ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტის აგრარული მიმართულების პროფესორ-მასწავლებლებისა და სტუდენტებისთვის ფილოსოფიის დეპარტამენტის ასისტენტ პროფესორმა ირმა ბაგრატიონმა სემინარი ჩაატარა თემაზე: „გარემოს თეორიის“ არსი ქართულ და ევროპულ ფილოსოფიურ აზროვნებაში“. მომხსენებელმა ისაუბრა ბიოლოგიური და სოციოლოგიური პრობლემატიკის ერთგვარი სინთეზური კვლევის შედეგებზე. მან ასევე ისაუბრა მე-20 საუკუნის ქართულ ფილოსოფიაში ორგანოტროპიზმის სახით ჩამოყალიბებული გარკვეული ბიო-სოციალური ჰიპოთეზის იმ ძირითადი პრინციპების შესახებ, რომლითაც ტროპიზმის მოვლენამ ბიოლოგიის მეცნიერების საკვლევი სფეროდან გადაინაცვლა მსოფლმხედველობრივი თეორიის ჩარჩოებში და ფილოსოფიური კვლევის ობიექტი გახდა.

აჭარის ა.რ. სოფლის მეურნეობის მინისტრი ავთანდილ მესხიძე ბსუ-ს რექტორის მოადგილესთან ნათია წიკლაშვილთან და აგროსერვის ცენტრის დირექტორთან გოჩა ბერიძესთან ერთად, ბათუმის შოთა რუსთველის სახელმწიფო უნივერსიტეტის ტექნოლოგიური ფაკულტეტის სტუდენტებს შეხვდა და ანაზღაურებადი სტაჟირების პროგრამა გააცნო. პროექტი მიზნად ისახავს მაღალკვალიფიციური კადრების მომზადების ხელშეწყობას, ახალგაზრდების პროფესიულ განვითარებასა და პრაქტიკული უნარ-ჩვევების გამომუშავებას. აგრარული მიმართულების სტუდენტები 6-თვიან სტაჟირებას აჭარის სოფლის მეურნეობის სამინისტროს აგროსერვის ცენტრში გაივლიან და გაეცნობიან დარგის მუშაობის სპეციფიკას. სტაჟირების პროგრამაში მონაწილეობის მსურველთა რეგისტრაცია 5 ვაკანსიაზე დაიწყო და 5 მარტს დასრულდება.

ბათუმის შოთა რუსთაველის სახელმწიფო უნივერსიტეტს, საქართველოს ტექნიკურ უნივერსიტეტს, კონსორციუმ „ნოოსფერას“, გრიგოლ წულუკიძის სამთო ინსტიტუტს, რაფიელ დვალის მანქანათა მექანიკის ინსტიტუტს, ფერდინანდ თავაძის მეტალურგიისა და მასალათმცოდნეობის სამეცნიერო ინსტიტუტსა და სოხუმის ილია ვეკუას ფიზიკა-ტექნიკის ინსტიტუტს შორის თანამშრომლობის მემორანდუმი გაფორმდა. მხარეები ერთობლივად განახორციელებენ საპროექტო-საკონსტრუქტორო, სამეცნიერო, ექსპერიმენტულ, სამონტაჟო პროგრამებს. პროექტი მიზნად ისახავს ახალი თაობის დიდი მასშტაბის გასაშლელი კოსმოსური ნაგებობების, კოსმოსური რეფლექტორული ანტენების და მექანიზებული სწრაფად ასაგები ხიდების შექმნას, სადემონსტრაციო მასშტაბური მოდელების დამზადებას, სადემონსტრაციო დამხმარე სტენების აგებასა და დემონსტრირებას.

ბათუმის შოთა რუსთაველის სახელმწიფო უნივერსიტეტში ტექნოლოგიური ფაკულტეტის სტაჟიორები სტუდენტების პრაქტიკული გამოცდილების ანგარიშის პრეზენტაცია გაიმართა. აგრარული მიმართულების ათმა სტუდენტმა აჭარის ა.რ. სოფლის მეურნეობის სამინისტროს აგროსერვის ცენტრის სასათბურე, სადედე და სადემონსტრაციო მეურნეობებში 6-თვიანი ანაზღაურებადი სტაჟირება გაიარა. ღონისძიებას უნივერსიტეტის რექტორი მერაბ ხალვაში, აჭარის ა.რ. სოფლის მეურნეობის მინისტრი ავთანდილ მესხიძე, აგროსერვის ცენტრის დირექტორი გოჩა ბერიძე, უნივერსიტეტის აგრარული ფაკულტეტის დეკანი გიზო ფარცხალაძე, პროფესორ-მასწავლებლები და სტუდენტები ესწრებოდნენ.

კონკურსის „ეფექტიანი ცვლილებების სესიები“ დასკვნით ეტაპზე ოთხი წარდგენილი სტუდენტური პროექტიდან ორი გამარჯვებული გუნდი გამოვლინდა, რომელსაც ფინანსურ მხარდაჭერას კავკასიის გარემოსდაცვითი არასამთავრობო ორგანიზაციების ქსელი (CENN) გაუწევს. კონკურსი (WMTR II) პროგრამის ეგიდით ჩატარდა, რომელიც ორ ეტაპს მოიცავდა, პირველი ეტაპის ფარგლებში ღონისძიება უკვე ჩატარდა 9-10 ნოემბერს, რომლის ფარგლებშიც სტუდენტებს ჩაუტარდათ სემინარები და ტრენინგები ნარჩენების მართვის თემაზე. სემინარების შემდეგ, სტუდენტებმა სამუშაო ჯგუფებში მენტორების დახმარებით შეიმუშავეს კონკრეტული პროექტები ნარჩენების მართვის საკითხებზე.