20 აგვისტოდან 1 სექტემბრის ჩათვლით ნიკო ბერძენიშვილის ინსტიტუტის მკვლევრები: როინ მალაყმაძე (ინსტიტუტის დირექტორი, მთავარი მეცნიერ-თანამშრომელი), ოლეგ ჯიბაშვილი (უფროსი მეცნიერ-თანამშრომელი) და სულხან მამულაძე (მეცნიერ-თანამშრომელი) ეთნო-არქეოლოგიურ ექსპედიციაში იმყოფებოდნენ ხელვაჩაურის მუნიციპალიტეტის კირნათის თემში მდებარე სოფელ შუშანეთში. სოფელი შუშანეთი მდინარე ჭოროხის მარჯვენა სანაპიროზეა გაშენებული და უშუალოდ ძეგლი ამავე სოფლის ცენტრალურ ნაწილში, მთის ფერდობზე მდებარეობს.

ბათუმის შოთა რუსთაველის სახელმწიფო უნივერსიტეტის ნიკო ბარძენიშვილის ინსტიტუტში გაიმართა შოთა რუსთაველის საქართველოს ეროვნული სამეცნიერო ფონდის ფუნდამენტური საგრანტო პროექტის „რა იგებს არჩევნებს საქართველოში” (#FR-18-8649, 27.02.2019) მეორე საანგარიშო პერიოდის პრეზენტაცია. სამეცნიერო გუნდმა წარმოადგინა ინფორმაცია ამ პერიოდში მიღწეული შედეგებისა და განხორციელებული აქტივობების შესახებ; პრეზენტაციას დისტანციურად ესწრებოდნენ პროექტის საერთაშორისო კონსულტანტები.

ბსუ-ს ნიკო ბერძენიშვილის ინსტიტუტის დირექტორი როინ მალაყმაძე და ინსტიტუტის ეთნოლოგიისა და სოციოლოგიური კვლევის განყოფილების უფროსი თამილა ლომთათიძე, მკვლევარები ნინო ინაიშვილი და რუსლან ბარამიძე შეხვდნენ ივანე ჯავახიშვილის სახელმწიფო უნივერსიტეტისა და ბერგენის უნივერსიტეტის კულტურული ანთროპოლოგიის მაგისტრებს ნიკა გაზდელიანს, მანანა დუმბაძესა და კამილა ჰანსენს. გაიმართა კონსულტაციები მაგისტრებისათვის საინტერესო საკითხებზე, რაც ბათუმის ურბანიზაციის პრობლემებს ეხებოდა.

ბსუ-ს ნიკო ბერძენიშვილის ინტიტუტი ღრმა მწუხარებას გამოთქვამს ისტორიის მეცნიერებათა კანდიდატის, არქეოლოგის, ცნობილი მეცნიერის ნინელი ვაშაკიძის გარდაცვალების გამო. მკვლევარი ნინელი ვაშაკიძე 1967-2011 წლებში მუშაობდა ნიკო ბერძენიშვილის სახელობის კვლევით ინსტიტუტში, ჯერ უმცროს, შემდეგ უფროს და მთავარი მეცნიერ თანამშრომლის პოზიციაზე, ხელმძღვანელობდა არაერთ საველე სამეცნიერო ექსპედიციას. ის იყო რამდენიმე სამეცნიერო სტატიისა და მონოგრაფიის ავტორი. ნინელი ვაშაკიძის კვლევის საგანი იყო სამხრეთ-დასავლეთ საქართველოს ანტიკური ხანის არქეოლოგიური ძეგლების შესწავლა, განსაკუთრებულია მისი ღვაწლი ფიჭვნარის ნაქალაქარის შესწავლის საქმეში. იგი სიცოცხლის ბოლომდე სამეცნიერო საქმიანობით იყო დაკავებული და მოღვაწეობდა ბათუმის არქეოლოგიურ მუზეუმში.

ბსუ-ს აკადემიურმა საბჭომ რუმინეთის მეცნიერებათა აკადემიის ნამდვილ წევრს, თეოლოგიის დოქტორს, კონსტანცას ოვიდიუსის უნივერსიტეტის (რუმინეთი) რელიგიის კვლევისა და შესწავლის ცენტრის ხელმძღვანელს ნიკოლაე დურას საპატიო დოქტორის წოდება მიანიჭა. პროფესორი ნიკოლაე დურა აქტიურადაა ჩართული ბსუ-ს ნიკო ბერძენიშვილის ინსტიტუტის სამეცნიერო პროგრამების კოორდინირებაში, არის ინსტიტუტის სამეცნიერო შრომების სარედაქციო საბჭოს წევრი და ინსტიტუტის ეგიდით გამართული არაერთი სამეცნიერო საერთაშორისო კონფერენციის ორგანიზატორი. აკადემიკოსი ნიკოლაე დურა ხელს უწყობს ინტერდისციპლინური, ინტერკულტურული სამეცნიერო კვლევების განხორციელებასა და სწავლებას. დიდია პროფესორ ნიკოლაე დურას წვლილი ინსტიტუტის საერთაშორისო ურთიერთობების გაღრმავებასა და განმტკიცების საქმეში.