ახალი ამბები

საინფორმაციო ტექნოლოგიების თანამედროვე მიღწევებზე უცხოელმა პროფესორებმა ბათუმის შოთა რუსთაველის სახელმწიფო უნივერსიტეტის სტუდენტებისათვის ლექციები წაიკითხეს. ნიუმბერგის უნივერსიტეტის პროფესორმა იოჰან იოშერმა ახალგაზრდებს თანამედროვე მიკროპროცესორების დაპროექტება გააცნო. სალექციო კურსში წარმოდგენილი იყო თანამედროვე მიკროელექტრონიკაში გამოყენებული ინტეგრალური სქემების შემადგენელი ელემენტური ბაზის დაპროექტების შესაძლებლობები და გერმანიის წამყვან უნივერსიტეტებში ჩატარებული ექსპერიმენტების შედეგები. ესტონელმა პროფესორმა ვლადიმერ ტომბერგმა ისეთ მნიშვნელოვან საკითხზე ისაუბრა, როგორიცაა სამომხმარებლო გამოცდილების პროექტირება ვებტექნოლოგიებში. ყურადღება გაამახვილა თანამედროვე პროგრამული უზრუნველყოფის, ინტერნეტ ტექნოლოგიების გამოყენებით საინფორმაციო ინფრასტრუქტურის, სამომხმარებლო ინტერფეისის დაპროექტებისა და რეალიზაციის თანამედროვე ტექნოლოგიებზე. ავსტრიელმა პროფესრომა ანდრეას ზალსბურგერმა ლექციები დიდ ადრონულ კოლაიდერში ”ატლასის” დანადგარზე ჩატარებულ ექსპერიმენტზე, მის მნიშვნელობასა და შედეგებზე წაიკითხა.

ევროპისა და ამერიკის წამყვანი უნივერსიტეტების პროფესორ-მასწავლებლებს ბათუმის შოთა რუსთაველის სახელმწიფო უნივერსიტეტის რექტორმა, პროფესორმა ალიოშა ბაკურიძემ სერტიფიკატები გადასცა და მადლობა გადაუხადა გაწეული თანამშრომლობისათვის. რამდენიმე დღეა ამერიკელი, გერმანელი, ესტონელი და პოლონელი ექსპერტები ლექციებს კითხულობენ საინფორმაციო ტექნოლოგიების, საჯარო ადმინისტრირების, საინჟინრო ტექნოლოგიების, სტრატეგიული მენეჯმენიტისა და ეკონომიკის მიმართულებით. უცხოელი პროფესორ-მასწავლებლები სტუდენტებს ქვეყნის განვითარებისათვის მნიშვნელოვანი დარგების მიღწევებს აცნობენ და მრავალწლიანი მუშაობის გამოცდილებას უზიარებენ.

მარკეტინგის მართვისა და დაგეგმვის საკითხებზე ვარშავის ეკონომიკური უნივერსიტეტის პროფესორი მარია ჯოჰანი ბათუმის შოთა რუსთაველის სახელმწიფო უნივერსიტეტში, ათი დღის განმავლობაში ლექციებს კითხულობდა. პოლონელმა მეცნიერმა ახალგაზრდებს ინფორმაციული უზრუნველყოფის, ბაზრის სეგმენტების, მარკეტინგული კომუნიკაციებისა და ინტერნეტ – მარკეტინგის სპეციფიკა წარუდგინა. ჰაიდელბერგის უნივერსიტეტის მეცნიერ-თანამშრომელი ანდრეას გეორგ ჰაიდლი საერთაშორისო ურთიერთობებისა და ევროპისმცოდნეობის სპეციალობების სტუდენტებს სალექციო კურსს „შედარებით პოლიტიკას“ უტარებს და ევროპული ქვეყნების პოლიტიკურ სისტემებს აცნობს. გერმანელმა დოქტორმა ათდღიანი ვიზიტის ფარგლებში ჯგუფში მუშაობის მეთოდოლოგიური საკითხებზე სემინარი ჩაატარა, დეპარტამენტის წევრებს შეხვდა და სამომავლო თანამშრომლობის მიმართულებებსა და ერთობლივი სამაგისტრო პროგრამის შემუშავებაზე ისაუბრა.

სოციალურ მეცნიერებათა, ბიზნესისა და სამართალმცოდნეობის ფაკულტეტის სტუდენტებს ამერიკის წამყვანი უნივერსიტეტების პროფესორები ეკონომიკის აქტუალურ საკითხებზე ლექციებს უკითხავენ. ტეხასის უნივერსიტეტის პროფესორმა დანიელ დანიმ ბიზნესის დაგეგმვას, სტრუქტურას, განვითარებას, საერთაშორისო ბიზნესის პრინციპებს, მენეჯმენტის თანამედროვე მეთოდებსა და მოდულებს ათდღიანი სალექციო კურსი მიუძღვნა. მინესოტის უნივერსიტეტის პროფესორმა ჯეიმს რედელშეირმა სტუდენტებს ვრცლად წარუდგინა უმუშევრობის, ეკონომიკური და ფინანსური კრიზისების ინფლაციის გამომწვევი მიზეზები და თანამედროვე პრობლემები. ამერიკელმა ექსპერტმა ასევე ისაუბრა ამ პროცესების პრევენციისა და აღმოფხვრის აპრობირებულ ღონისძიებებზე. კოლორადოს უნივერსიტეტის პროფესორმა ჯონ ბროკიმ ეკონომიკური ზრდის, მოსახლეობის შემოსავლის ამაღლების თანამედროვე საკითხები განიხილა. ყურადღება გაამახვილა განვითარებული და განვითარებადი ქვეყნების ეკონომიკური შესაძლებლობებისა და რესურსების გამოყენების თანამედროვე მიმართულებებზე.

ამერიკელმა პროფესორებმა რიჩარდ ლეტენდრემ და რობერტ ლოუდერმა ბათუმის შოთა რუსთაველის სახელმწიფო უნივერსიტეტის სტუდენტებისათვის საინჟინრო ტექნოლოგიების მიმართულებით ორკვირიანი სალექციო კურსი წაიკითხეს. პროფესორმა რიჩარდ ლეტენდრემ მომავალ ინჟინრებს მშენებლობის დაპროექტების საფუძვლები და ის ძირითადი პრინციპები გააცნო, რომლებიც ერთმანეთთან აკავშირებს ბიზნესმენს (მეპატრონეს), დამპროექტებლებს, მშენებელთა გუნდსა და ეკონომიკის სამინისტროს. უცხოელმა ექსპერტმა ასევე განიხილა საერთაშორისო სამშენებლო კოდები, შენობა–ნაგებობათა კლასიფიკაცია და სხვა მნიშვნელოვანი საკითხები. პროფესორმა რობერტ ლოუდერმა სტუდენტებს ამერიკის თანამედროვე სამრეწველო ენერგეტიკაში გამოყენებული წყლისა და აირის - გათბობისა და კონდიცირების სისტემები წარუდგინა. ისაუბრა წყლის გაწმენდის მეთოდებზე, ძველი და თანამედროვე სატუმბ სისტემებზე, მის მრუდებსა და შერჩევის პრინციპებზე.