საქართველოში ამერიკის შეერთებული შტატების ორგანიზებით „შემოქმედებითი წერის“ (Creative writing) კონკურსი გაიმართა. კონკურსში როგორც ეროვნულ, ასევე საერთაშორისო დონეზე ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის სტუდენტებმა - ანა ვარშანიძემ, თამთა სალიძემ, ნინო მახაძემ, ზეინაბ საღინაძემ, მარიამ ნაკაიძემ, ნესტან კოჩალიძემ, - გაიმარჯვეს, გამარჯვებულთა დაჯილდოება თბილისში, ამერიკულ აკადემიაში შედგა. სტუდენტებს სერტიფიკატები მწერალმა დავით ტურაშვილმა გადასცა.

19 მაისს თსუ-ს კლასიკური ფილოლოგიის, ბიზანტინისტიკისა და ნეოგრეცისტიკის ინსტიტუტში ჩატარდა IV ყოველწლიური სტუდენტური კონფერენცია „ანტიკურობის თანამედროვეობა“, რომელიც მიეძღვნა თბილისის სახელმწიფო უნივერსიტეტისა და კლასიკური ფილოლოგიის კათედრის დაარსებიდან 100 წლის იუბილეს. კონფერენციის მუშაობაში მონაწილეობა მიიღეს ბსუ-ს ჰუმანიტარულ მეცნიერებათა ფაკულტეტის ქართული ფილოლოგიის სპეციალობის სტუდენტებმა მარიკა გამახარიამ (ხელმძღვანელი პროფ. ლ. ზაქარაძე) და თათია დავითაძემ (ხელმძღვანელი პროფ. მ. გიორგაძემ).

ერაზმუს+-ის გაცვლითი პროგრამის ფარგლებში ალკალას უნივერსიტეტის პროფესორმა ჰექტორ ბრიოსომ 14-19 მაისს, ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ევროპეისტიკის დეპარტამენტის ინგლისური ფილოლოგიის სპეციალობის I-IV კურსის და მაგისტრატურის ევროპეისტიკის სპეციალობის I კურსის სტუდენტებისათვის ამერიკული ლიტერატურის საკითხებზე ლექციები ჩაატარა. პროფესორმა წაიკითხა 8-საათიანი კურსი ვლადიმერ ნაბოკოვის, კურტ ვონეგუტის, სოლ ბელოუს, ჯონ აპდაიკის და 20 საუკუნის სხვა გამოჩენილ ამერიკელ მწერლებზე.

ბსუ-ს პროექტის „უნივერსიტეტი - სკოლისთვის“ ეგიდით, ჰუმანიტარულ მეცნიერებათა ფაკულტეტის ასისტენტ პროფესორმა ირმა ბაგრატიონმა სკოლა-ლიცეუმის „მასტერ-კლასის“ მოსწავლეებისთვის უნივერსიტეტში საჯარო ლექცია წაიკითხა თემაზე: „რა არის ეთიკა? რა არის ეტიკეტი?“. მომხსენებელმა განიხილა ეთიკისა და ეტიკეტის, როგორც სპეციფიკური ცოდნის, დარგების არსობრივი თავისებურებანი, მათი ურთიერთმიმართების საკითხები და აქტუალურ შე-კ¬ი¬თხვებს უპასუხა. პროექტის ფარგლებში ახალგაზრდები გაეცნენ ბათუმის შოთა რუსთაველის სახელმწიფო უნივერსიტეტის მატერიალურ-ტექნიკურ ბაზას და კაბინეტ-ლაბორატორიებს. ღონისძიების დასასრულს, სკოლა-ლიცეუმის „მასტერ-კლასის“ მოსწავლეებს სამახსოვრო საჩუქრები გადაეცათ.

ქუთაისის აკაკი წერეთლის სახელმწიფო უნივერსიტეტში ვილიამ კროუფორდმა, ჩრდილოეთ არიზონას უნივერსიტეტის ასოცირებულმა პროფესორმა სემინარი ჩაატარა თემაზე: „კვლევის თანამედროვე მეთოდები ლინგვისტიკაში და კორპუს-ლინგვისტიკის როლი ინგლისური ენის როგორც მეორე უცხოური ენის სწავლების პროცესში“. შეხვედრაზე მიწვეულ იყვნენ ბათუმის შოთა რუსთაველის სახელმწიფო უნივერსიტეტის ინგლისური ფილოლოგიის სპეციალობის პროფესორ-მასწავლებლები. სემინარზე განხილული იყო ლინგვისტური ასპექტების კვლევისათვის აუცილებელი თანამედროვე მეთოდები, ხაზი გაესვა ქართულ აუდიტორიაში ინგლისური ენის სწავლების პროცესში კორპუს-ლინგვისტიკის მნიშვნელობას. სემინარის მონაწილეებს სერტიფიკატები გადაეცათ.