ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტის წარმომადგენლები აჭარის სოფლის მეურნეობის მინისტრთან ლაშა კომახიძესთან გამართულ შეხვედრას დაესწრნენ. ღონისძიება მიზნად ისახავდა უნივერსიტეტის კვლევით ინსტიტუტებსა და აგრარულ ფაკულტეტზე სოფლის მეურნეობის მიმართულებით კვლევებისა და საქმიანობის პოპულარიზაციას, სამინისტროსთან თანამშრომლობის გაღრმავებას. შეხვედრა ასევე ითვალისწინებდა უწყების პროგრამების შემუშავებაში ბსუ-ს მეცნიერ-თანამშრომლების აქტიურ ჩართვას და სოფლის მეურნეობის დარგის კვალიფიცირებული ახალგაზრდა სპეციალისტების აღზრდას.

60 წელი შეუსრულდა ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტის მთავარ მეცნიერ-თანამშრომელს, ბიოლოგიის დოქტორს, გამძლეობის გენეტიკის განყოფილების უფროსს, ქალბატონ ზოია სიხარულიძეს. ზოია სიხარულიძე სამ ათეულ წელზე მეტი ხნის განმავლობაში იღწვის რეგიონში ფიტოპათოლოგიური მეცნიერების განვითარებისათვის.

3-7 ივლისს, საფრანგეთის ქალაქ ტულუზაში გამართულ საერთაშორისო სიმპოზიუმის მუშაობაში მონაწილეობა მიიღეს ფიტოპათოლოგიისა და ბიომრავალფეროვნების ინსტიტუტის მცენარეთა დაავადებების მონიტორინგისა და დიაგნოსტიკის განყოფილების უფროსმა გალინა მეფარიშვილმა და ამავე განყოფილების მეცნიერ-თანამშრომელმა მაკა მურადაშვილმა. სიმპოზიუმი საკარანტინო კატეგორიის ფიტოპათოგენური ბაქტერიის R. solanacearum - ით გამოწვეულ მცენარეთა ბაქტერიულ დაავადებებს ეძღვნებოდა და მასში 28 ქვეყნის წარმომადგენელი მონაწილეობდა.

ფიტოპათოლოგიისა და ბიომრავალფეროვნების ინსტიტუტს ავსტრალიის ეკონომიკის, ტრანსპორტის და რესურსების სახელმწიფო დეპარტამენტის წამყვანი მეცნიერი, სელექციონერი, ფიტოპათოლოგი მეთიუ როდა ეწვია. მეცნიერი ინსტიტუტში მიმდინარე კვლევით მიმართულებებს გაეცნო და ინსტიტუტის თანამშრომლებთან ერთად ქობულეთის აგროსერვისცენტრი მოინახულა. მეთიუ როდამ ფიტოპათოლოგიისა და ბიომრავალფეროვნების ინსტიტუტთან თანამშრომლობის სურვილი გამოთქვა ზოგიერთი სასოფლო სამეურნეო კულტურების მოვლა-მოყვანის, ნეგატიური ზემოქმედებისაგან დაცვის, კვალიფიკაციის ამაღლების და სხვადასხვა ტრენინგების ჩატარების მიმართულებით.

ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტისა და აჭარის სოფლის მეურნეობის სამინისტროს ორგანიზებით ქობულეთის მუნიციპალიტეტების აგროსერვის ცენტრის ადმინისტრაციის ტერიტორიაზე მცენარეთა ჯანმრთელობის კლინიკა მოეწყო, რაც ფერმერებისა და სხვა დაინტერესებული პირების მიერ წარმოდგენილი სასოფლო-სამეურნეო კულტურების დაავადებების დიაგნოსტირებას და კონსულტირებას ითვალისწინებდა.