ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის „ქართველოლოგიის ცენტრის“ მკვლევართა ჯგუფი სამეცნიერო პროექტების „ტაო“ (ხელმძღვანელი, პროფესორი მამია ფაღავა) და „მარადიდი“ (ხელმძღვანელი, პროფესორი მალხაზ ჩოხარაძე. ორივე პროექტი დაფინანსებულია შოთა რუსთაველის ეროვნული სამეცნიერო ფონდის მიერ) ფარგლებში სამეცნიერო მივლინებით იმყოფებოდა ისტორიულ სამხრეთ საქართველოში. მეცნიერები ხუთი დღის განმავლობაში მუშაობდნენ ზემო მარადიდში - ახლა მურათლი (ძველი კლარჯეთის სოფელი, თანამედროვე ართვინის ილი, ბორჩხის ილჩე. თურქეთის რესპუბლიკა), ოლთისსა და თორთუმში (ძვ. ტაოს ქვეყანა. ახლა არზრუმის ილი, ოლთისისა და თორთუმის ილჩეები. თურქეთის რესპუბლიკა).

ბათუმის შოთა რუსთაველის სახელმწიფო უნივერსიტეტის რექტორი მერაბ ხალვაში, რექტორის მოადგილეები ნათია წიკლაშვილი, თამარ სირაძე საერთაშორისო სადოქტორო სკოლის „დიგიტალური ჰუმანიტარიის“ გამარჯვებულ დოქტორანტებს შეხვდნენ და წარმატება მიულოცეს. საერთაშორისო პროექტს გოეთეს სახელობის უნივერსიტეტი ბათუმის შოთა რუსთაველის სახელმწიფო უნივერსიტეტთან და ივანე ჯავახიშვილის სახელობის თბილისის სახელმწიფო უნივერსიტეტთან ერთად ახორციელებს. პროექტის ფარგლებში შექმნილი სადოქტორო სკოლის მონაწილეებმა პირველი ტურის შემდეგ, მონაწილეობა მიიღეს 23-29 მარტს, ფრანკფურტის გოეთეს სახელობის უნივერსიტეტის ემპირიული ენათმეცნიერების ინსტიტუტში გამართულ მეორე ტურში. თამარ ქათამაძე, დევაძე ქეთი და ბერიძე მარიკა უფასოდ ისწავლიან სამი წლის განმავლობაში, მათ მეცნიერ-ხელმძღვანელები ეყოლებათ საქართველოსა და გერმანიაში.

დღეს, ბათუმის შოთა რუსთაველის სახელმწიფო უნივერსიტეტში ფრანკოფონიის კვირეული საზეიმოდ დაიხურა. კვირეულის ფარგლებში უნივერსიტეტს საფრანგეთის საელჩოს ატაშე სამეცნიერო და საუნივერსიტეტო დარგში ტერი ბურტე და ფრანგული ინსტიტუტის ლინგვისტური და საგანმანათლებლო პროგრამების კოორდინატორი ქეთევან ქურციკიძე ეწვია. სტუმრებმა ფრანგული ენის მნიშვნელობაზე, სასწავლო და სამეცნიერო თანამშრომლობაზე და სამომავლო პერსპექტივებზე ისაუბრეს.
ფრანკოფონიის კვირეულის დახურვის ცერემონიაზე ფრანგული ენის კონკურსში გამარჯვებულ სტუდენტებსა და საჯარო სკოლის მოსწავლეებს სიგელები გადასცეს.

ბათუმის განმათავისუფლებელ ბრძოლაში დაღუპული გმირები ბათუმის შოთა რუსთაველის სახელმწიფო უნივერსიტეტის სტუდენტებმა, პროფესორ-მასწავლებლებმა და ადმინისტრაციის წარმომადგენლებმა რამდენიმე ღონისძიებით გაიხსენეს. ჰუმანიტარულ მეცნიერებათა ფაკულტეტის ისტორიის სპეციალობის სტუდენტებმა კონფერენციაზე 1921 წლის 17-23 მარტს განვითარებულ მოვლენებზე მოხსენებები წარმოადგინეს და რეჟისორ ლევან ახობაძის დოკუმენტური ფილმის „დამოუკიდებლობის 1005 დღის“ ჩვენება გამართეს. ასევე გაიხსნა ამ დღეების ამსახველი გამოფენა და საინფორმაციო კამპანია. სტუდენტებმა უმაღლესი საგანმანათლებლო დაწესებულების ეზოდან ტრადიციული მსვლელობა მოეწყო, ახალგაზრდებმა მემორიალური ქვა ყვავილებით შეამკეს და იუნკერების ხსოვნას პატივი მიაგეს.

19 მარტს, ბათუმის შოთა რუსთაველის სახელმწიფო უნივერსიტეტში ფრანკოფონიის კვირეული ‘’ფრანკოფონია-2017’’ გაიხსნა. კვირეული ფრანგულ ენაში კალიგრაფიის კონკურსითა და რეგიონული ფრანგული ენის ტესტირებით დაიწყო. კონკურსში, სახელწოდებით ‘’Bonjour la France’’ რეგიონის საჯარო და კერძო სკოლის მოსწავლეები მონაწილეობდნენ. გამარჯვებულ მოსწავლეებს სერტიფიკატები კვირეულის დასკვნით ცერემონიაზე გადაეცემათ.