ბათუმის შოთა რუსთაველის სახელმწიფო უნივერსიტეტში ფრანგულენოვანი საზაფხულო სკოლა "ვისწავლოთ ფრანგული ერთად" საზეიმოდ დაიხურა. სამი კვირის განმავლობაში ჰუმანიტარულ მეცნიერებთა ფაკულტეტის ევროპეისტიკის დეპარატმენტის პროფესორ-მასწავლებლები სხვადასხვა სკოლის 25 მოსწავლეს საკომუნიკაციო ფრანგულ ენას ასწავლიდნენ. საზაფხულო სკოლა მიზნად ისახავდა ფრანგული ენის პოპულარიზაციას, მოსწავლე-ახალგაზრდებში ცნობიერების ამაღლებას, აბიტურიენტთა მოზიდვას, სკოლისა და უნივერსიტეტის თანამშრომლობის ხელშეწყობას.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ისტორიის სპეციალობის II კურსის 55 სტუდენტი სასწავლო პრაქტიკის ფარგლებში გონიო-აფსაროსის მუზეუმ-ნაკრძალში მიმდინარე არქეოლოგიურ გათხრებში მონაწილეობს. მომავალი ისტორიკოსების ერთი ჯგუფი ციხის შიდა ტერიტორიაზე, სამხრეთ-დასავლეთ უბანში, I-III საუკუნეების რომაულ პერიოდის უბანში მუშაობს, მეორე ჯგუფი კი - ჩრდილო-აღმოსავლეთ ნაწილში, შერეული პერიოდის არქეოლოგიურ უბანს იკვლევს.

ჰუმანიტარულ მეცნიერებათა ფაკულტეტის ევროპეისტიკის დეპარტამენტის პროფესორ-მასწავლებლებმა: ნათია ქათამაძემ, ივდით დიასამაიძემ, ლალი თავაძემ, ნანა მაზმიშვილმა და ჟუჟუნა გუმბარიძემ ტრენინგი ჩაატარეს სწავლების თანამედროვე მეთოდებსა და სიახლეებზე. სამდღიანი სასწავლო კურსის ფარგლებში ფაკულტეტის აკადემიური პერსონალი ისეთ აქტუალურ საკითხებს გაეცნო, როგორიცაა: ტექნოლოგიების გამოყენება სწავლა-სწავლების პროცესში, თანამშრომლობითი სწავლების ფორმები, დავალებაზე დაფუძნებული სწავლება, სტუდენტთა პროფილები, მათი ძლიერი და სუსტი მხრეების გაანალიზება, ავტონომიური სწავლება, მოაზროვნე ქუდები - სააზროვნო უნარ-ჩვევების დასაუფლებლად, მულტიმოდალური მიდგომა და სენსორული ზმნების გამოყენება სწავლების პროცესში.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის პროფესორ-მასწავლებლებისათვის ჩატარდა ტრენინგი „სასწავლო კურსის დაგეგმვა, განხორციელება და შეფასება“. ტემპუსის ეროვნული ოფისის უმაღლესი განათლების რეფორმის ექსპერტმა (Higher Education Reform Expert of National Tempus/Erasmus+ Office, HERE), თსუ-ს ასოცირებულმა პროფესორმა ირინე დარჩიამ ტრენინგის 35 მონაწილეს ავტორიზაციის ახალი სტანდარტები, კურიკულუმის შემუშავება, ხარისხის უზრუნველყოფის მექანიზმები და სხვ. აქტუალური საკითხი გააცნო.

IX საერთაშორისო ფორუმი „გეო-კულტურული სივრცე: სმარტ-ტექნოლოგიები განათლებასა და სოციუმში“ გაიხსნა ბათუმის შოთა რუსთაველის სახელმწიფო უნივერსიტეტში. ფორუმი სხვადასხვა ქვეყნის ლინგვისტებს, მეთოდისტებს, კულტურულოგებს, ლიტერატურათმცოდნეებსა და პედაგოგებს აერთიანებს ეროვნულ სოციუმთა ჰუმანიტარულ სფეროში წარმოქმნილი აქტუალური პრობლემების გამოსაკვლევად. სესია ასევე ითვალისწინებს ქვეყნებს შორის თანამშრომლობის გასაუმჯობესებას, რეალურ და ვირტუალურ ფორმატში ურთიერთბის კულტურის ამაღლებას, სპეციალისტთა მეცნიერული და პედაგოგიური პოტენციალის ინტეგრაციას ინოვაციური კულტურათშორისი საგანმანათლებლო და სამეცნიერო გარემოს შექმნის გზით.