სამხრეთ-აღმოსავლეთ ნორვეგიის უნივერსიტეტის პროფესორმა, ბათუმის შოთა რუსთაველის სახელმწიფო უნივერსიტეტის საპატიო დოქტორმა, თეიმურაზ აბესაძემ ტურიზმის ფაკულტეტის სტუდენტებისათვის მასტერკლასი ჩაატარა თემაზე: „სოფლად ტურიზმის განვითარების საერთაშორისო გამოცდილება". ღონისძიების ფარგლებში სტუდენტები სოფლად მდგრადი ტურიზმის განვითარების ნორვეგიულ და საერთაშორისო გამოცდილებას გაეცნენ. შეხვედრის დასასრულს, პროფესორმა თეიმურაზ აბესაძემ სტუდენტების შეკითხვებს უპასუხა.

სასწავლო-პრაქტიკული ხასიათის ტური მოეწყო ისტორიულ ტაო-კლარჯეთში. ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის 62 სტუდენტმა ხახულის, ოშკის, იშხნის, ოთხთას, პარხალის, დოლისყანის ტაძრები და სამონასტრო კომპლექსები მოინახულა. ახალგაზრდებმა კულტურულ ტურიზმსა და საექსკურსიო საქმეში პროფესიული უნარ-ჩვევების პირველი გამოცდა ისტორიულ საქართველოში ჩააბარეს.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტს სამუშაო ვიზიტით, საფრანგეთის საელჩოს სპეციალური ატაშე საუნივერსიტეტო და სამეცნიერო საკითხებში, ბატონი ტერი ბურტე ეწვია. ვიზიტი მიზანდ ისახავდა საქართველოსა და საფრანგეთს შორის საბაკალავრო და სამაგისტრო დუალური პროგრამების განხორციელებას. შეხვედრისას ყურადღება გამახვილდა ასევე ერთობლივი საზაფხულო სკოლის ორგანიზებასა და მოკლევადიანი საგანმანათლებლო პროგრამების შემუშავებაზე.

ბათუმის შოთა რუსთაველის სახელმწიფო უნივერსიტეტში კრეატიული სტარტაპების საქართველოს ჩემპიონატის, სიბისი 2017-ის წარდგინება გაიმართა. ტურნირის მიზანი და მასში მონაწილეობის პირობები ტურიზმის ფაკულტეტის სტუდენტებს სიბისი ჯორჯია-ს დამფუძნებელმა გელა სულიმ და აჭარის განათლების, კულტურისა და სპორტის მინისტრის მოადგილემ თეონა ბერიძემ გააცნეს. პრეზენტაციაზე მათ ასევე ისაუბრეს კრეატიული სტარტაპების აჭარის რეგიონალური ტურნირზე, რომელიც ბათუმში 10 აპრილს ჩატარდება. „სიბისი ჯორჯიას“ ეროვნულო ჩემპიონატი ტარდება როგორც ბიზნეს სექტორის ჩართულობით, ასევე შესაბამისი სახელმწიფო სტრუქტურების მხარდაჭერით. ორგანიზაცია უზრუნველყოფს ჩვენს ქვეყანაში ინიცირებული კრეატიული ბიზნეს იდეების, კონკურსის წესით პროექტების მიღებას და საერთაშორისო კონკურსზე წარდგენას.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის დეკანი პროფესორი როსტომ ბერიძე და ფაკულტეტის ხარისხის უზრუნველყოფის სამსახურის უფროსი, ასისტენტ პროფესორი მერაბ დიასამიძე 12-19 მარტს სამუშაო ვიზიტით ზალცბურგის გამოყენებით მეცნიერებათა უნივერსიტეტს სტუმრობდნენ. ზალცბურგის უნივერსიტეტის ინოვაციებისა და ტურიზმის ფაკულტეტთან ერთად ბსუ-ს ტურიზმის ფაკულტეტი ამზადებს საერთაშორისო პროექტს, რომელიც ითვალისწინებს რეგიონში, ტურიზმის ინდუსტრიაში არსებული მცირე მეწარმეების სწავლება-კონსულტირებასა და მათ განვითარებას. პროექტს ავსტრიის განვითარების კომპანია დააფინანსებს და მისი სავარაუდო ბიუჯეტი 1 000 000 ევრო იქნება.