ახალი ამბები

შოთა რუსთაველის სახელმწიფო უნივერსიტეტის ტურიზმის ფაკულტეტისა და აჭარის ა.რ. ტურიზმისა და კურორტების დეპარტამენტის ორგანიზებით გაიმართა II საერთაშორისო სამეცნიერო-პრაქტიკული კონფერენცია „ტურიზმი: ეკონომიკა და ბიზნესი“. კონფერეცნიაზე საქართველოს, თურქეთის, უკრაინის, გერმანიის, ლიტვის, ნორვეგიის, ამერიკისა და აზერბაიჯანის წამყვანი უმაღლესი სასწავლებლების პროფესორ-მასწავლებლებმა, ექსპერტებმა და ტურიზმის ინდუსტრიის წარმომადგენლებმა 150 მოხსენება წარმოადგინეს. ორი დღის განმავლობაში მეცნიერები, დარგის სპეციალისტები და ბიზნესმენები ერთობლივად მუშაობდნენ ტურიზმის ინდუსტრიის განვითარების აქტუალურ საკითხებზე. კონფერენციის მონაწილეებმა რეკომენდაციები შეიმუშავეს, რომელიც შესაბამის სამსახურებს გადაეგზავნება.

საქართველოს დამოუკიდებლობის აღდგენის 20 წელს მიეძღვნა შოთა რუსთაველის სახელმწიფო უნივერსიტეტისა და თბილისის ივანე ჯავახიშვილის სახელობის სახელმწიფო უნივერსიტეტის ერთობლივი კონფერენცია: ”საქართველო - დამოუკიდებლობის აღდგენის 20 წელი: მიღწევები, პრობლემები, პერსპექტივები”. კონფერენციაზე პროფესორ-მასწავლებლებმა და სტუდენტებმა ისეთი მნიშვნელოვანი საკითხები განიხილეს, როგორიცაა ქვეყნის დემოკრატიული განვითარება, სამოქალაქო საზოგადოების მშენებლობა და მოდერნიზაცია, დემოკრატიული ინსტიტუტების დამკვიდრება, საერთაშორისო ავტორიტეტის ამაღლება, მსოფლიო თანამეგობრობაში ინტეგრაცია, თანამედროვე განათლების ასპექტები და ეროვნული ფასეულობები. კონფერენციამ მუშაობა მრგვალ მაგიდასთან დაასრულა.

ქართველმა და ბულგარელმა მეცნიერებმა რსუ-ში სემინარები ჩაატარეს თემებზე: „ანთროპოლოგია დასავლური პერსპექტივით: საქართველო - ბულგარეთი” და „შავი ზღვის ქვეყნების კულტურის, ისტორიის, ანთროპოლოგიის, ლიტერატურის და ლინგვისტიკის ინოვაციური ასპექტების შესწავლა”. მკვლევრებმა მრგვალ მაგიდასთან მეცნიერების სხვადასხვა დარგის საკითხები განიხილეს. სემინარები, რომლებიც შოთა რუსთაველის სახელწიფო უნივერსიტეტის, ბულგარეთის სამხრეთ-დასავლეთ უნივერსიტეტის „ნეოფიტ რილსკისა” და სტუდია „ანთროპოს” ორგანიზებით გაიმართა, ტრადიციულ სახეს მიიღებს და ყოველ წელს ჩატარდება.

რსუ-ს სააქტო დარბაზში სტუდენტთა მომსახურებისა და მხარდაჭერის სამსახურის ორგანიზებით ბავშვთა დაცვის საერთაშორისო დღისადმი მიძღვნილი კონცერტი გაიმართა. ქალაქ ბათუმის 22 საჯარო ბაღის 250-მდე აღსაზრდელმა უნივერსიტეტის სცენაზე მუსიკალურ ნომრებთან ერთად იუმორისტული სკეტჩები და ცეკვები შეასრულა. შოთა რუსთაველის სახელმწიფო უნივერსიტეტის რექტორატმა, ადმინისტრაციამ და პროფესორ-მასწავლებლებმა პატარებს ბავშვთა დაცვის საერთაშორისო დღე მიულოცეს, ხოლო სტუდენტური თვითმმრთველობა სტუმრებს ტკბილეულით გაუმასპინძლდა.

ოთხმხრივი თანამშრომლობის მემორანდუმი გაფორმდა შოთა რუსთაველის სახელმწიფო უნივერსიტეტს, ილიას სახელმწიფო უნივერსიტეტს, შავი ზღვის ფლორისა და ფაუნის შემსწავლელ სამეცნიერო-კვლევით ცენტრსა და თბილისის ზოოლოგიურ პარკს შორის. ხელშეკრულების მიზანია შავი ზღვის ფლორისა და ფაუნის კვლევის ინსტიტუციური განვითარება, თანამშრომლების, მკვლევრების და პროფესორ-მასწავლებლების კვალიფიკაციის ამაღლება, სწავლების ხარისხის გაუმჯობესება, პარტნიორ დაწესებულებებს შორის არსებული რესურსების გამოყენებით ერთობლივი სამაგისტრო, სადოქტორო პროგრამებისა და პროექტების განხორციელება.