ბათუმის შოთა რუსთაველის სახელმწიფო უნივერსიტეტი აცხადებს მიღებას შემდეგ მოდულურ პროფესიულ საგანმანათლებლო პროგრამებზე: მეფუტკრე (III საფეხური), ბაგა-ბაღის აღმზრდელი პედაგოგი (IV საფეხური), პრაქტიკოსი ექთანი (IV საფეხური). პროფესიულ საგანმანათლებლო პროგრამებზე სწავლის მსურველებს რეგისტრაციის გავლა შეუძლიათ 2018 წლის 3 ოქტომბრიდან 19 ოქტომბრის ჩათვლით 10:00 დან 17:00 საათამდე.
ბათუმის შოთა რუსთაველის სახელმწიფო უნივერსიტეტმა თაფლის ფესტივალში მიიღო მონაწილეობა. ფესტივალზე ბსუ-ს პროფესიული მოდულური საგანმანათლებლო პროგრამა „მეფუტკრის“ სტუდენტებმა, ლექტორთან მანანა ბოლქვაძესთან ერთად, უნივერსიტეტის ბაზაზე არსებულ საფუტკრე მეურნეობაში წარმოებული თაფლი წარადგინეს. სტუდენტები სასწავლო პრაქტიკის ფარგლებში ფუტკრის მოვლის წესებსა და მეფუტკრეობის პროდუქტების წარმოებას სწავლობენ. ბსუ-ს სტენდმა ვიზიტორების დიდი ინტერესი გამოიწვია, მათ შესაძლებლობა ჰქონდათ დეტალურად გასცნობოდნენ პროფესიული პროგრამის პირობებს და ადგილზე დაეგემოვნებინათ სხვადასხვა სახეობის თაფლი.
ბათუმის შოთა რუსთველის სახელმწიფო უნივერსიტეტის მეფუტკრის (III საფეხური) მოდულური პროფესიული საგანმანათლებლო პროგრამის სტუდენტები ბსუ-ს ბაზაზე არსებულ საფუტკრე მეურნეობაში სასწავლო და საწარმოო პრაქტიკას გადიან. ახალგაზრდებს რამდენიმე თვის განმავლობაში ჩამოუყალიბდებათ პროფესიისათვის საჭირო უნარ-ჩვევები და ფუტკრის მოვლის წესებთან ერთად, შეისწავლიან მეფუტკრეობის პროდუქტების წარმოებას. პირველი არხის სატელევიზო გადაცემა „ფერმა“ დაინტერესდა ბსუ-ს მეფუტკრის პროფესიული პროგრამითა და ლექტორის მანანა ბოლქვაძის სასწავლო პროცესით. გადაცემა „ფერმა“ სექტემბერში სატელევიზიო სეზონს ბსუ-ს რეპორტაჟით გახსნის.
ტურიზმის ფაკულტეტის „სარესტორნო საქმისწარმოების“ III საფეხურის პროფესიული საგანმანათლებლო პროგრამის სტუდენტებს სერვირებასა და მომსახურებაში პრაქტიკული მეცადინეობა ჩაუტარდათ. პრაქტიკული მეცადინეობა ითვალისწინებს ექვსთვიანი სწავლების დროს მიღებული თეორიული ცოდნის გაღრმავებას და შესაბამისი უნარ-ჩვევების სრულყოფას. პრაქტიკული სწავლება ტურიზმის ფაკულტეტის რესტორნის სადემონსტრაციო ოთახში ჩატარდა და მას აჭარის ტურიზმისა და კურორტების დეპარტამენტის სერვისების განვითარების სამსახურის უფროსი გიორგი დოლიძე ხელმძღვანელობდა.
ბსუ-ს პროფესიული პროგრამების „ბეჭდური და ონლაინ გამოცემების რეპორტიორისა’’ და „კორესპონდენტის’’ სპეციალობის სტუდენტებმა სასწავლო პროცესში განხორციელებული პრაქტიკული ნამუშევრები ფართო საზოგადოებას წარუდგინეს. მომავალ ჟურნალისტებს მიესალმნენ აჭარის განათლების მინისტრი ინგა შამილიშვილი, აჭარის საზოგადოებრივი მაუწყებლის ხელმძღვანელი ნათია კაპანაძე და ბსუ-ს რექტორი მერაბ ხალვაში. მოწვეულ სტუმრებს სტუდენტებმა წარუდგინეს ფოტო და ვიდეო ნამუშევრები, ისაუბრეს იმ ჟურნალისტურ პროექტებზე, რომლებშიც აქტიურ მონაწილეობას ღებულობდნენ. შეხვედრის დასასრულს, აჭარის განათლების მინისტრმა ინგა შამილიშვილმა პროფესიულ სტუდენტთა პრაქტიკულ კონფერენციაში გამარჯვებულ სტუდენტებს - ლინდა მესხიძეს, ხატია რომანაძეს, იაგო ფალავანდიშვილს, თორნიკე დევაძესა და გიორგი გორჯელაძეს სერტიფიკატები გადასცა.
