2022 წლის ოქტომბერსა და ნოემბერში შოთა რუსთაველის საქართველოს ეროვნული სამეცნიერო ფონდის ფინანსური მხარდაჭერით, გრანტის სახელწოდება - „რა იგებს არჩევნებს საქართველოში“ (№FR-18-8649) ბსუ-ს ნიკო ბერძენიშვილის ინსტიტუტის მკვლევარი რუსლან ბარამიძე საველე მასალების შეგროვების მიზნით იმყოფებოდა ერევანსა და ბაქოში. მივლინების პერიოდში განხორციელდა სამუშაო შეხვედრები და მეცნიერ თანამშრომელმა ჩაიწერა ინტერვიუები მკვლევრებთან, ექსპერტებთან, პოლიტიკოსებთან, სხვადასხვა პერიოდში არჩევნებში მონაწილე პირებთან. ასევე, მოიძია პროექტის მიზნების შესაბამისი სხვადასხვა მასალა.

ბსუ-ს ნიკო ბერძენიშვილის ინსტიტუტში მწერალი მაია ტურაბელიძე საზოგადოების წარმომადგენლებს შეხვდა. სტუმარმა მეცნიერებს მისი თარგმნილი სამეცნიერო და პოპულარული ხასიათის წიგნები წარუდგინა და ინსტიტუტის ბიბლიოთეკას საჩუქრად გადასცა. შეხვედრაზე საუბარი შეეხო ფლორენციის მუზეუმში დაცულ იმ ფოტოილუსტრაციებს, რომლებიც მე-19 საუკუნის ბოლოს იტალიელმა მოგზაურებმა ზემო აჭარაში გადაიღეს.

ნიკო ბერძენიშვილის ინსტიტუტის დირექტორი როინ მალაყმაძე და ინსტიტუტის ფოლკლორის, დიალექტოლოგიისა და ემიგრანტული ლიტერატურის კვლევის განყოფილების ხელმძღვანელი ელზა ფუტკარაძე შეხვდნენ თსუ-ს არნოლდ ჩიქობავას სახელობის ენათმეცნიერების ინსტიტუტისა და თსუ-ს ივანე ჯავახიშვილის ისტორიისა და ეთნოლოგიის ინსტიტუტის წარმომადგენლებს. არნოლდ ჩიქობავას ენათმეცნიერების ინსტიტუტში, ინსტიტუტის დირექტორის ქალბატონ ნანა მაჭავარიანის მონაწილეობით, ენათმეცნიერების ინსტიტუტის თარგმნითი ლექსიკონებისა და სამეცნიერო ტერმინოლოგიის განყოფილების ხელმძღვანელმა ქალბატონმა ლია ქაროსანიძემ გამართა პრეზენტაცია ტერმინოლოგიური ლექსიკონების ელექტრონული ბაზების შესახებ. შეხვედრაზე საუბარი შეეხო ერთობლივი კვლევების განხორციელებას და სამომავლო თანამშრომლობის პერსპექტივებს.

11-15 ნოემბერს შოთა რუსთაველის საქართველოს ეროვნული სამეცნიერო ფონდის ფინანსური მხარდაჭერით (გრანტის №FR-18-8649, სახელწოდება - „რა იგებს არჩევნებს საქართველოში“) ქალაქ ბათუმში გაიმართა სამუშაო შეხვედრები პროექტის უცხოელ კონსულტანტებთან, დოქტორ სევილ ჰუსეინოვასთან და დოქტორ სერგეი რუმიანცევთან. კვლევითი ჯგუფის წევრებმა ერთმანეთს გაუზიარეს მიმდინარე შედეგები და მოპოვებული მასალები. შეხვედრების პერიოდში განხილული იყო პროექტით გათვალისწინებული ვალდებულებების შესრულების გრაფიკი, სამეცნიერო სტატიებისა და დასკვნითი მონოგრაფიის მომზადებასთან დაკავშირებული საკითხები.

ნიკო ბერძენიშვილის ინსტიტუტის მეცნიერთა ჯგუფმა, ემერიტუს-პროფესორ შუშანა ფუტკარაძის ხელმძღვანელობით დაასრულა სამუშაო ვიზიტი სტამბოლის ქართველ კათოლიკეთა სავანეში. მკვლევრებმა უნიკალურ არქივში დაცული ეროვნული მნიშვნელობის მასალა შეისწავლეს და აღნუსხეს. აღმოაჩინეს ახალი მასალები პეტრე სურგულაძის, შალვა ვარდიძისა და თურქეთში მოქმედი ქართველი ლეგიონერების შესახებ, რომლების სამეცნიერო პუბლიკაციებისა და მონოგრაფიის სახით გამოქვეყნდება.