5-12 მარტს ბათუმის სახელმწიფო უნივერსიტეტის ეკონომიკისა და ბიზნესის ფაკულტეტის I კურსის დოქტორანტმა და მოწვეულმა მასწავლებელმა სალომე ხინიკაძემ მონაწილეობა მიიღო პოლონეთის ქალაქ ოპოლეში გამართულ ტრენინგში - „მომსახურების სტანდარტები ტურიზმის ბიზნესში“. ცნობილმა პოლონელმა ექსპერტმა თომაშ კრავშიკმა სხვადასხვა ქვეყანაში ტურისტულ დესტინაციებზე მომუშავე 44 სპეციალისტს მომსახურების საერთაშორისო სტანდარტები და რეგულაციები გააცნო. სწავლებისას ყურადღება გამახვილდა ისეთ მნიშვნელოვან საკითხებზე, როგორიცაა სასტუმროს საერთაშორისო სტანდარტები, სასტუმროს ვარსკვლავების მინიჭების საკითხი და სხვ. ტრენინგის მონაწილეები ჩაერთვნენ ინტერაქტიულ სიმულაციებში და ერთმანეთს საკუთარი ქვეყნის გამოცდილება გაუზიარეს.

საქართველოს სინქრონული სრიალის ნაკრების „ICE LIONS BATUMI“-ის წევრებმა, ეკონომიკისა და ბიზნესის ფაკულტეტის სტუდენტებმა ტატიანა ჯოჯუამ, ლინდა ბოლქვაძემ, მაგდა ნაკაშიძემ წარმატებულად იასპარეზეს სინქრონულ მოციგურავეთა სხვადასხვა საერთაშორისო პირველობაში. სტუდენტებმა ჰოლანდიის ქალაქ ეინდჰოვენში ჩატარებულ ჩემპიონატში მეორე ადგილი დაიკავეს, ხოლო უნგრეთის დედაქალაქ ბუდაპეშტში გამართულ საერთაშორისო შეჯიბრში „BUDAPEST CUP 2018“ გუნდურ ასპარეზობაში საუკეთესო გუნდების ათეულში მოხვდნენ. „ICE LIONS BATUMI“-ის საქართველოში სინქრონულ მოციგურავეთა პირველი და ერთადერთი გუნდია, ტატიანა ჯოჯუა კი - ნაკრების კაპიტანია.

ეკონომიკისა და ბიზნესის ფაკულტეტის სტუდენტები სასწავლებლად ერაზმუს+-ის საერთაშორისო გაცვლითი პროგრამის ფარგლებში, ბულგარეთსა და საბერძნეთში გაემგზავრნენ. ეკონომიკის სადოქტორო საგანმანათლებლო პროგრამის მესამე სასწავლო წლის სტუდენტი თამარ ფოლადაშვილი 2017-2018 სასწავლო წლის გაზაფხულის სემესტრში ცენოვის ეკონომიკის აკადემიაში ისწავლის, ხოლო ფინანსების საბაკალავრო საგანმანათლებლო პროგრამის მესამე სასწავლო წლის სტუდენტი ლინდა მამულაძე - კრეტას ტექნოლოგიურ უნივერსიტეტში.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის სტუდენტმა ნანა წოწონავამ და ეკონომიკისა და ბიზნესის ფაკულტეტის სტუდენტმა ელიზაბეტ ფალავანდიშვილმა მონაწილეობა მიიღეს 1-4 მარტს, თურქეთის რესპუბლიკის ქალაქ ბურსაში გამართულ ევროპის საერთაშორისო ტურნირში - „თოვლის ფრენბურთი“. ბსუ-ს სტუდენტებმა ტურნირში წელს მეორედ იასპარეზეს და წარმატებული გამოსვლების შედეგად კიდევ უფრო გაიუმჯობესეს რეიტინგული ქულები.

ბათუმის შოთა რუსთაველის სახელმწიფო უნივერისტეტში აჭარის ავტონომიური რესპუბლიკის უმაღლესი საბჭოს თავმჯდომარე და საორგანიზაციო კომისიის წარმომადგენლები იურიდიული, სოციალურ და პოლიტიკურ მეცნიერებათა, ეკონომიკისა და ბიზნესის ფაკულტეტების სტუდენტებს შეხვდნენ.

„აჭარის ავტონომიური რესპუბლიკის კონსტიტუციაში ცვლილების შეტანის შესახებ“ აჭარის ავტონომიური რესპუბლიკის კონსტიტუციური კანონის პროექტის გამოქვეყნებისა და მისი საჯარო განხილვის საორგანიზაციო კომისიის თავმჯდომარემ დავით გაბაიძემ სტუდენტებს კანონის პროექტით გათვალისწინებული ცვლილებები გააცნო.

შეხვედრა დისკუსიის რეჟიმში გაიმართა, სადაც სტუდენტებმა საკონსტიტუციო ცვლილებების განხილვის პროცესში აქტიური მონაწილეობა მიიღეს.