თურქეთის რესპუბლიკის ფირატის უნივერსიტეტის სოციალურ მეცნიერებათა ფაკულტეტის პროფესორმა აჰმეთ ბურანმა ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხა. აჰმეთ ბურანმა აღმოსავლეთმცოდნეობის დეპარტამენტის პროფესორ-მასწავლებლებსა და თურქეთისმცოდნეობის სპეციალობის სტუდენტებს თურქული დამწერლობის ისტორიული განვითარების საფეხურები გააცნო.

2016 წლის 1-12 მარტს თბილისში (მცხეთა) „ზამთრის ქართველოლოგიური სკოლა 2016 “ გაიმართა , რომლის მუშაობაში მონაწილეობა მიიღო ბსუ-ს ჰუმანიტარულ მეცნიერებათა ფაკუკლტეტის პირველი კურსის სტუდენტმა თამარ ბაქანიძემ. იგი პირველი ეტაპის გამარჯვებული გახდა თემით: „ ქართული ფილოსოფიის განვითარების ეტაპები“

2016 წლის 9,10 და 11 მარტს, საინფორმაციო შეხვედრები გაიმართა ჰუმანიტარული ფაკულტეტის სტუდენტებსა და ადმინისტრაციას შორის. სტუდენტებს ფაკულტეტის დეკანი, დეპარტამენტების ხელმძღვანელები და კურატორები შეხვდნენ. სტუდენტებმა დეტალური ინფორმაცია მიიღეს აკადემიური და ადმინისტრაციული რეგისტრაციის ვადებსა და პროცედურებზე. ადმინისტრაციისაგან პასუხები მიიღეს ყველა მათთვის საინტერესო კითხვაზე.

მასწავლებელთა გაცვლითი პროგრამის- „Agir ABCD”- ის ფარგლებში ბათუმის შოთა რუსთაველის სახელმწიფო უნივერსიტეტს ფრანგი მასწავლებელი ფრანსუაზა ლენოტრი ეწვია. მოწვეული მასწავლებელი 3 თვის განმავლობაში პრაქტიკულ მეცადინეობებს ჩაუტარებს ფრანგული ფილოლოგიის (ძირითადი და დამატებითი) სპეციალობის სტუდენტებს. ამასთანავე, ის გამოცდილებას გაუზიარებს ლექტორ-მასწავლებლებს უცხოური ენის სწავლების თანამედროვე მეთოდებში.

3 მარტს, ილიას უნივერსიტეტის პროფესორი მამუკა ნადარეიშვილი, ბათუმის შ/რ სახელმწიფო უნივერსიტეტის სოციოლოგიის სპეციალობის მაგისტრანტებს შეხვდა. შეხვედრის ძირითადი თემა სოციალური დახმარების სისტემის დღევანდელი მდგომარეობის ანალიზი გახლდათ. თუმცა, საუბრისას, ყურადღების მიღმა არ დარჩენილა ისეთი საკითხები, როგორიცაა: საქართველოში სოციალური დახმარების სისტემის ჩამოყალიბებისა და განვითარების პერიოდის მიმოხილვა, სოციალური დახმარების მიმღებთა მდგომარეობისა და დახმარების მიღების მსაზღვრელების გაანალიზება, სოციალური დახმარების გაცემასთან დაკავშირებული სირთულეების განსაზღვრა. აღნიშნული ტიპის შეხვედრები სტუდენტთა ინფორმაციული დონისა და პრაქტიკული თვალსაწიერის გამდიდრებას უწყობს ხელს.