ახალი ამბები

ბათუმის შოთა რუსთაველის სახელმწიფო უნივერსიტეტში II საერთაშორისო-სამეცნიერო კონფერენცია ,,კომპიუტინგი/ინფორმატიკა, განათლების მეცნიერებები, მასწავლებლის განათლება“ გაიხსნა. 150-მდე მეცნიერი სამი დღის განმავლობაში კომპიუტინგის, ინფორმატიკის, განათლების მეცნიერებებისა და მასწავლებლის განათლების დღევანდელ მდგომარეობასა და სამომავლო პერსპექტივებზე იმსჯელებს. კონფერენციის მიზანია მეცნიერებს შორის დისკუსიის გამართვა და საქართველოსა და საზღვარგარეთ მიმდინარე სამეცნიერო კვლევების გაცნობა. სესიაზე წარმოდგენილი სხვადასხვა დარგის გაერთიანება ითვალისწინებს ინტერდისციპლინარული მიმართულების განვითარებას, ერთ სფეროში მიღებული შედეგების სხვა მიმართულებაში გამოყენებას, ასევე ინფორმატიკაში შემუშავებული მეთოდებისა და მოდელების განათლების მეცნიერებაში დანერგვას.

შოთა რუსთაველის დარბაზში პროექტის „დიგიტალიზებული პარალელური პოლიტოლოგიის კორპუსი“ ფაგლებში მრგვალი მაგიდა გაიმართა. რსუ-სა და ფრანკფურტის უნივერსიტეტის მკვლევრებმა ერთობლივი სამეცნიერო მუშაობის შედეგები შეაჯამეს და მომავალი კვლევითი მიმართულებების პრიორიტეტებზე იმსჯელეს. ბათუმის შოთა რუსთაველის სახელმწიფო უნივერსიტეტის, ფრანკფურტის გოეთეს უნივერსიტეტის, აშშ-ს კოლუმბიის უნივერსიტეტის მეცნიერთა საინიციატივო ჯგუფმა პირველი ერთობლივი საერთაშორისო პროექტი განახორციელა და პარალელური კორპუსის ელექტრონული დამუშავების შედეგად შექმნა ელექტრონული პოლიტიკური ტერმინების ლექსიკონი ქართულ ენაზე. პროექტის ფარგლებში ტრენინგები ჩატარდა ისეთ საკითხებზე, როგორიცაა ,,ენის კორპუსი და მისი მნიშვნელობა სამეცნიერო და სასწავლო-მეთოდური ინოვაციების დანერგვის მიზნით”, ,,დიგიტალიზებულ თარგმნილ კორპუსზე მუშაობის სპეციფიკა, გამოყენების სფეროები” და „სამომხმარებლო პროგრამული უზრუნველყოფის ინტერფეისთან მუშაობა”.

ტალინის უნივერსიტეტის რექტორი, პროფესორი ტიიტ ლანდი, პროფესორები მაარიკა მილი და რეინ მიულერსონი მორიგი ვიზიტით რსუ-ს ეწვივნენ და პროექტის „ელექტრონული სწავლების დანერგვა, სწავლების პროცესის ხარისხის გაზრდა და პროფესორ-მასწავლებელთა კვალიფიკაციის ამაღლება თბილისისა და ბათუმის სახელმწიფო უნივერსიტეტებში“ შედეგები შეაფასეს. პროექტი მიზნად ისახავდა რსუ-ში ელექტრონული პორტალისა და ელექტრონული სწავლების დანერგვას, ოპერატიული სისტემა Moodle-ის დაფუძნებას, სხვადასხვა სპეციალობის 6 ელექტრონული სასწავლო კურსის შექმნასა და პროფესორ-მასწავლებლებისათვის ელექტრონული სწავლების უნარ-ჩვევების გამომუშავებას. საინფორმაციო ტექნოლოგიებისა და კომუნიკაციების სამსახურის თანამშრომლებმა ესტონელ ინსტრუქტორ ვერონიკა როგალევიჩთან ერთად მოამზადეს ვიდეო და ბეჭდური მეთოდური მითითებანი პროგრამა Moodle-ში მუშაობის დასაწყებად. ელექტრონული სწავლების პორტალით სარგებლობა უნივერსიტეტის ყველა თანამშრომელსა და სტუდენტს შეეძლება. ვიზიტის ფარგლებში ტალინის უნივერსიტეტის პროფესორმა რეინ მიულერსონმა ლექცია წაიკითხა თემაზე: „პოლიტიკური რეჟიმების ცვლა თანამედროვე საერთაშორისო სამართლის ფონზე“.

საზეიმოდ გაიხსნა ახალი სასწავლო წელი ბათუმის შოთა რუსთაველის სახელმწიფო უნივერსიტეტში. უნივერსიტეტის რექტორმა, პროფესორმა ალიოშა ბაკურიძემ სტუდენტებსა და პროფესორ-მასწავლებლებს 2012-2013 სასწავლო წლის დაწყება მიულოცა, წარმატებები უსურვა და უმაღლეს საგანმანათლებლო დაწესებულებაში დაგეგმილი სიახლეები გააცნო. უნივერსიტეტელებს ასევე მიესალმნენ და ღირსშესანიშნავი დღე მიულოცეს აჭარის განათლების, კულტურისა და სპორტის მინისტრის მოადგილემ აიდა აბუსერიძემ, ტეხასის უნივერსიტეტის პროფესორმა დანიელ დანიმ, რსუ-ს ემერიტუსმა ანზორ დიასამიძემ, დეკანოზმა მამა შიომ და სტუდენტებმა. ახალ სასწავლო წელს უმაღლესი საგანმანათლებლო დაწესებულება აკრედიტებული საბაკალავრო, სამაგისტრო და სადოქტორო პროგრამებით ხვდება. განსაკუთრებული ყურადღება მიექცევა სწავლისა და სწავლების ხარისხის ამაღლებას. სასწავლო პროცესის ორგანიზების, სტუდენტთა მომსახურებისა და ადმინისტრირების გაუმჯობესების მიზნით დაინერგება ერთი ფანჯრის პრინციპი და უნივერსიტეტის მართვის ელექტრონული პროგრამა ,,ელექტრონული უნივერსიტეტი“

კიროვოგრადის ნაციონალურ ტექნიკურ უნივერსიტეტსა და ბათუმის შოთა რუსთაველის სახელმწიფო უნივერსიტეტს შორის თანამშრომლობის მემორანდუმი გაფორმდა. მხარეები სასწავლო და სამეცნიერო პროექტების განხორციელებაზე, სტუდენტთა და პროფესორ-მასწავლებელთა გაცვლაზე, ერთობლივი საგანმანათლებლო პროგრამების შემუშავებასა და ურთიერთგამოცდილების გაზიარებაზე შეთანხმდნენ. დოკუმენტის თანახმად, სამეცნიერო კვლევა-ძიების შედეგები რსუ-სა და კნტუ-ს კრებულებში დაიბეჭდება. მემორანდუმის ფარგლებში პარტნიორი უმაღლესი საგანმანათლებლო დაწესებულების წარმომადგენლები საერთაშორისო გრანტების მოსაპოვებლად ერთობლივად იმუშავებენ.