ფრანგული ინსტიტუტის ატაშე საუნივერსიტეტო და სამეცნიერო თანამშრომლობის საკითხში კოლა კაბრიელი საქართველოს ფრანგული ინსტიტუტის ლინგვისტური და საგანმანათლებლო პროგრამების კოორდინატორ ქეთევან ქურციკიძესთან ერთად ბათუმის შოთა რუსთველის სახელმწიფო უნივერსიტეტს ეწვია. რექტორის მოვალეობის შემსრულებელთან მერაბ ხალვაშთან, საერთაშორისო ურთიერთობათა და სტრატეგიული განვიატრების სამსახურის უფროსთან ნანა ყურშუბაძესთან, ჰუმანიტარულ მეცნიერებათა ფაკულტეტის დეკანთან მარინა გიორგაძესთან და ფრანგული ფილოლოგიის მიმართულების ხელმძღვანელთან ნატალია სურგულაძესთან გამართულ შეხვედრაზე სტუმარმა სამომავლო გეგმებზე ისაუბრა. დაიგეგმა გაცვლითი პროგრამებისა და მობილობის ხელშეწყობა, ერასმუს+-ის პარტნიორ უნივერსიტეტებთან თანამშრომლობის დამყარება და საფრანგეთის უნივერსიტეტებთან მემორანდუმის გაფორმება. მხარეთა შეთანხმებით, სამაგისტრო პროგრამების ყველა მიმართულების სტუდენტებისათვის ამოქმედდება საფრანგეთის მთავრობის მიერ გამოყოფილი სტიპენდიები, შემუშავდება და განხორციელდება ერთობლივი პროექტები.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის სლავისტიკის დეპარტამენტში ჩატარდა რუსული ლიტერატურის წლისადმი მიძღვნილი ღონისძიება „რუსი მწერლები და პოეტები ბათუმში“. სტუდენტებმა წარმოადგინეს ო. მანდელშტამის, მ. ბულგაკოვისა და ს. ესენინის შემოქმედებითი ბიოგრაფიის ბათუმური პერიოდი. ახალგაზრდებმა ისაუბრეს მათი ბათუმში ჩამოსვლის მიზეზებზე, გააანალიზეს, წაიკითხეს მათ მიერ ბათუმში და ბათუმზე დაწერილი ლექსები და შეასრულეს სიმღერები. ღონისძიების მონაწილეებმა ხაზი გაუსვეს ბათუმის როლს რუსი ლიტერატორების შემოქმედებით ბიოგრაფიაში. XX საუკუნის პირველი მესამედის პოლიტიკურ-სოციალურმა ქარტეხილებმა ქალაქს საკმაოდ საინტერესო ფუნქცია მიანიჭა – რუსი პოეტები და მწერლები ამ ქალაქის გავლით უცხოეთში მოხვედრას გეგმავდნენ. მაგრამ სწორედ აქ იფილტრებოდა რუს მწერალთა მისწრაფება უცხოეთისადმი, აქ აკეთებდნენ არჩევანს და ამ არჩევანის შედეგად შეინარჩუნა რუსულმა ლიტერატურამ ამ პოეტების სახელები. ღონისძიება ჰუმანიტარულ მეცნიერებათა ფაკულტეტის ორგანიზებით გაიმართა.

ბათუმის შოთა რუსთაველის სახელმწიფო უნივერსიტეტის სტუდენტების ნახატების გამოფენა გაიხსნა „აჭარწიგნის“ წიგნების მაღაზიაში. დამთვალიერებელს ათი დღის განმავლობაში შესაძლებლობა ექნება გაეცნონ ახალგაზრდა თვითნასწავლი მხატვრების 50 ნამუშევარს. ღონისძიება მიზნად ისახავდა სტუდენტების პროფესიული განვითარების ხელშეწყობასა და მათი შემოქმედების პოპულარიზაციას. გამოფენა უმაღლესი საგანმანათლებლო დაწესებულების სტუდენტური ასოციაციისა და სტუდენტთა სამეცნიერო ცენტრის ორგანიზებით მოეწყო.

აბელ სურგულაძის აუდიტორიაში ჰუმანიტარულ მეცნიერებათა ფაკულტეტის ისტორიის საგანმანათლებლო პროგრამის სტუდენტების მონაწილეობით დისკუსია გაიმართა თემაზე: „ვახტანგ გორგასლის საეკლესიო რეფორმები და მონოფიზიტობა საქართველოში“. ახალგაზრდებმა მოხსენებები წარმოადგინეს ვახტანგ მეფის ცხოვრებაზე, მოღვაწეობაზე და მოწვეულ სტუმრებთან ერთად მის მიერ გატარებულ საეკლესიო რეფორმებზე იმსჯელეს. დისკუსია ბათუმის შოთა რუსთაველის სახელმწიფო უნივერსიტეტის სტუდენტთა სამეცნიერო ცენტრის, ჰუმანიტარულ მეცნიერებათა ფაკულტეტის და სტუდენტთა მომსახურებისა და მხარდაჭერის სამსახურის ორგანიზებით ჩატარდა.

ბათუმის შოთა რუსთაველის სახელმწიფო უნივერსიტეტის აღმოსავლეთმცოდნეობის დეპარტამენტის პროფესორმა ემზარ მაკარაძემ და ასისტენტ პროფესორმა ლიანა ჭყონიამ მონაწილეობა მიიღეს სტამბოლში გამართულ საერთაშორისო სემინარის „კავკასიის თურქოლოგთა I საერთაშორისო სამუშაო შეხვედრის” მუშაობაში. ღონისძიება მიზნად ისახავდა საქართველოსა და კავკასიაში თურქოლოგიაში არსებული პრობლემების წარმოჩენას, განხილვასა და მათი გადაჭრისათვის ოპტიმალური გზების მოძიებას. ორდღიანო სემინარი იუნუს ემრეს სახელობის ინსტიტუტისა და თურქეთის საენათმეცნიერო საზოგადოების ორგანიზებით ჩატარდა.