2-4 ოქტომბერს, თბილისში, გარემოს დაცვითი ინფორმაციისა და განათლების ცენტრის ორგანიზებით, უნივერსიტეტების წარმომადგენლებთან სამუშაო შეხვედრა ჩატარდა. ღონისძიებაში მონაწილეობა მიიღეს ბსუ-ს ეკოლოგიის საბაკალავრო პროგრამის ხელმძღვანელმა, ბიოლოგიის დეპარტამენტის ხელმძღვანელმა, პროფესორმა დავით ბარათაშვილმა, მწვანე სტიპენდიის კოორდინატორმა, ეკოლოგიის საბაკალვრო პროგრამის ხელმძღვანელმა ასოცირებულმა პროფესორმა ინგა დიასამიძემ და გეოგრაფიის სამაგისტრო პროგრამის ხელმძღვანელმა, ასისტენტ პროფესორმა ხათუნა ჭიჭილეიშვილმა. შეხვედრა მიზნად ისახავდა გარემოსდაცვითი ინფორმაციისა და განათლების ცენტრთან შესაძლო თანამშრომლობის გეგმების გაცნობას, განხორციელებული გარემოსდაცვითი საკითხების განხილვასა და სასწავლო პროცესში ინტეგრირებას.

სახალვაშოს სადამკვირვებლო პლატფორმასთან გაიმართა ფრინველებზე დაკვირვების საერთაშორისო ფესტივალის დასკვნითი საღამო. ღონისძიებაში მონაწილეობა მიიღეს ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის ბიოლოგიის დეპარტამენტის სტუდენტებმა და პროფესორ-მასწავლებლებმა. ტურის განმავლობაში მონაწილეებს შესაძლებლობა ჰქონდათ, დაკვირვებოდნენ ფრინველების მრავალ სახეობას.

ბსუ-ს საბუნებისმეტყველო მეცნიერებათა და ჯანდაცვის ფაკულტეტის, ეკოლოგიის საბაკალავრო საგანმანათლებლო პროგრამის ხელმძღვანელი, ასოცირებული პროფესორი ინგა დიასამიძემონაწილეობა მიიღო 27 სექტემბერს, თბილისში გამართულ კონფერენციაში „ბიომრავალფეროვნების კონფერენცია 2023“. მონაწილეებმა განიხილეს ბიომრავალფეროვნების შენარჩუნებისა და მდგრადი სარგებლობის უზრუნველყოფის საკითხები. კონფერენციაში მონაწილობდნენ საქართველოს პარლამენტის, გარემოს დაცვისა და სოფლის მეურნეობის სამინისტროს შესაბამისი უწყებების, საერთაშორისო და ადგილობრივი დარგობრივი ორგანიზაციების წარმომადგენლები და ექსპერტები. ღონისძიება პანელური დისკუსიით დასრულდა, რომელშიც ჩაერტო ჩაერთო სამეცნიერო, არასამთავრობო და საფინანსო სექტორი.

20-23 სექტემბერს საბუნებისმეტყველო მეცნიერებათა და ჯანდაცვის ფაკულტეტის ბიოლოგიის დეპარტამენტის ასოცირებულმა პროფესორმა გუგული დუმბაძემ მონაწილეობა მიიღო ქალაქ ტრაპიზონში, შავი ზღვის ტექნიკურ უნივერსიტეტში გამართულ საერთაშორისო სამეცნიერო კონფერენციაში. კონფერენცია ჩატარდა ინჟინერიასა და სიცოცხლის მეცნიერებების მიმართულებით თემაზე: „სიცოცხლე - ნახშირბადის ბალანსი“. ასოცირებულმა პროფესორმა გუგული დუმბაძემ კონფერენციის მონაწილეებს წარუდგინა ორი მოხსენება: „საქართველოს მყინვარების თანამედროვე მდგომარეობა“ და „შავი ზღვის აჭარის სანაპირო ზოლის ზოგიერთი თავისებურება კლიმატის ცვლილების ფონზე“.

ბსუ-ს მხარდაჭერით საქართველოს სამედიცინო სპეციალობების ასოციაციის (სსსა) GAMS VIII საერთაშორისო კონფერენცია „ნეიროგამოწვევები 2023 მტკიცებითი და პერსონალური მედიცინის ეპოქაში“ გაიმართა. კონფერენციაზე აშშ-ის, საქართველოს, ინგლისის, გერმანიის, ისრაელის, შვედეთის, შვეიცარიის, ესპანეთის, თურქეთის 150-მა წამყვანმა მეცნიერებმა და ექიმმა სამეცნიერო მოხსენებები წარმოადგინა სამედიცინო სფეროს უახლოეს მიღწევებზე, მკურნალობისა და კველევის მეთოდებზე. კონფერენციის ფარგლებში, ბსუ-ს რექტორმა მერაბ ხალვაშმა უწყვეტი პროფესიული განათლების განვითერებაში, ეროვნული სამედიცინო კადრების აღზრდაში შეტანილის წვლილისათვის პროფესორები: ირაკლი სულაქველიძე, ამოს კორჩინი, ზურაბ ნადარეიშვილი და შერეფნურ ოზთურუკი საპატიო სიგელებით დააჯილდოვა.