ახალი ამბები

ქართველმა და ბულგარელმა მეცნიერებმა რსუ-ში სემინარები ჩაატარეს თემებზე: „ანთროპოლოგია დასავლური პერსპექტივით: საქართველო - ბულგარეთი” და „შავი ზღვის ქვეყნების კულტურის, ისტორიის, ანთროპოლოგიის, ლიტერატურის და ლინგვისტიკის ინოვაციური ასპექტების შესწავლა”. მკვლევრებმა მრგვალ მაგიდასთან მეცნიერების სხვადასხვა დარგის საკითხები განიხილეს. სემინარები, რომლებიც შოთა რუსთაველის სახელწიფო უნივერსიტეტის, ბულგარეთის სამხრეთ-დასავლეთ უნივერსიტეტის „ნეოფიტ რილსკისა” და სტუდია „ანთროპოს” ორგანიზებით გაიმართა, ტრადიციულ სახეს მიიღებს და ყოველ წელს ჩატარდება.

რსუ-ს სააქტო დარბაზში სტუდენტთა მომსახურებისა და მხარდაჭერის სამსახურის ორგანიზებით ბავშვთა დაცვის საერთაშორისო დღისადმი მიძღვნილი კონცერტი გაიმართა. ქალაქ ბათუმის 22 საჯარო ბაღის 250-მდე აღსაზრდელმა უნივერსიტეტის სცენაზე მუსიკალურ ნომრებთან ერთად იუმორისტული სკეტჩები და ცეკვები შეასრულა. შოთა რუსთაველის სახელმწიფო უნივერსიტეტის რექტორატმა, ადმინისტრაციამ და პროფესორ-მასწავლებლებმა პატარებს ბავშვთა დაცვის საერთაშორისო დღე მიულოცეს, ხოლო სტუდენტური თვითმმრთველობა სტუმრებს ტკბილეულით გაუმასპინძლდა.

ოთხმხრივი თანამშრომლობის მემორანდუმი გაფორმდა შოთა რუსთაველის სახელმწიფო უნივერსიტეტს, ილიას სახელმწიფო უნივერსიტეტს, შავი ზღვის ფლორისა და ფაუნის შემსწავლელ სამეცნიერო-კვლევით ცენტრსა და თბილისის ზოოლოგიურ პარკს შორის. ხელშეკრულების მიზანია შავი ზღვის ფლორისა და ფაუნის კვლევის ინსტიტუციური განვითარება, თანამშრომლების, მკვლევრების და პროფესორ-მასწავლებლების კვალიფიკაციის ამაღლება, სწავლების ხარისხის გაუმჯობესება, პარტნიორ დაწესებულებებს შორის არსებული რესურსების გამოყენებით ერთობლივი სამაგისტრო, სადოქტორო პროგრამებისა და პროექტების განხორციელება.

გაიხსნა შოთა რუსთაველის სახელმწიფო უნივერსიტეტის, აჭარის არ მთავრობის საქვეუწყებო დაწესებულება - საარქივო სამმართველოსა და ბულგარეთის ნეოფიტ რილსკის უნივერსიტეტის ერთობლივი საერთაშორისო კონფერენცია თემაზე: „საქართველო - ბულგარეთი (ისტორიული პარალელები)“. ორდღიან კონფერენციაზე ქართველი და ბულგარელი მეცნიერები განიხილავენ საქართველო-ბულგარეთის ურთიერთობის ისტორიას, ტრადიციულ-ყოფითი კულტურის საკითხებსა და ორივე ქვეყნის საარქივო სამმართველოებში დაცულ უნიკალურ დოკუმენტებს. სამეცნიერო სესიაზე წარმოდგენილი მოხსენებები კრებულის სახით გამოიცემა.

28-29 მაისს, შოთა რუსთაველის სახელმწიფო უნივერსიტეტმა აბრეშუმის გზის მე-6 საერთაშორისო კონფერენციას ,,გლობალიზაცია და უსაფრთხოება შავი და კასპიის ზღვების რეგიონებში“ უმასპინძლა. საერთაშორისო კონფერენციიის მიზანი იყო საზოგადოებისთვის შავი და კასპიის ზღვების რეგიონებში გლობალიზაციის, განათლების, ეკონომიკის, ჯანდაცვის, კულტურული თვითმყოფადობის, ტურიზმის განვითარებისა და უსაფრთხოების საკითხებზე წარმოებული კვლევის შედეგების გაცნობა. ,,გლობალიზაცია და უსაფრთხოება შავი და კასპიის ზღვების რეგიონებში“ შავი ზღვის საერთაშორისო უნივერსიტეტის, საქართველოს ეროვნული უშიშროების საბჭოსა და შინაგან საქმეთა სამინისტროს ორგანიზებით გაიმართა. კონფერენციაში ქართველებთან ერთად ფრანგი, თურქი, ამერიკელი, უკრაინელი, ბულგარელი, აზერბაიჯანელი, პოლონელი, რუმინელი, სომეხი, რუსი და სხვა უცხოელი მეცნიერები მონაწილეობდნენ.