათუმის დედათა და ბავშვთა ალერგოლოგიური ცენტრი სილესიის უნივერსიტეტის ეპიდემიოლოგიურ დეპარტამენტთან ერთად, ახორციელებს რესპირაციულ დაავადებათა შესწავლის პროექტს, რომელიც ითვალისწინებს აჭარის I-VIII კლასის 6000 მოსწავლის რესპირატორული დაავადებისა და ასთმის დიაგნოსტიკას. პროგრამის მიზანია რეგიონში ასთმის დიაგნოსტირების გაუმჯობესება და მისი გაკონტროლება.

ბათუმის რეფერალური საავადმყოფოს ბაზაზე ბათუმის შოთა რუსთაველის სახელმწიფო უნივერსიტეტის პროფესორ-მასწავლებლებისათვის USAID-ის პროგრამა „შენარჩუნების“ მხარდაჭერით ტრენინგი ჩატარდა თემაზე: „დიპლომამდელი სამედიცინო განათლების რეფორმა“. თბილისის სახელმწიფო სამედიცინო უნივერსიტეტის პროფესორმა თინათინ ჩიქოვანმა, ასისტენტ პროფესორმა თამარ ანელავამ და თინათინ გაგუამ საბუნებისმეტყველო მეცნიერებათა და ჯანდაცვის ფაკულტეტის ჯანდაცვის მიმართულების აკადემიურ პერსონალს სამედიცინო განათლების მნიშვნელოვანი საკითხები გააცნეს. სამედიცინო განათლების რეფორმის ინიციატივის ფარგლებში, უნივერსიტეტთან არსებულ სამედიცინო განათლებისა და მედიკოსთა პროფესიული განვითარების ცენტრს უსასყიდლოდ გადმოეცა სამეანო და გინეკოლოგიური სიმულატორების სრული პაკეტი.

ბათუმის შოთა რუსთაველის სახელმწიფო უნივერსიტეტისა და ართვინის ჭოროხის უნივერსიტეტის ერთობლივი ეკოლოგიის საერთაშორისო საზაფხულო სკოლის: “ეკოლოგიური პრობლემები და მათი გადაჭრის გზები“ ფარგლებში ეკოტური მოეწყო მარშრუტით: ბათუმი – ნოქალაქევი – მარტვილის კანიონი – ბათუმი. საზაფხულო სკოლის მონაწილეები კოლხეთის დაბლობისა და მთისწინეთის ეკოსისტემების მრავალფეროვნებას გაეცნენ და ისტორიული ძეგლები დაათვალიერეს. სწავლების დასასრულს საზაფხულო სკოლის მონაწილეებს სერტიფიკატები გადაეცათ.

ბათუმის შოთა რუსთაველის სახელმწიფო უნივერსიტეტისა და ართვინის ჭოროხის უნივერსიტეტის ერთობლივი ეკოლოგიის საერთაშორისო საზაფხულო სკოლა ტარდება თემაზე: “ეკოლოგიური პრობლემები და მათი გადაჭრის გზები“. სამი დღის განმავლობაში 50-მდე ქართველი და თურქი მონაწილე ისეთ მნიშვნელოვან საკითხებს გაეცნობა, როგორიცაა: კლიმატის გლობალური ცვლილება და მისი შედეგები, დაცული ტერიტორიების თანამედროვე ბიოეკოლოგიური მდგომარეობა, ლანდშაფტური ბიომრავლფეროვნება და ბიოეკოლოგია, შავი ზღვის სანაპიროსა და ჭოროხის დელტის ეკოლოგიური პრობლემები. ასევე განიხილავენ ატმოსფერული ჰაერის დაბინძურებასა და ჩამდინარე წყლების ეკოლოგიურ პრობლემებს. საზაფხულო სკოლა ხელს შეუწყობს ეკოლოგიური მეცნიერების პოპულარიზაციას, სტუდენტებისა და ახალგაზრდა მეცნიერების ეკოლოგიური პრობლემებით დაინტერესებასა და საველე პირობებში კვლევითი უნარ-ჩვევების გამომუშავებას. საზაფხულო სკოლა ბსუ-ს საბუნებისმეტყველო მეცნიერებათა და ჯანდაცვის ფაკულტეტის, ტექნოლოგიური ფაკულტეტისა და ართვინის ჭოროხის უნივერსიტეტის სატყეო ფაკულტეტის ორგანიზებით იმართება.